11th Aug2021

ລັດຖະບານ ຊຸດທີ IX ເນັ້ນການຈັດຕັ້ງປະຕິບັດ 2 ວາລະແຫ່ງຊາດ ຕ້ອງຢຶດຫມັ້ນຕາມຫຼັກການນໍາພາຂອງພັກ, ການຄຸ້ມຄອງດ້ວຍກົດຫມາຍຂອງລັດ, ພ້ອມທັງ ເດັດຂາດ, ໂປ່ງໃສ ແລະ ມືອາຊີບ

by somchan

ດັ່ງທີ່ຮູ້ນຳກັນແລ້ວວ່າ: ໃນໄລຍະດໍາເນີນກອງປະຊຸມສະໄຫມວິສາມັນ ຄັ້ງທີ I  ຂອງສະພາແຫ່ງຊາດ ຊຸດທີ IX ໃນລະຫວ່າງວັນທີ 5-10 ສິງຫາ 2021; ທ່ານ ພັນຄໍາ ວິພາວັນ, ນາຍົກລັດຖະມົນຕີ ໄດ້ຕາງຫນ້າລັດຖະບານ ຊຸດທີ IX ລາຍງານກ່ຽວກັບຮ່າງວາລະເເຫ່ງຊາດ ວ່າດ້ວຍການເເກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ຮ່າງວາລະເເຫ່ງຊາດ ວ່າດ້ວຍການເເກ້ໄຂບັນຫາຢາເສບຕິດ ຕໍ່ກອງປະຊຸມ ເພື່ອໃຫ້ບັນດາສະມາຊິກສະພາແຫ່ງຊາດ ພິຈາລະນາຮັບຮອງເອົາ ແລະ ສະຫນັບສະຫນູນລັດຖະບານໃນການຈັດຕັ້ງປະຕິບັດວາລະແຫ່ງຊາດດັ່ງກ່າວ ແນ່ໃສ່ສ້າງການຫັນປ່ຽນໃຫມ່ຢ່າງແຂງແຮງ, ເລິກເຊິ່ງ ແລະ ຮອບດ້ານ ຕາມມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ຕາມແຜນດໍາເນີນງານຂອງລັດຖະບານທີ່ກໍານົດໄວ້ໃຫ້ບັນລຸຄາດຫມາຍ.

ເຊິ່ງທ່ານ ນາຍົກລັດຖະມົນຕີ ໄດ້ກ່າວວ່າ: ເພື່ອຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ໃນການແກ້ໄຂຄວາມຫຍຸ້ງ ຍາກຕ່າງໆ ໃນບາງຂົງເຂດວຽກງານຂອງປະເທດ, ກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 2 ສະໄຫມ ທີ XI ໃນວັນທີ 1-3 ມີນາ 2021 ໄດ້ຕົກລົງເອົາການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ ເປັນວາລະແຫ່ງຊາດ ທັງຊີ້ນໍາໃຫ້ລັດຖະບານ ຊຸດທີ IX ຄົ້ນຄ້ວາ ແລະ ສ້າງເປັນແຜນລະອຽດ ເພື່ອລາຍງານຕໍ່ກອງປະຊຸມຄົບຄະນະບໍລິຫານງານສູນກາງພັກສະໄຫມວິສາມັນ.

