28th Jun2021

ກອງປະຊຸມທາງໄກ ເພື່ອປຶກສາຫາລືດ້ານວຽກງານຮັກສາຄວາມຫມັ້ນຄົງ ລະຫວ່າງອາຊຽນ ແລະ ຣັດເຊຍ

by somchan

ກອງປະຊຸມທາງໄກ ເພື່ອປຶກສາຫາລືສຳລັບເຈົ້າຫນ້າທີ່ລະດັບສູງ ດ້ານວຽກງານຮັກສາຄວາມຫມັ້ນຄົງ ລະຫວ່າງອາຊຽນ ແລະ ຣັດເຊຍໄດ້ຈັດໃນວັນທີ 28 ມີຖຸນາ 2021, ທີ່ກະຊວງປ້ອງກັນຄວາມສະຫງົບ, ໂດຍການເຂົ້າຮ່ວມຂອງ ພົທ ວິໄລ ຫລ້າຄຳຟອງ ລັດຖະມັນຕີກະຊວງ ປ້ອງກັນຄວາມສະຫງົບ ແຫ່ງ ສປປ ລາວ, ມີເລຂາທິການສະພາຄວາມຫມັ້ນຄົງ ແຫ່ງສະຫະພັນ ລັດເຊຍ, ພ້ອມດ້ວຍບັນດາເຈົ້າຫນ້າທີ່ລະດັບສູງຮັບຜິດຊອບວຽກງານຮັກສາຄວາມຫມັ້ນຄົງຂອງປະເທດສະມາຊິກອາຊຽນ 10 ປະເທດເຂົ້າຮ່ວມ.

ໃນກອງປະຊຸມ ທ່ານ ນິໂກລາຍ ປາຕຣູເຊບ ເລຂາທິການສະພາຄວາມຫມັ້ນຄົງ ແຫ່ງສະຫະພັນ ຣັດເຊຍ ໄດ້ກ່າວເປີດກອງປະຊຸມຢ່າງເປັນທາງການ, ແລະ ໄດ້ພັດປ່ຽນກັນລາຍງານໂດຍຫຍໍ້ກ່ຽວກັບການຮ່ວມມືດ້ານຄວາມຫມັ້ນຄົງ ອາຊຽນ- ຣັດເຊຍ, ການແລກປ່ຽນທັດສະນະກ່ຽວກັບວຽກງານການເມືອງ ແລະ ຄວາມຫມັ້ນຄົງ ໃນຂົງເຂດພາກພື້ນອາຊີ-ປາຊີຟິກ ແລະ ບັນດາສິ່ງທ້າທາຍຕ່າງໆ.

ໂອກາດດັ່ງກ່າວ ພົທ ວິໄລ ຫລ້າຄຳຟອງ ລັດຖະມົນຕີກະຊວງປ້ອງກັນຄວາມສະຫງົບ ສປປ ລາວ ໄດ້ກ່າວຕໍ່ກອງປະຊຸມວ່າ: ໃນສະພາບທີ່ມີການເຊື່ອມໂຍງກັນຫຼາຍ ຂຶ້ນໃນລະດັບພາກພື້ນ ແລະ ສາກົນ ໄດ້ມີຫຼາຍເຫດການເກີດຂຶ້ນ ແລະ ຜັນແປໄປຢ່າງສະຫຼັບສັບຊ້ອນ ເປັນຕົ້ນແມ່ນ ຂໍ້ຄັດແຍ່ງ, ການກໍ່ການຮ້າຍ, ອາຊະຍາກໍາຂ້າມຊາດ, ຄວາມທຸກຍາກ, ພະຍາດລະບາດ, ໄພທຳມະຊາດ ແລະ ອື່ນໆ ທີ່ເປັນໄພຂົ່ມຂູ່ຕໍ່ສະຖຽນລະພາບ, ຄວາມໝັ້ນຄົງ ແລະ ການພັດທະນາເສດຖະກິດສັງຄົມ ໃນພາກພື້ນ. ອັນພົ້ນເດັ່ນ ແມ່ນການລະບາດຂອງ ພະຍາດ ໂຄວິດ 19, ຊຶ່ງພາກພື້ນອາຊີ-ປາຊີຟິກ ກໍ່ເປັນພາກພື້ນໜຶ່ງທີ່ໄດ້ຮັບຜົນກະທົບ ຈາກການແຜ່ ລະບາດຂອງເຊື້ອພະຍາດດັ່ງກ່າວ, ເຮັດໃຫ້ມີຜູ້ຕິດເຊື້ອ ແລະ ເສຍຊີວິດເປັນຈຳນວນຫຼວງຫຼາຍ, ສົ່ງຜົນ ສະທ້ອນຢ່າງໜັກໜ່ວງຕໍ່ເສດຖະກິດ ແລະ ຊີວິດການເປັນຢູ່ຂອງປະຊາຊົນໃນຫຼາຍປະເທດ.

