25th Jun2021

ສະມາຄົມນັກຂ່າວແຫ່ງ ສປປ ລາວ ປຶກ ສາແຜນວຽກໃນຕໍ່ໜ້າ.

by somchan

ສະມາຄົມນັກຂ່າວແຫ່ງ ສປປ ລາວ ໄດ້ຈັດກອງປະຊຸມທົບທວນຜົນການຈັດຕັ້ງປະຕິບັດວຽກງານໃນໄລຍະຜ່ານມາ ແລະ ປຶກສາຫາລືແຜນວຽກໃນຕໍ່ໜ້າຂຶ້ນເມື່ອບໍ່ດົນມານີ້ ທີ່ນະຄອນຫຼວງວຽງຈັນ. ໂດຍການເປັນປະທານຂອງ ທ່ານ ສະຫວັນຄອນ ຣາຊມຸນຕຣີ ອະດີດຮອງລັດຖະ ມົນຕີກະຊວງຖະແຫຼງຂ່າວ, ວັດທະນະ ທຳ ແລະ ທ່ອງທ່ຽວ, ປະທານ ສະມາຄົມນັກຂ່າວແຫ່ງ ສປປ ລາວ, ມີຮອງປະທານ, ຄະນະບໍລິຫານງານ ແລະ ເລຂາທິການ ສະມາຄົມນັກຂ່າວແຫ່ງ ສປປ ລາວ ເຂົ້າຮ່ວມ.

ກອງປະຊຸມໄດ້ສັງລວມເອົາໝາກຜົນແຫ່ງການເຄື່ອນໄຫວທີ່ພົ້ນເດັ່ນໃນຫຼາຍດ້ານ ໂດຍພາຍໃຕ້ການນຳພາ ຊີ້ນຳຂອງຄະນະປະຈຳພັກ-ຄະນະນຳກະຊວງ ຖະແຫຼ່ງຂ່າວ ວັດທະນະທຳ ແລະ ທ່ອງທ່ຽວ ບວກກັບການເຄື່ອນໄຫວຂອງຄະນະນຳ ສະມາຄົມນັກຂ່າວແຫ່ງ ສປປ ລາວ ແລະ ຖັນແຖວນັກຂ່າວທົ່ວປະເທດ ແລະ ໄດ້ຮັບການສະໜັບສະໜູນ, ອຸປະຖຳ ແລະ ຊ່ວຍເຫຼືອອັນລ້ຳຄ່າຫຼາຍດ້ານຈາກການຈັດຕັ້ງທີ່ກ່ຽວຂ້ອງ, ຂະແໜງການທ້ອງຖິ່ນທັງພາກລັດ-ເອກະຊົນ ຈຶ່ງສາ ມາດຍາດໄດ້ຜົນງານໃນຫຼາຍດ້ານ ເປັນຕົ້ນໄດ້ຈັດການຝຶກອົບຮົມ, ຖະແຫຼງຂ່າວ, ພົບປະກັບອົງການຈັດຕັ້ງລັດ-ສັງຄົມ, ບໍລິສັດ, ພາກທຸລະກິດ ແລະ ພາກສ່ວນຕ່າງໆ, ໃນນີ້ໄດ້ເຂົ້າຮ່ວມບາງໂຄງການທີ່ຕິດພັນກັບ ສະມາຄົມນັກຂ່າວແຫ່ງ ສປປ ລາວ, ສ້າງກິດຈະກຳຕ່າງໆ, ທັດສະນະສຶກສາຢູ່ພາຍໃນ ແລະ ຕ່າງປະເທດ, ການຮ່ວມມືກັບອົງການຂ່າວ- ສະມາຄົມນັກຂ່າວຂອງບັນດາປະເທດເພື່ອນມິດ ບົນແນວທາງການຕ່າງປະເທດຂອງພັກ, ລັດຖະບານ ແລະ ບັນຫາອື່ນໆທີ່ຕິດພັນກັບພາລະບົດບາດໜ້າທີ່ຂອງ ສະມາຄົມນັກຂ່າວແຫ່ງ ສປປ ລາວ.

ທ່ານ ສະຫວັນຄອນ ຣາຊມຸນຕຣີ ໄດ້ ເໜັ້ນໝັກ ແລະ ເລຂາທິການ ສະມາຄົມນັກຂ່າວແຫ່ງ ສປປ ລາວ ຈະຕ້ອງສຸມໃສ່ໃນການສ້າງຂະ ບວນການຂໍ່ານັບຮັບຕ້ອນວັນສ້າງຕັ້ງສື່ມວນຊົນ ແລະ ພິມຈຳໜ່າຍທີ່ຈະໝູນວຽກມາບັນຈົບຄົບຮອບ 71 ປີ ໃນວັນທີ 13 ສິງຫາ 2021 ແລະ ການກະກຽມຄວາມພ້ອມຮອບດ້ານກ່ຽວກັບແຜນຈັດກອງປະຊຸມ ສຂລ ທົ່ວປະເທດທີ່ກຳລັງຈະນຳສະເໜີຜ່ານການນຳກະຊວງ ຖະແຫຼ່ງຂ່າວ ວັດທະນະທຳ ແລະ ທ່ອງທ່ຽວ ເພື່ອພິຈາລະນາໃນຕໍ່ໜ້າ, ຂະນະດຽວກັນກໍກະກຽມຮ່າງລາຍງານເມືອງ-ແຜນການດຳເນີນງານ, ເລືອກເຟັ້ນບຸກຄະລາກອນທີ່ຈະສະໝັກເຂົ້າໃນໂຄງປະກອບຄະນະບໍລິຫານງານຊຸດໃໝ່, ເພີ່ມການພົວພັນຮ່ວມມືລະ ຫວ່າງພະນັກງານດ້ວຍກັນ, ລະຫວ່າງ ສະມາຄົມນັກຂ່າວແຫ່ງ ສປປ ລາວ ກັບພາກສ່ວນກ່ຽວຂ້ອງ ລວມທັງການຮ່ວມມືກັບບັນດາສະມາຄົມນັກຂ່າວປະເທດເພື່ອນມິດ ແລະ ປະເທດໃກ້ຄຽງ ລວມທັງອາຊຽນ ແລະ ສາກົນ ຕາມການຕົກລົງຂອງຂັ້ນເທິງ.

Off

Comments are closed.