24th Jun2021

ຄອບຄອງ ແລະ ຂົນສົ່ງຢາໄອສ 120 ກິໂລກຣາມ ຖືກສານລົງໂທດປະຫານຊີວິດ

by somchan

ໃນວັນທີ 18 ມີຖຸນາ 2021 ຄະນະສານອາຍາຂັ້ນຕົ້ນ ແຂວງອຸດົມໄຊ ໄດ້ພິຈາລະນາຕັດສິນລົງໂທດ ທ້າວ ບີວື ອາຍຸ 25 ປີ ສັນຊາດລາວ,ອາຊີບປະຊາຊົນ, ທ້າວ ບຸນເຊັງລີ ຫຼື ຊົງປໍລີ, ອາຍຸ 25 ປີ, ປະຊາຊົນ ທັງສອງຢູບ້ານ ຊາຍຈະເລີນ, ເມືອງຫ້ວຍຊາຍ,ແຂວງບໍແກ້ວ, ຖືກກັກຕົວ ວັນທີ 22 ສິງຫາ 2019 ພ້ອມຢາ(ໄອສ໌) ຈຳນວນ 120 ຫໍ່, ນໍ້າໜັກ 120 ກິໂລກຣາມ.

ຄືໃນວັນທີ 21 ສິງຫາ 2019 ທາງເຈົ້າໜ້າທີ່ ປກສ ເມືອງປາກແບງ, ແຂວງອຸດົມໄຊ ໄດ້ສະກັດກັ້ນແກ້ໄຂເປົ້າໝາຍຄ້າ-ຂາຍຢາເສບຕິດ ທີ່ເຄື່ອນຍ້າຍຢາເສບຕິດ ຈາກແຂວງບໍ່ແກ້ວ ໄປນະຄອນຫຼວງວຽງຈັນ ໂດຍນໍາໃຊ້ລົດກະບະເພື່ອຂົນສົ່ງຢາເສບຕິດ ຜ່ານເມືອງປາກແບງ, ແຂວງອຸດົມໄຊ, ເຈົ້າໜ້າທີ່ໄດ້ຈັດກໍາລັງເຄື່ອນໄຫວຕິດຕາມ, ກວດກາຢູ່ເສັ້ນທາງເມືອງປາກແບງ, ແຂວງອຸດົມໄຊ ຫາ ເມືອງຜາອຸດົມ, ແຂວງບໍ່ແກ້ວ ແຕ່ເປົ້າໝາຍໄດ້ຂັບຂີ່ລົດເອົາຕົວລົບໜີໄປທາງເມືອງຜາອຸດົມ ເຈົ້າໜ້າທີ່ຈິ່ງໄດ້ແຈ້ງຫາ ປກສ ກຸ່ມບ້ານ ມົກໂຄ, ເມືອງປາກແບງ ເພື່ອລັດສະກັດ ແລະ ສາມາດກັກລົດກະບະຍີ່ຫໍ້ TOYOTA REVO ສີຂາວ, ໝາຍເລກທະບຽນ ກຳແພງນະຄອນ ກຣ 2644 ຂັບຂີ່ໂດຍທ້າວ ບຸນເຊັງລີ ຫຼື ຊົງປໍລີ ແລະ ທ້າວ ບີວື ເຈົ້າໜ້າທີ່ຈຶ່ງຂໍອະນຸຍາດກວດກາລົດຄັນດັ່ງກ່າວພົບເຫັນ ເງີນບາດຈໍານວນ 100.000 ບາດ , ພ້ອມຢາໄອສ໌ (ice) ຈໍານວນ 06 ເປົາ ມີ 120 ຫໍ່ ນ້ໍາໜັກ 120 ກິໂລກຣາມ ເຈົ້າໜ້າທີ່ຈຶ່ງກັກຕົວພ້ອມຂອງກາງ ສົ່ງໃຫ້ພະແນກຕໍາຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງ ອຸດົມໄຊເພື່ອດໍາເນີນະດີຕາມຂັ້ນຕອນຂອງກົດໝາຍ.