ບັນຫາອາຊະຍາກຳຂ້າມຊາດ ກໍ່ເປັນບັນຫາໜຶ່ງທີ່ຍັງສືບຕໍ່ເປັນໄພຄຸກຄາມຕໍ່ສະຖຽນລະພາບ ແລະ ຄວາມໝັ້ນຄົງຂອງພາກພື້ນ ເປັນຕົ້ນແມ່ນ ອາຊະຍາກຳທາງຄອມພິວເຕີ, ການຄ້າຂາຍຢາເສບຕິດ, ການຄ້າມະນຸດ, ການໂຈລະກໍາ ແລະ ອື່ນໆ, ດ້ານບັນຫາອາຊະຍາກໍາໄດ້ມີການສວຍໂອກາດນຳໃຊ້ເຕັກໂນໂລຊີທີ່ກ້າວໜ້າເຂົ້າໃນການເຄື່ອນໄຫວກະທຳຜິດ ເປັນຕົ້ນແມ່ນການໂຈມຕີລະບົບເຄືອຂ່າຍຄອມພິວເຕີຂອງ ພາກລັດ ແລະ ເອກະຊົນຢູ່ຫຼາຍປະເທດ ໃນພາກພື້ນ ແລະ ໃນໂລກ, ພ້ອມກັນນັ້ນ ກໍ່ນຳໃຊ້ລະບົບເຄືອ ຂ່າຍອີນເຕີເນັດເພື່ອຫຼອກລວງ, ສໍ້ໂກງຊັບປະຊາຊົນ, ຄ້າຂາຍສິ່ງຜິດກົດໝາຍ ແລະ ຂົນຂວາຍປະຊາຊົນ ເຂົ້າຮ່ວມຂະບວນການກໍ່ການຮ້າຍ ແລະ ອື່ນໆ, ນອກນັ້ນ ບັນຫາການລັກລອບຜະລິດ, ຂົນສົ່ງ, ຄ້າຂາຍ ຢາເສບຕິດ ແລະ ສານເຄມີທີ່ນໍາໃຊ້ເຂົ້າໃນການ ຜະລິດຢາເສບຕິດ ກໍ່ເປັນບັນຫາໜຶ່ງ ທີ່ເປັນອັນຕະລາຍຕໍ່ຄວາມສະຫງົບ ແລະ ຄວາມໝັ້ນຄົງຂອງ ພາກພື້ນ. ພວກຄ້າຂາຍຢາເສບຕິດ ໄດ້ນໍາໃຊ້ອຸປະກອນ ແລະ ວິທີການອັນໃໝ່ຢູ່ເລື້ອຍໆເຂົ້າໃນການ ເຄື່ອນໄຫວຂອງພວກເຂົາ ເພື່ອຫຼົບຫຼີກການກວດຄົ້ນ ແລະ ຈັບກຸ່ມຂອງເຈົ້າໜ້າທີ່; ປະຊາຊົນຈໍານວນບໍ່ ໜ້ອຍໄດ້ຕົກເປັນທາດຂອງຢາເສບຕິດ ເຮັດໃຫ້ມີຜົນກະທົບຢ່າງໜັກໜ່ວງ ຕໍ່ຄວາມສະຫງົບ ແລະ ຄວາມ ເປັນລະບຽບຮຽບຮ້ອຍໃນສັງຄົມ. ບັນຫາເຫຼົ່ານີ້ ເປັນບັນຫາຂ້າມຊາດ ແລະ ສະຫຼັບສັບຊ້ອນ ຍາກທີ່ ປະເທດໃດປະເທດໜຶ່ງຈະແກ້ໄຂໄດ້ດ້ວຍຕົວເອງ, ຍ້ອນແນວນັ້ນ, ຈິ່ງມີຄວາມສໍາຄັນ ແລະ ຈຳເປັນທີ່ສຸດ ທີ່ຈະຕ້ອງມີກົນໄກທີ່ມີປະສິດທິພາບ ໃນການປຶກສາຫາລື ແລະ ຮ່ວມມືກັນຢ່າງໃກ້ຊິດ ແກ້ໄຂໄພຂົ່ມຂູ່ ຕ່າງໆຢ່າງທັນການ.

ເຊິ່ງກອງປະຊຸມປຶກສາຫາລືສຳລັບເຈົ້າຫນ້າທີ່ລະດັບສູງ ດ້ານວຽກງານຮັກສາຄວາມຫມັ້ນຄົງ ລະຫວ່າງອາຊຽນ ແລະ ຣັດເຊຍ ຈະເປັນອີກຊ່ອງທາງຫນື່ງທີ່ສຳຄັນ ສຳລັບແລກປ່ຽນທັດສະນະ,ບົດຮຽນ ແລະ ປະສົບການ ທີ່ພົວພັນເຖີງຄວາມສະຫງົບ ແລະ ຄວາມຫມັ້ນຄົງໃນພາກພື້ນແລະສາກົນ .

Off

Comments are closed.