28th Jun2021

ປະຊຸມສະຫຼຸບການຈັດຕັ້ງປະຕິບັດໂຄງການສ້າງຄວາມເຂັ້ມແຂງ ໃຫ້ເເກ່ລະບົບການບໍລິການເລືອດຢູ່ພື້ນທີ່ຄັດເລືອກຢູ່ ສປປ ລາວ

by somchan

ໃນວັນທີ 28 ມີຖຸນາ 2021 ທີ່ສູນເລືອດແຫ່ງຊາດ ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດໂຄງການສ້າງຄວາມເຂັ້ມແຂງ ໃຫ້ເເກ່ລະບົບການບໍລິການເລືອດຢູ່ພື້ນທີ່ຄັດເລືອກຢູ່ ສປປ ລາວ ເປັນກຽດເຂົ້າຮ່ວມໂດຍທ່ານ ຮອງສາສະດາຈານ ດຣ. ພູທອນ ເມືອງປາກ ປະທານອົງການກາແດງລາວ, ມີທ່ານ ເຈນ ລຸກເກີນແຮມ ເອກອັກຄະລັດຖະທູດເຢຍລະມັນ ປະຈໍາລາວ, ມີຄະນະພັກ, ຄະນະກົມ, ຜູ້ຕາງໜ້າອົງການ, ພ້ອມດ້ວຍພະນັກງານຈາກພາກສ່ວນທີ່ກຽ່ວຂ້ອງເຂົ້າຮ່ວມ.

ທ່ານ ຮອງສາສະດາຈານ ດຣ. ພູທອນ ເມືອງປາກ ກ່າວວ່າ: ກອງປະຊຸມສະຫຼຸບການຈັດຕັ້ງປະຕິບັດໂຄງການສ້າງຄວາມເຂັ້ມແຂງໃຫ້ ເເກ່ລະບົບການບໍລິການເລືອດຢູ່ພື້ນທີ່ຄັດເລືອກຢູ່ ສປປ ລາວ, ທີ່ໄດ້ຮັບການສະຫນັບສະຫນູນທຶນ ໂດຍລັດຖະບານເຢຍລະມັນ ຜ່ານກາແດງເຢຍລະມັນ ໃນໄລຍະຜ່ານມາ ແມ່ນໄດ້ແບ່ງອອກເປັນ 3 ໄລຍະ ຄື: ໄລຍະທີ 1 ແຕ່ປີ 2007 ຫາ ປີ 2014 ໃນງົບປະມານ 901.318 ເອີໂຣ; ໄລຍະທີ 2 ແຕ່ປີ 2015 ຫາ ປີ 2017 ໃນງົບປະມານ 900.760 ເອີໂຣ ແລະ ໄລຍະທີ 3 ແມ່ນແຕ່ ປີ 2018 ຫາ ປີ 2021 ໃນງົບປະມານ 1.407.099 ເອີໂຣ, ລວມທັງຫມົດການຊ່ວຍເຫລືອສະຫນັບສະຫນູນໃນ 3ໄລຍະແມ່ນ 3.209.177 ເອີໂຣ. ໃນນີ້ ຕະຫຼອດໄລຍະການຈັດຕັ້ງປະຕິບັດໃນໄລຍະຜ່ານມາ ສາມາດຕີລາຄາສູງ ກໍ່ການຊ່ວຍເຫລືອດັ່ງກ່າວ ມີລັກສະນະຍາວນານ, ຕໍ່ເນື່ອງ, ມີຄວາມຈິງໃຈ ແລະ ມີປະສົບຜົນສໍາເລັດເປັນທີ່ຫນ້າເພິ່ງພໍໃຈ, ເຫັນໄດ້ບັນດາຕົວຊີ້ວັດທີ່ຖືກກໍານົດໄວ້ແມ່ນບັນລຸຕາມຄາດຫມາຍທີ່ວາງໄວ້. ເຮັດໃຫ້ວຽກງານເລືອດຂອງ ສປປ ລາວ ຢູ່ໃນລະດັບ ສູນເລືອດແຫ່ງຊາດ, ສູນເລືອດແຂວງ 17 ແຂວງ ແລະ ຫນ່ວຍເກັບຮັກສາເລືອດຂັ້ນເມືອງ 30 ເມືອງ ໄດ້ຮັບການປັບປຸງ ໄດ້ຮັບການພັດທະນາໃຫ້ມີຄວາມເຂັ້ມແຂງທາງດ້ານວິຊາການ ໂດຍຜ່ານການອົບຮົມ ໃຫ້ຄວາມຮູ້ທາງດ້ານເຕັກນິກຖືກຕາມຫລັກການຂອງອົງການອານາໄມໂລກ ແລະ ທັງມີຄວາມເຂັ້ມແຂງທາງດ້ານໂຄງຮ່າງພື້ນຖານ ອາຄານໃຫ້ແກ່ສູນເລືອດແຂວງ, ປະກອບອຸປະກອນການແພດໃນທຸກລະດັບ, ປະກອບພາຫະນະລົດຕູ້ສໍາລັບອອກຮັບບໍລິຈາກເລືອດໃຫ້ແກ່ສູນເລືອດແຫ່ງຊາດ, ແລະ ສູນເລືອດແຂວງ, ລົດຈັກສໍາລັບເຄື່ອນໄຫວວຽກງານໃຫ້ແກ່ຫນ່ວຍເກັບຮັກສາເລືອດຂັ້ນເມືອງ, ສ້າງລະບົບຕາຫນ່າງການບໍລິການໃຫ້ເປັນລະບົບນັບແຕ່ສູນກາງ ຫາ ຂັ້ນເມືອງ, ໃນຕະຫລອດໄລຍະ 15 ປີ ທີ່ຜ່ານມາ ເຫັນວ່າໄດ້ມີຜູ້ໄດ້ຮັບຜົນປະໂຫຍດ ເຊິ່ງແມ່ນ ຄົນເຈັບຜູ້ໄດ້ຮັບເລືອດເປັນຈໍານວນຫລວງຫລາຍ.

