04th Feb2014

ລາວ-ມຽນມາສືບຕໍ່ຮ່ວມມືຮັກສາຄວາມສະ ຫງົບ

by somchan

ໂດຍຕອບສະໜອງຕາມຄຳເຊີນຂອງພະນະທ່ານ ພົທ ໂກໂກ ລັດຖະມົນຕີວ່າການກະຊວງພາຍໃນ ແຫ່ງສາທາລະນະລັດ ສະຫະພາບມຽນມາ ໃນລະຫວ່າງວັນທີ 26-29 ມັງກອນ 2014, ຄະນະຜູ້ແທນຂັ້ນສູງກະຊວງປ້ອງກັນຄວາມສະຫງົບ ແຫ່ງ ສປປລາວ ນຳໂດຍທ່ານ ດຣ ທອງບັນ ແສງອາພອນ ເລຂາທິການສູນກາງພັກ ລັດຖະມົນຕີວ່າການກະຊວງປ້ອງກັນຄວາມສະຫງົບ ແຫ່ງສປປລາວ ໄດ້ເດີນທາງໄປຢ້ຽມຢາມ ສັນທະວະໄມຕີ ສາທາລະນະລັດ ສະຫະພາບມຽນມາ ຢ່າງເປັນທາງການ.

ໃນໂອກາດໄປຢ້ຽມຢາມດັ່ງກ່າວຄະນະຜູ້ແທນທັງສອງຝ່າຍໄດ້ເປີດກອງປະຊຸມເຈົ້າໜ້າທີ່ອາວຸໂສເພື່ອປຶກສາຫາລືກະກຽມໃຫ້ແກ່ກອງປະຊຸມລັດຖະມົນຕີວ່າດ້ວຍການຮ່ວມມືສອງຝ່າຍຄັ້ງທີ 4 ໂດຍການເປັນປະທານຮ່ວມຝ່າຍລາວໂດຍທ່ານ ພົຈວ ພູມີ ວັນດີໄຊ ຫົວໜ້າຫ້ອງວ່າການກະຊວງປກສ ແລະ ຝ່າຍມຽນມາແມ່ນ ທ່ານ ສູມໃຫຍ່ ຫົວໜ້າຄະນະກຳມະການຕ້ານອາດຊະຍາກຳ ຂ້າມຊາດ.  ໃນວາລະກອງປະຊຸມ,ຄະນະຜູ້ແທນທັງສອງຝ່າຍໄດ້ປຶກສາຫາລືແລະເຫັນດີເປັນເອກະພາບກັນໃນທຸກດ້ານ.ວັນທີ 27 ມັງກອນ 2014 ກອງປະຊຸມລັດຖະມົນຕີວ່າດ້ວຍການຮ່ວມມືສອງຝ່າຍຄັ້ງທີ 4 ກໍ່ໄດ້ເປີດຂື້ນຢ່າງເປັນທາງການຢູ່ທີ່ກຸງຢາງກຸງ ປະເທດມຽນມາ ໂດຍການເປັນປະທານຮ່ວມຝ່າຍລາວ ຂອງທ່ານ ດຣ ທອງບັນ ແສງອາພອນ ລັດຖະມົນຕີວ່າການກະຊວງປກສ ແຫ່ງ ສປປລາວ ແລະ ຝ່າຍມຽນມາແມ່ນ ທ່ານ ພົທ ໂກໂກ ລັດຖະມົນຕີວ່າການກະຊວງພາຍໃນແຫ່ງ ສາທາລະນະລັດ ສະຫະພາບມຽນມາ,ມີທ່ານເອກອັກຄະລັດຖະທູດສປປລາວປະຈຳມຽນມາ ພ້ອມດ້ວຍ ຄະນະຜູ້ແທນຂັ້ນສູງຂອງກະຊວງ ປກສລາວ ແລະ ກະຊວງພາຍໃນມຽນມາເຂົ້າຮ່ວມຢ່າງພ້ອມພຽງ.

ທັງສອງຝ່າຍໄດ້ທົບທວນການຮ່ວມມືສອງຝ່າຍໃນໄລຍະ 01 ປີຜ່ານມາເຫັນວ່າມີຜົນສຳເລັດໃນຫຼາຍດ້ານທີ່ອຳນວຍຄວາມສະດວກ ແລະ ສ້າງເງື່ອນໄຂທີ່ດີໃຫ້ແກ່ປະຊາຊົນສອງຊາດທີ່ດຳລົງຊີວິດ ຢູ່ບັນດາແຂວງ,ຊາຍແດນລາວມຽນມາສາມາດໄປມາຫາສູ່ທຳການຄ້າຂາຍຮ່ວມກັນໄດ້ຢ່າງເປັນປົກກະຕິເຮັດໃຫ້ເຂດຊາຍແດນຂອງສອງປະເທດມີຄວາມສະຫງົບໂດຍພື້ນຖານ.ນອກນັ້ນ,ຄະນະຜູ້ແທນຂອງສອງກະຊວງຍັງໄດ້ມີການແລກປ່ຽນກັນຈັດກອງປະຊຸມວິຊາການຕາມເນື້ອໃນບົດບັນທຶກສອງຝ່າຍທີ່ໄດ້ລົງນາມຮ່ວມກັນຕະຫຼອດເຖິງການແລກປ່ຽນຂໍ້ມູນຂ່າວສານ ແລະປະສານສົມທົບໃນການຮ່ວມມືກັນແກ້ໄຂບັນຫາຕ່າງໆທີ່ເກີດຂື້ນຢູ່ບໍລິເວນຊາຍແດນລາວມຽນມາໃຫ້ທັນເວລາ ພ້ອມນັ້ນສອງຝ່າຍກໍ່ໄດ້ເຫັນດີເປັນເອກະພາບ ແລະ ຮ່ວມມືລົງນາມບັນທຶກ ຮ່ວມມືສອງຝ່າຍໃນຕໍ່ໜ້າໂດຍຈະສືບຕໍ່ຮ່ວມມືໃນດ້ານວຽກງານຮັກສາຄວາມໝັ້ນຄົງແລະຄວາມສະຫງົບສຸກຂອງສອງປະເທດ,ວຽກງານຮັກສາກົດໝາຍ,ຄວາມເປັນລະບຽບຮຽບຮ້ອຍ ແລະ ການຮັບປະກັນຄວາມປອດໄພໃຫ້ແກ່ພົນລະເມືອງຂອງສອງປະເທດ,ວຽກງານເຂົ້າອອກເມືອງຕາມຊາຍແດນ,ວຽກງານປ້ອງກັນແລະປາບປາມຢາເສບຕິດ,ວຽກງານຕ້ານການຄ້າມະນຸດ,ດ້ານວິຊາການແລະທັດສະນະສຶກສາ.

Off

Comments are closed.