ຜ່ານການສືບສວນ-ສອບສວນຂອງເຈົ້າໜ້າທີ່ ທ້າວ ບີວື ໃຫ້ການຮັບສາລະພາບວ່າ: ຢາໄອສ໌ (Ice) ຈໍານວນດັ່ງກ່າວ ທີ່ເຈົ້າຫນ້າທີ່ ກວດກາພົບເຫັນໃນວັນທີ 22 ສິງຫາ 2019 ນັ້ນແມ່ນຂອງທ້າວ ລີວາ ບໍ່ຮູ້ທີ່ຢູ່ ເຊີ່ງໄດ້ຕິດຕໍ່ພົວພັນກັນທາງໂທລະສັບວ່າໃຫ້ຕົນຂົນສົ່ງຢາໄອສ໌ຂອງຜູ້ກ່ຽວ ຈາກແຂວງ ບໍ່ແກ້ວ ໄປນະຄອນຫຼວງວຽງຈັນ ໂດຍຕົກລົງຄ່າຂົນສົ່ງ ຈໍານວນ 200.000 ບາດ, ແຕ່ຕົນຕອບວ່າບໍ່ມີລົດ ຖ້າຊອກລົດໄດ້ ຈຶງຂົນສົ່ງໃຫ້: ຫຼັງຈາກນັ້ນໄດ້ນັດໝາຍກັນໃຫ້ທ້າວ ບີວື (ຈໍາເລີຍ 1) ໄປລໍຖ້າຢູ່ທາງ ສາມແຍກເມືອງເງີນ ຫາ ເມືອງ ຄອບ, ແຂວງ ໄຊຍະບູລີ ແລ້ວຈະມີລົດມາຮັບເອົາໄປຕໍ່ຮອດນະຄອນຫຼວງວຽງຈັນ, ຮອດວັນທີ 21 ສິງຫາ 2019, ທ້າວ ບີວື  ຮູ້ວ່າ ທ້າວ ບຸນເຊັງລີ ຫຼື ຊົງປໍລີ ຄົນບ້ານດຽວກັນຈະໄປສູ່ຂັວນພີ່ນ້ອງ ຢູ່ບ້ານ ປາກແຄນ ເມືອງ ເງິນ, ແຂວງ ໄຊຍະບູລີ ຕົນຈິ່ງຂໍໄປນໍາຜູ້ກ່ຽວ ເມື່ອຂື້ນລົດມາຮອດສາມແຍກເຂດບ້ານ ຫ້ວຍຊາຍນ້ອຍ, ເມືອງ ຫ້ວຍຊາຍ ຕົນໄດ້ບອກໃຫ້ທ້າວ ບຸນເຊັງລີ ຫຼື ຊົງປໍລີ ຈອດລົດຮັບເອົາເຄື່ອງຝາກນໍາໝູ່ຈະ ເອົາໄປວຽງຈັນ, ຈາກນັ້ນ ຕົນໄດ້ລົງຈາກລົດໄປຍົກເອົາເປົາທີ່ບັນຈຸຢາໄອສ໌ຈໍານວນ 6 ເປົາ ຈາກກະບະລົດຂອງ ທ້າວ ລີວາ ມາໃສ່ກະບະລົດຂອງທ້າວ ບຸນເຊັງລີ ຫຼື ຊົງປໍລີ ແລ້ວ ພາກັນຂັບຂີ່ລົດມາຮອດເຂດບ້ານ ເເຕງວາງ, ເມືອງ ປາກແບງ ທ້າວ ລິວາ ໄດ້ໂທລະສັບບອກໃຫ້ ນໍາເອົາຢາເສບຕິດກັບຄືນ ເນື່ອງຈາກມີເຈົ້າຫນ້າທີ່ຍາມທາງ ຕົນຈິ່ງໄດ້ບອກໃຫ້ທ້າວ ບຸນເຊັງ ລີ ຫຼື ຊົງປໍລີ ຮູ້ວ່າ ເປົາ ທີ່ຕ່າງມານໍາລົດນັ້ນ ແມ່ນຢາໄອສ໌ ທີ່ຕົນໄດ້ຮັບຈ້າງຂົນສົ່ງໃຫ້ທ້າວ ລີວາ ເປັນ ຈໍານວນເງີນ 200.000 ບາດ ແລະ ຈ່າຍໃຫ້ລ່ວງໜ້າແລ້ວຈໍານວນ 100,000 ບາດ ຈາກນັ້ນຕົນໄດ້ຂໍຜູ້ກ່ຽວ ຕ່າວລົດກັບຄືນ ເພື່ອເອົາ ຢາໄອສ໌ດັ່ງກ່າວໄປຊຸກເຊື່ອງໄວ້ຢູ່ປ່າແຄມທາງ ແລະ ເອົາເງິນຈໍານວນ 100,000 ບາດ ໃຫ້ທ້າວ ບຸນເຊັງລີ ຫຼື ຊົງປໍລີ ເອົາມ້ຽນໄວ້, ຈາກ ນັ້ນໄດ້ພາກັນຂັບຂີ່ລົດກັບໄປທາງເມືອງ ຜາອຸດົມ, ແຂວງ ບໍ່ແກ້ວ ຈິ່ງຖືກເຈົ້າຫນ້າທີ່ກັກຕົວ.

