30th Jun2021

ແຂວງ ອັດຕະປື ສະຫລຸບວຽກງານຕ້ານການຄ້າມະນຸດ ປີ 2020

by somchan

ວັນທີ​ 29​ ມິຖຸນາ​ 2021​, ​ແຂວງອັດຕະປື​ ໄດ້ສະຫລຸບຕີລາຄາການຈັດຕັ້ງປະຕິບັດວຽກງານ ຕ້ານການຄ້າມະນຸດ ປະຈໍາປີ​ 2020​

ບັນຫາການການຄ້າມະນຸດ​ ຍັງໄດ້ສ້າງຄວາມເສຍຫາຍໂດຍກົງຕໍ່ຊີວິດ ສຸຂະພາບ,​ ຮ່າງກາຍ,​ຈິດໃຈ,​ ກຽດສັກສີຂອງມະນຸດ ປັດຈຸບັນຢູ່ປະເທດລາວເຮົາ ໄດ້ມີຊາວໜຸ່ມ, ​ແມ່ຍິງ​ ແລະ​ ເດັກນ້ອຍ​ ຈໍານວນໜື່ງໄດ້ຖືກຕົວະຍົວະຫລອກລວງ ໂດຍມີນາຍໜ້າ ຫລື ໃຊ້ສັງຄົມອອນລາຍ​ ເພື່ອໂຄສະນາຂົນຂວາຍເອົາແມ່ຍິງລາວ ໄປອອກແຮງງານ,​ໄປທ່ອງທ່ຽວ,​ໄປແຕ່ງດອງກັບຄົນຕ່າງປະເທດດ້ວຍຮູບການຫມັ້ນຫມາຍ ວາງຄ່າດອງ​ ແລ້ວແລ່ນເອກະສານໄປຕ່າງປະເທດ ແລະ ອີກຈໍານວນໜື່ງ ແມ່ນໂຄສະນາດຶງດູດເອົາແມ່ຍິງລາວ​ ແລະ​ ຊາວຕ່າງປະເທດເຂົ້າມາເປັນສາວບໍລິການ ຕາມສະຖານທີ່ບໍລິການຕ່າງໆ.​ ຕະຫລອດໄລຍະ​ 1​ ປີຜ່ານມາ ຄະນະກໍາມະການຕ້ານການຄ້າມະນຸດ ​ແຂວງອັດຕະປື​ ໄດ້ສຸມໃສ່ເຮັດວຽກງານປ້ອງກັນສະກັດກັ້ນ​ ແລະ​ ຕ້ານການຄ້າມະນຸດ​ ໂດຍສຸມໃສ່ໂຄສະນາ​ ແລະ​ ປູກຈິດສໍານຶກ ໃຫ້ທົ່ວສັງຄົມເຫັນໄດ້ຄວາມສໍາຄັນ​ ແລະ ເຂົ້າຮ່ວມໃນວຽກງານຕ້ານການຄ້າມະນຸດຢ່າງກວ້າງຂວາງ, ໃນນີ້, ວຽກງານການດໍາເນີນຄະດີ​ ແລະ​ ບັງຄັບໃຊ້ກົດໝາຍທາງເຈົ້າໜ້າທີ່ຕໍາຫລວດສະກັດກັ້ນ​ ແລະ ຕ້ານການຄ້າມະນຸດ ປກສ​ ແຂວງ​ ໄດ້ຈັດຕັ້ງປະຕິບັດແຜນການແກ້ໄຂການຄ້າມະນຸດ,​ ຄ້າໂສເພນີ,​ ເປັນໂສເພນີ​ ຕາມແຜນການຂອງກົມໃຫຍ່ຕໍາຫລວດ​ ໂດຍໄດ້ຂຶ້ນບັນຊີເປົ້າໝາຍຄ້າມະນຸດ,​ ຄ້າໂສເພນີ​ ແລະ ເປັນໂສເພນີ​ ໃນທົ່ວແຂວງໄດ້ຈໍານວນ 15 ຄັ້ງ, ພົບເຫັນເປົ້າໝາຍຄ້າມະນຸດ 2​ ຄົນ,​ ຄ້າໂສເພນີ​ 45​ ຄົນ,​ ຍິງ​ 31​ ຄົນ, ​ຄົນຕ່າງປະເທດ 7​ ຄົນ, ​ເປັນໂສເພນີ​ 221 ຄົນ,​ ຕ່າງປະເທດ 15​ ຄົນ,; ພ້ອມນີ້ ໄດ້ລົງແກ້ໄຂເລີກຮື້ເປົ້າໝາຍ ຄ້າໂສເພນີ,​ ເປັນໂສເພນີ ​ 7​ ຄັ້ງ,​ ກັກເປົ້າໝາຍໄດ້ 39 ຄົນ,​ ຍິງ​ 37 ຄົນ, ​ຕ່າງປະເທດມີ 12​ ຄົນ,​ ໄດ້ສຶກສາອົບຮົມໃຫ້ພວກກ່ຽວຢຸດເຊົາ​ ພ້ອມທັງໄດ້ແນະນໍາໃຫ້ກັບບ້ານ ຈໍານວນ​ 39 ຄົນ.

ກອງປະຊຸມ ບັນດາຄະນະກໍາມະການຕ້ານການ ຄ້າມະນຸດທີ່ມາຈາກແຕ່ລະພະແນກການກ່ຽວຂ້ອງ ຂອງ ແຂວງ​ ຍັງໄດ້ສຸມໃສ່ປະກອບຄໍາເຫັນໃສ່ບົດສະຫລຸບ​ ແລະ​ ທິດທາງແຜນການ ເພື່ອເຮັດໃຫ້ວຽກງານຕ້ານ ການຄ້າມະນຸດ​ພາຍໃນແຂວງອັດຕະປື ໃນປີ 2021​ ໄດ້ຮັບການຈັດຕັ້ງປະຕິບັດຢ່າງມີປະສິດທິຜົນ.

 

Off

Comments are closed.