25th Jun2021

ປກສ​ ແຂວງບໍລິຄໍາໄຊ​ ເຊື່ອມຊຶມມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກ

by somchan

​ວັນທີ​ 24​ ມິຖຸນາ​ 2021 ​ນີ້,​ ຢູ່ທີ່ຫ້ອງປະຊຸມ ກອງບັນຊາການ​ ປກສ​ ແຂວງ ບໍລິຄຳໄຊ​ ໄດ້ຈັດຕັ້ງເຊື່ອມຊຶມ​ ແລະ ​ຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກປະຊາຊົນປະຕິວັດລາວ ແລະ​ ເອກະສານສໍາຄັນຕ່າງໆ ໂດຍການເປັນປະທານຂອງ ​ ພັອ​​ ກົງຈັນ​ ໄຊ​ປັນຍາ​ ກຳມະການພັກແຂວງ,​ ເລຂາຄະນະພັກ,​ ຫົວໜ້າກອງບັນຊາການ​ ປກສ​ ແຂວງ, ມີ​ຄະນະພັກ,​ ຄະນະກອງ​ບັນຊາການ, ຄະນະຫ້ອງ, ກອງ, ຄ້າຍຄຸມຂັງດັດສ້າງ, ໂຮງຮຽນ ປກສ ຊັ້ນຕົ້ນເລກ 4 , ຕະຫຼອດຮອດພະນັກງານ-ສະມາຊິກພັກຂັ້ນນໍາພາ-ບັນຊາເຂົ້າຮ່ວມ.