ພ້ອມນີ້້ ທ່ານ ຍັງໃຫ້ຮູ້ຕື່ມອີກວ່າ: ວຽກງານປູກລະດົມເລືອດສະຫນອງ ເລືອດທີ່ປອດໄພ ຖືວ່າເປັນວຽກງານຫນຶ່ງທີ່ຂາດບໍ່ໄດ້ຢູ່ລະບົບການບໍລິການສາທາລະນະສຸກຢູ່ໃນແຕ່ລະປະເທດໃນທົ່ວໂລກ, ເປັນການຕອບສະຫນອງເລືອດເພື່ອຊ່ວຍກອບກູ້ເອົາຊີວິດຂອງຄົນເຈັບທີ່ຕ້ອງການເລືອດເຂົ້າໃນການປິ່ນປົວ ໂດຍການປຸກລະດົມການບໍລິຈາກເລືອດແບບສະຫມັກໃຈບໍ່ຮຽກຮ້ອງສິ່ງຕອບແທນ, ການຄັດເລືອກຜູ້ບໍລິຈາກເລືອດ, ການເຈາະເກັບເລືອດ, ການກວດວິເຄາະ, ການແຍກສ່ວນປະກອບຂອງເລືອດ, ເກັບຮັກສາເລືອດ-ສ່ວນປະກອບຂອງເລືອດໃນອູນະພູມທີ່ເຫມາະສົມແລະການແຈກຈ່າຍເລືອດ ໃນຄົນເຈັບໃນໂຮງຫມໍຕ່າງໆໃນທົ່ວປະເທດ. ສະນັ້ນ ເລືອດແມ່ນມີຄວາມສໍາຄັນຕໍ່ຊີວິດ, ຂາດບໍ່ໄດ້, ຂາດເລືອດກໍ່ຄືຂາດຊີວິດ, ບໍ່ມີສິ່ງອື່ນໃດມາທົດແທນໄດ້, ບໍ່ມີໂຮງງານ ຫຼື ວິທີການອັນໃດ ທີ່ຈະຜະລິດເລືອດໄດ້ເທື່ອ ນອກຈາກເລືອດຂອງຄົນເຮົາ ທີ່ບໍລິຈາກໃຫ້ແກ່ກັນ ແລະ ກັນ, ເລືອດ ແລະ ຜະລິດຕະພັນເລືອດ ທີ່ໄດ້ຮັບຈາກຜູ້ບໍລິຈາກເປັນປັດໃຈສໍາຄັນໃນການພັດທະນາຄຸນນະພາບຊີວິດຂອງແມ່ຍິງຖືພາ ແລະ ເດັກນ້ອຍ, ຊ່ວຍໃຫ້ແມ່ປອດໄພຈາກການເກີດລູກຜິດປົກກະຕິ, ເດັກທີ່ເປັນພະຍາດເລືອດຈາງຮ້າຍແຮງ, ຄົນເຈັບມີຄວາມຜິດປົກກະຕິ, ພູມຄຸ້ມກັນບົກຜ່ອງ, ມະເຮັງ, ໄຂ່ຫຼັງຊຸດໂຊມ, ໄຂ້ເລືອດອອກ, ໄຂ້ມາລາເລຍ, ອຸປະຕິເຫດສຸກເສີນ ຫຼືການຜ່າຕັດທີ່ສູນເສຍເລືອດຫຼາຍ ແລະ ອື່ນໆ.

Off

Comments are closed.