24th Jun2021

ປກສ ແຂວງ ໄຊຍະບູລີ ສືບຕໍ່ແກ້ໄຂ ແລະ ກຽມພ້ອມຮັບມືກັບໄພພິບັດ ທີ່ອາດຈະເກີດຂຶ້ນ.

by somchan

ວັນທີ 21 ມິຖຸນາ 2021, ທີ່ຫ້ອງປະຊຸມ ກອງບັນຊາການ ປກສ ແຂວງ ໄຊຍະບູລີ ໄດ້ຈັດກອງປະຊຸມປຶກສາຫາລືສືບຕໍ່ການແກ້ໄຂ ແລະ ກຽມ ພ້ອມຮັບມືກັບໄພພິບັດ ທີ່ອາດຈະເກີດຂຶ້ນໃນຕໍ່ໜ້າ, ໂດຍການເປັນປະທານຂອງ ພັອ ຄໍາ ແພງເພັດ ໜົວໜ້າກອງບັນຊາການ ປກສ ແຂວງ, ມີຄະນະ ພັກ-ຄະນະບັນຊາການ, ພ້ອມດ້ວຍຄະນະຫ້ອງອ້ອມຂ້າງເຂົ້າຮ່ວມ.

ພັອ ຄໍາ ແພງເພັດ ໃຫ້ຮູ້ວ່າ: ພາຍຫຼັງລະດັບນໍ້າລົດລົງສູ່ພາວະປົກກະຕິ, ຄະນະພັກ-ຄະນະບັນຊາ ໄດ້ຊີ້ນໍາ-ນໍາພາ ນາຍ ແລະ ພົນຕໍາຫຼວດພາຍໃນກໍາລັງ ແລະ ໄດ້ຮັບການຊ່ວຍເຫຼືອຈາກກອງບັນຊາການທະຫານແຂວງໄຊຍະບູລີ ນໍາກໍາລັງສຸມໃສ່ອະນາໄມສະຖານທີ່ຕ່າງໆບໍ່ວ່າຈະເປັນຄ້າຍ, ຫ້ອງການ, ວັດຖຸອຸປະກອນ ແລະເອກະສານຕ່າງໆ; ມາ ຮອດປັດຈຸບັນແມ່ນຍັງບໍ່ທັນສໍາເລັດ; ດັ່ງນັ້ນ, ຈຶ່ງໄດ້ແບ່ງຂອບເຂດຄວາມຮັບຜິດຊອບໃຫ້ບັນດາຫ້ອງ, ກອງອ້ອມຂ້າງສຶບຕໍ່ອະນາໄມ ບໍລິເວນຄ້າຍ, ຫ້ອງການທີ່ຖືກຜົນກະທົບຈົນກວ່າ ກັບຄືນສູ່ສະ ພາບປົກກະຕິ, ພ້ອມທັງຈັດວາງກໍາລັງສຸ່ມໃສ່ຊ່ວຍເຫຼືອປະຊາຊົນ ແລະຄອບຄົວນາຍ ແລະ ພົນ ຕໍາຫຼວດທີ່ໄດ້ຮັບຜົນກະທົບຈາກໄພນໍາຖ້ວມ.

ກອງປະຊຸມຍັງໄດ້ປຶກສາຫາລື ປະກອບຄໍາຄິດ ຄໍາເຫັນ ແລກປ່ຽນບົດຮຽນ ເພື່ອກຽມຄວາມພ້ອມຮອບດ້ານໃນການຮັບມືກັບໄພພິບັດທາງທໍາມະຊາດທີ່ອາດຈະເກີດຂຶ້ນຕໍ່ໜ້າ, ສຶບຕໍ່ປະຕິບັດມາດຕະການຄວບຄຸມສະກັດກັ້ນການແຜ່ລະບາດຂອງພະຍາດໂຄວິດ-19 ໃຫ້ເຂັ້ມງວດ ໄປຄຽງຄູ່ກັບການປຸກລະດົມນາຍ ແລະ ພົນຕໍາຫຼວດຜູ້ທີ່ບໍ່ທັນໄດ້ຮັບການສັກວັກຊີນໃຫ້ໄປສັກວັກຊີນໃຫ້ຄົບຕາມລະບຽບການ ທີ່ກະຊວງສາທາລະນະສຸກກໍານົດໄວ້.

ໃນໂອກາດນີ້, ທ່ານຫົວໜ້າກອງບັນຊາການ ຍັງໄດ້ຮຽກຮ້ອງມາຍັງຄະ ນະພັກ-ຄະນະບັນຊາ ແຕ່ ລະຂັ້ນເອົາໃຈໃສ່ເຮັດວຽກງານສຶກສາອົບຮົມການ ເມືອງແນວຄິດໃຫ້ນາຍ ແລະ ພົນຕໍາຫຼວດທີ່ຢູ່ໃນຄວາມຮັບຜິດຊອບຂອງຕົນໃຫ້ມີສະຕິລະວັງຕົວ, ຕິດຕາມຂໍ້ມູນຂ່າວສານ ທີ່ມີຄວາມຈິງ ໂດຍສະ ເພາະ ແມ່ນແຈ້ງການຂອງກົມອຸຕຸນິຍົມ ແລະ ອຸທົກກະສາດ ເພື່ອກຽມຄວາມພ້ອມໃນການຮັບມືກັບໄພພິບັດທາງທໍາມະຊາດທີ່ອາດຈະເກີດຂຶ້ນໃນຕໍ່ໜ້າໃຫ້ທັນເວລາ.

Off

Comments are closed.