​ ພັອ​ ກົງຈັນ​ ໄຊ​ປັນຍາ   ຫົວໜ້າກອງບັນຊາການ​ ປກສ​ ແຂວງ ໄດ້ຍົກໃຫ້ເຫັນເນື້ອໃນການຜັນຂະຫຍາຍມະຕິ ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກປະຊາຊົນປະຕິວັດລາວ ພາຍໃຕ້ຄຳຂວັນ “ຍົກສູງຄວາມສາມາດນໍາພາຂອງພັກ, ເພີ່ມທະວີຄວາມສາມັກຄີ ເປັນປຶກແຜ່ນຂອງປະຊາຊົນໃນຊາດ, ຮັບປະກັນສະຖຽນລະພາບ ດ້ານການເມືອງ ຢ່າງໜັກແໜ້ນ, ຜັນຂະຫຍາຍແນວທາງປ່ຽນແປງໃໝ່ສູ່ລວງເລິກ, ສ້າງການຫັນປ່ຽນການພັດທະນາເສດຖະກິດ-ສັງຄົມໄປສູ່ຄຸນນະພາບໃໝ່ຢ່າງແຂງແຮງ, ຍົກລະດັບຄຸນນະພາບຊີວິດຂອງປະຊາຊົນໃຫ້ສູງຂຶ້ນ, ສືບຕໍ່ນໍາພາປະເທດຊາດລຸດພົ້ນຈາກສະຖານະພາບດ້ອຍພັດທະນາ ແລະ ກ້າວສູ່ຈຸດໝາຍສັງຄົມນິຍົມ, ແມ່ນຂິດໝາຍແຫ່ງການເຕີບໃຫຍ່ຂະຫຍາຍຕົວຂອງພັກເຮົາ, ແມ່ນບັ້ນດໍາເນີນຊິວິດການເມືອງຂອງພັກ ເພື່ອສ້າງການຫັນປ່ຽນຢ່າງແຂງແຮງ ແລະ ເປັນລະບົບໂດຍເລີ່ມຈາກການຫັນປ່ຽນແນວຄິດ ແລະ ຈິນຕະນາການ ສູ່ການກະທໍາຕົວຈິງ ເພື່ອແກ້ໄຂບັນຫາຈຸດອ່ອນ ແລະ ບັນຫາທີ່ຍັງຄ້າງຄາໃຫ້ມີການປ່ຽນແປງໃໝ່ຢ່າງແຂງແຮງ ເລີກເຊິງ ແລະ ຮອບດ້ານ, ແນ່ໃສ່ຍົກສູງບົດບາດຄວາມສາມາດ ໃນການນໍາພາ ແລະ ຄວາມເປັນແບບຢ່າງນໍາໜ້າຂອງພັກ, ເພີ່ມທະວີຄວາມເປັນປຶກແຜ່ນຂອງປະຊາຊົນ ພາຍໃນຊາດ, ເດັດດ່ຽວປົກປັກຮັກສາພັດທະນາປະເທດຊາດ ສູ່ຈຸດໝາຍສັງຄົມນີຍົມ. ສ່ວນຄາດໝາຍສູ້ຊົນໃນໄລຍະ 5 ປີຕໍ່ໜ້າ, ພັກເຮົາຈະສືບຕໍ່ບູລະນະລະບອບປະຊາທິປະໄຕປະຊາຊົນໃຫ້ສົມບູນຍິ່ງຂຶ້ນ, ສ້າງການຫັນປ່ຽນຢ່າງແຂງແຮງເລິກເຊິ່ງ ແລະ ຮອບດ້ານ ເພື່ອກ້າວສູ່ຈຸດໝາຍສັງຄົມນິຍົມ, ຍົກສູງຄຸນນະພາບການຊີ້ນໍາ-ນໍາພາ, ເດັດດ່ຽວແກ້ໄຂຈຸດອ່ອນ, ຂໍ້ຄົງຄ້າງພາຍໃນພັກ, ຮັບປະກັນບົດບາດການເຄື່ອນໄຫວນຳພາຕົວຈິງ ທີ່ເຂັ້ມແຂງຂອງການຈັດຕັ້ງທຸກຂັ້ນ, ເພີ່ມທະວີການຮັກສາສະຖຽນລະພາບດ້ານການເມືອງ, ຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມ, ເສີມຂະຫຍາຍທຸກຄວາມອາດສາມາດ ແລະ ທ່າແຮງບົ່ມຊ້ອນ, ສ້າງຖານການຜະລິດ ແລະ ບໍລິການໃຫ້ເຂັ້ມແຂງ, ຮັບປະກັນການພັດທະນາແບບຍືນຍົງ ແລະ ເປັນເຈົ້າຕົນເອງ, ສ້າງສັງຄົມທີ່ປະຊາຊົນເປັນເຈົ້າ, ມີປະຊາທິປະໄຕ, ມີສິດສະເໝີພາບ ແລະ ຍຸຕິທຳ, ປັບປຸງລະບົບການຈັດຕັ້ງ, ກົງຈັກ ແລະ ກົນໄກເຄື່ອນໄຫວ ຂອງບັນດາອົງການອຳນາດລັດໃຫ້ແຂງແຮງ ແລະ ມີປະສິດທິພາບ, ເພີ່ມທະວີສາຍພົວພັນການຮ່ວມມືກັບຕ່າງປະເທດ ຢ່າງແຂງແຮງ.

ຈາກນັ້ນ ພັອ ຜາຂົງ ດອກມະນີຈັນ  ຮອງເລຂາຄະນະພັກ, ຮອງຫົວໜ້າກອງບັນຊາການ ປກສ ແຂວງ ຍັງໄດ້ ຜ່ານມະຕິ ວ່າດ້ວຍການຍົກສູງຄຸນນະພາບທາງດ້ານການເມືອງ-ແນວຄິດໃນໄລຍະໃໝ່,  ທັງນີ້ກໍ່ເພື່ອເຮັດໃຫ້ພະນັກງານນໍາພາ-ບັນຊາ, ພະນັກງານນັກຮົບ ມີການເມືອງ-ແນວຄິດໜັກແໜ້ນ, ມີຄວາມອຸ່ນອ່ຽນທຸ່ນທ່ຽງ, ມີຄຸນສົມບັດສີນທໍາປະຕິວັດ, ມີຈັນຍາບັນ, ຈັນຍາທໍາ ແລະ ໄດ້ຮັບຮູ້, ເຊື່ອມຊືມ, ກໍາແໜ້ນມະຕິ XI ຂອງພັກ ພ້ອມທັງນຳໄປຈັດຕັ້ງຜັນຂະຫຍາຍ ເຂົ້າໃນໜ້າທີ່ວຽກງານຂົງເຂດທີ່ຕົນຮັບຜິດຊອບ ໃຫ້ປະກົດຜົນເປັນຈິງ.

 

Off

Comments are closed.