ຜ່ານການຄົ້ນຄວ້າ, ກວດກາບັນດາຂໍ້ມູນຫຼັກຖານ ແລະ ເອກະສານຕ່າງໆ ທີ່ມີຢູ່ໃນສໍານວນຄະດີຢ່າງຄົບຖ້ວນ ຮອບດ້ານ ແລະ ພາວະວິໄສແລ້ວ; ເຫັນວ່າ: ຕໍ່ກັບການກະທໍາຜິດຂອງທ້າວ ບີວື ໃນຄັ້ງນີ້ເປັນການກະທໍາຜິດທາງອາຍາໃນຂໍ້ຫາການຂົນສົ່ງຢາໄອສ໌ ແລະ ມີຢາໄອສ໌ໄວ້ໃນຄອບຄອງຕາມປະມວນກົດໝາຍອາຍາ ມາດຕາ 315 ວັກສີ່, ສ່ວນທ້າວ ບຸນເຊັງລີ ຫຼື ຊົງປໍລີ ໄດ້ໃຫ້ການປະຕິເສດວ່າຕົນເອງບໍ່ຮັບຮູ້ ແລະ ບໍ່ມີສ່ວນພົວພັນກັບການຂົນສົ່ງຢາໄອສ໌ຮ່ວມກັບທ້າວ ບີວື ແຕ່ເມື່ອຮູ້ວ່າເປົາເຄື່ອງຈໍານວນ 06 ເປົາ ຢູ່ກະບະລົດທີ່ຕ່າງມານັ້ນເປັນສິ່ງເສບຕິດແລ້ວ ແຕ່ຍັງມີເຈດຕະນາໃຫ້ການຊ່ວຍເຫຼືອ, ປົກປິດການກະທໍາຜິດຂອງທ້າວ ບີວື ດ້ວຍການສົ່ງທ້າວ ບີວື (ຈໍາເລີຍ 1) ເອົາຢາໄອສ໌ຈໍານວນດັ່ງກ່າວໄປຊຸກເຊື່ອງຢູູ່ໃນປ່າ ແລະ ຮັບເອົາເງີນຈໍານວນ 100.000 ບາດ ທີ່ທ້າວ ບີວື ອ້າງວ່າແມ່ນຄ່າຈ້າງຂົນສົ່ງຢາໄອສ໌ໄວ້ໃນຕັບໂລ້ລົດອີກ, ຕໍ່ກັບການກະທໍາຂອງທ້າວ ບຸນເຊັງລີ ຫຼື ຊົງປໍລີ ໃນຄັ້ງນີ້ ເປັນການກະທໍາຜິດທາງອາຍາໃນຂໍ້ຫາ ສົມຮູ້ຮ່ວມຄິດໃນການຂົນສົ່ງຢາໄອ໌ສ ຕາມປະມວນກົດດໝາຍອາຍາ ມາດຕາ 30 ແລະ ມາດຕາ 315 ວັກ 4.

ສານໄດ້ພິຈາລະນາລົງໂທດຕັດອິດສະຫຼະພາບ  ທ້າວ ບີວື ໂທດປະຫານຊີວິດ ມີຄວາມຜິດທາງອາຍາ ຖານຂົນສົ່ງຢາໄອສ໌ (ice) ແລະ ມີຢາ ໄອສ໌ (ice) ໄວ້ໃນຄອບຄອງ ຈໍານວນໜຶ່ງຮ້ອຍຊາວ (120) ຫໍ່, ນ້ໍາໜັກ ໜຶ່ງຮ້ອຍຊາວ ກິໂລກຣາມ, ທ້າວ ບຸນເຊັງລີ ຖານສົມຮູ້ຮ່ວມຄິດໃນການຂົນສົ່ງຢາ ໄອສ໌(ice),ຄັ້ງນີ້ ຈໍາຄຸກ ສິບຫ້າປີ ແລະ ປັບໃໝ 250.000.000 ກີບ.

Off

Comments are closed.