ທ່ານ ນາຍົກລັດຖະມົນຕີ ຍັງໄດ້ໃຫ້ຮູ້ອີກວ່າ: ເນື້ອໃນສໍາຄັນ, ຕົ້ນຕໍກ່ຽວກັບຈຸດປະສົງລວມ ຂອງວາລະແຫ່ງຊາດ ແມ່ນສຸມໃສ່ແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ແກ້ໄຂບັນຫາຢາເສບຕິດຂອງປະເທດ ໃຫ້ຜ່ອນຄາຍລົງຢ່າງຈະແຈ້ງ ດ້ວຍການປັບປຸງນະໂຍບາຍ ກໍຄືກົນໄກການຄຸ້ມຄອງໃນບາງດ້ານ ທີ່ມີລັກສະນະບຸກທະລຸ ແນໃສ່ສ້າງຄວາມເຂັ້ມແຂງໃນດ້ານເສດຖະກິດ-ການເງິນ ແລະ ຄວາມສະຫງົບຂອງສັງຄົມ ເປັນກ້າວໆ. ຄວາມຫມາຍຂອງວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຫມາຍເຖິງ “ການແກ້ໄຂບັນຫາສໍາຄັນ, ຈໍາເປັນ ແລະ ຮີບດ່ວນຂອງຊາດ ທີ່ໄດ້ສະສົມມາຫຼາຍປີໃຫ້ຜ່ອນຄາຍລົງ ໂດຍຖືເອົາການແກ້ໄຂບັນຫາດັ່ງກ່າວເປັນຫນ້າທີ່, ພັນທະ ແລະ ຄວາມຮັບຜິດຊອບຂອງທຸກພາກສ່ວນໃນສັງຄົມ”. ໃນກໍານົດເວລາ 2 ປີ ເຄີ່ງ ຄື: ແຕ່ກາງປີ 2021 ຫາ 2023. ຫຼັງຈາກນັ້ນ ຈະໄດ້ປະເມີນຄືນຜົນການຈັດຕັ້ງປະຕິບັດຕົວຈິງຜ່ານມາ ບົນພື້ນຖານນັ້ນເພື່ອກໍານົດທິດທາງໃນຕໍ່ຫນ້າຕາມຄວາມເຫມາະສົມ. ກ່ຽວກັບ ຫຼັກການລວມ ຂອງການຈັດຕັ້ງປະຕິບັດວາລະແຫ່ງຊາດ ນອກຈາກຕ້ອງຢຶດຫມັ້ນຕາມຫຼັກການນໍາພາຂອງພັກ ແລະ ການຄຸ້ມຄອງດ້ວຍລະບຽບກົດຫມາຍແລ້ວ ຍັງຕ້ອງເອົາໃຈໃສ່ເນັ້ນຫນັກຕື່ມ ຕໍ່ຫຼັກການສະເພາະ ເຊັ່ນ: “ເດັດຂາດ, ໂປ່ງໃສ ແລະ ມືອາຊີບ”. ເຊິ່ງ ເດັດຂາດ: ຫມາຍເຖິງຕ້ອງມີຄວາມຕັດສິນໃຈສູງສຸດ ທັງໃນອົງການຂອງພັກ ແລະ ລັດ ແຕ່ເທິງລົງລຸ່ມ ບົນພື້ນຖານສ້າງຄວາມເຂົ້າໃຈຢ່າງຖືກຕ້ອງທີ່ເປັນເອກະພາບ ກ່ຽວກັບຄວາມຮຸນແຮງຂອງບັນຫາ ແລະ ຄວາມຈໍາເປັນຕ້ອງນໍາໃຊ້ມາດຕະການເດັດຂາດໃນການແກ້ໄຂບັນຫາ ເພື່ອໃຫ້ມີຫມາກຜົນຕົວຈິງ.  ໂປ່ງໃສ: ຫຼັກການນີ້ສໍາຄັນຫຼາຍ, ໃນຂະບວນການແກ້ໄຂບັນຫາ ບັນດາມາດຕະການທີ່ຮັບຮອງເອົານັ້ນຕ້ອງໂປ່ງໃສ ປະຊາຊົນສາມາດມີສ່ວນຮ່ວມທັງຂອດຈັດຕັ້ງປະຕິບັດຕົວຈິງ ແລະ ຂອດການຕິດຕາມ, ກວດກາຄວາມຄືບຫນ້າຕ່າງໆໄດ້. ຄວາມໂປ່ງໃສ ຍັງສະແດງເຖິງຄວາມຊື່ສັດ, ຈິງໃຈຂອງລັດຖະບານ ກໍຄືພາກສ່ວນກ່ຽວຂ້ອງ ເຊິ່ງຈະເປັນແນວປ້ອງກັນທີ່ດີທີ່ສຸດໃຫ້ແກ່ຜູ້ທີ່ຕັດສິນໃຈປັບປຸງປ່ຽນແປງ ທັງເປັນເຄື່ອງມືທີ່ດີທີ່ສຸດໃນການສ້າງຄວາມເຊື່ອຫມັ້ນ, ເຫຼື້ອມໃສສັດທາຈາກພາຍໃນ ແລະ ສາກົນ ຕໍ່ລັດຖະບານທີ່ມີຄວາມຕັ້ງໃຈ ທີ່ຈະແກ້ໄຂບັນຫາຂອງຕົນເອງ ແລະ ຈະເປັນແຮງຈູງໃຈດຶງດູດການສະຫນັບສະຫນູນຂອງກໍາລັງແຮງຈາກທຸກພາກສ່ວນພາຍໃນຊາດ ໃນການຈັດຕັ້ງປະຕິບັດ. ມືອາຊີບ: ແມ່ນການແກ້ໄຂບັນຫາເສດຖະກິດ-ການເງິນ ກໍຄືບັນຫາຢາເສບຕິດ ຈໍາເປັນຕ້ອງນໍາໃຊ້ຄວາມຮູ້ ຄວາມຊໍານານ ໃນລະດັບທີ່ແນ່ນອນ ທາງດ້ານຫຼັກວິຊາການ ແລະ ວິຊາສະເພາະຂອງພາກສ່ວນກ່ຽວຂ້ອງ ເຊິ່ງບໍ່ອາດສາມາດເຮັດຕາມລໍາພັງໃຈ ຫຼື ຄວາມຮູ້ສຶກອັດຕະວິໄສຂອງຜູ້ໃດຜູ້ຫນຶ່ງໄດ້; ການແກ້ໄຂບັນຫາຈໍາເປັນຕ້ອງໄດ້ ນໍາໃຊ້ຄວາມຊ່ຽວຊານສະເພາະດ້ານ ເຊັ່ນ: ດ້ານການເງິນ, ທະນາຄານ, ກົດຫມາຍ ແລະ ອື່ນໆ ເຂົ້າມາຊ່ວຍວິເຄາະ, ສັງເຄາະການວາງແຜນ ແລະ ໃຫ້ຄໍາແນະນໍາແກ່ລັດຖະບານ ຜູ້ມີອໍານາດຕັດສິນບັນຫາຕ່າງໆ ຫມາຍຄວາມວ່າການແກ້ໄຂບັນຫາທັງຫມົດນັ້ນ ຕ້ອງເປັນໄປຕາມຫຼັກວິຊາການ ບົນພື້ນຖານຄວາມເຂົ້າໃຈຢ່າງເລິກເຊິ່ງເຖິງກົກຮາກທີ່ແທ້ຈິງຂອງບັນຫາ ຕະຫຼອດຮອດວັດທະນະທໍາ, ການເຄື່ອນເຫນັງຂອງກົນໄກທາງດ້ານການເງິນ, ການບໍລິຫານຂອງອົງການລັດຂັ້ນຕ່າງໆທີ່ເກີດຂື້ນທຸກຂັ້ນ ເພື່ອສາມາດວິເຄາະໃຫ້ໄດ້ ເຖິງແກ່ນແທ້ຂອງບັນຫາ ແລ້ວຫາວິທີແກ້ໄຂແບບຍືນຍົງ ເພື່ອຮັບມືກັບສະພາບທີ່ເປັນຢູ່ໃນປັດຈຸບັນ ແລະ ໃນອານາຄົດອີກດ້ວຍ.

ສໍາລັບ ວຽກຈຸດສຸມຂອງວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໂດຍສັງລວມແລ້ວແມ່ນ: ສົ່ງເສີມການຜະລິດເພື່ອທົດແທນການນໍາເຂົາ ແລະ ເປັນສິນຄ້າສົ່ງອອກ ເພື່ອສ້າງຖານລາຍຮັບທີ່ເຂັ້ມແຂງ ຫຼື ຫັນປ່ຽນຈາກສັງຄົມຊົມໃຊ້ຫຼາຍກວ່າ ໄປສູ່ສັງຄົມການຜະລິດຫຼາຍຂຶ້ນ. ສ້າງຄວາມເຂັ້ມແຂງດ້ານການເກັບລາຍຮັບງົບປະມານ. ສົ່ງເສີມການປະຢັດ, ຕ້ານການຟຸມເຟືອຍ ແລະ ຍົກສູງປະສິດທິຜົນ ການລົງທຶນ-ລາຍຈ່າຍງົບປະມານ ແລະ ການແກ້ໄຂຫນີ້ສິນພາຍໃນ ແລະ ຕ່າງປະເທດ. ສໍາລັບ ດ້ານການປະຢັດແມ່ນຈະປັບປຸງນິຕິກໍາ ໃນການນໍາໃຊ້ລົດປະຈໍາຕໍາແຫນ່ງ ແລະ ລົດບໍລິຫານລັດ, ການໃຊ້ຈ່າຍງົບປະມານບໍລິຫານລັດ, ການຮັບແຂກ, ການເຄື່ອນໄຫວວຽກງານ ແລະ ການຈັດງານບຸນຕ່າງໆ ໃນການຈັດຕັ້ງພັກ-ລັດ ແຕ່ລະຂັ້ນ ທີ່ນໍາໃຊ້ງົບປະມານຂອງລັດ ໃຫ້ມີຄວາມເປັນເອກະພາບກັນ. ສໍາລັບການລົງທຶນ ແມ່ນຈະປັບປຸງນະໂຍບາຍການລົງທຶນຂອງລັດໃຫ້ສອດຄ່ອງ, ມີຈຸດສຸມ ແລະ ຮັບປະກັນທາງດ້ານປະສິດທິຜົນ.  ສ້າງສະຖຽນລະພາບດ້ານການເງິນ. ຍົກສູງປະສິດທິພາບການຄຸ້ມຄອງລັດດ້ວຍກົດຫມາຍ ໂດຍຈະປັບປຸງຮ່າງກົດຫມາຍ, ນະໂຍບາຍ ແລະ ກົນໄກຕ່າງໆ ໃຫ້ຄ່ອງຕົວກວ່າເກົ່າ. ສໍາລັບວຽກຈຸດສຸມໃຫຍ່ ຂອງວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໂດຍສັງລວມແລ້ວແມ່ນ: ສ້າງຄວາມຮັບຮູ້ເຂົ້າໃຈຜົນຮ້າຍຂອງຢາເສບຕິດໃຫ້ແກ່ສັງຄົມ ທັງສຶກສາອົບຮົມ, ໂຄສະນາເຜີຍແຜ່ເເນວທາງນະໂຍບາຍຕ່າງໆຂອງພັກ-ລັດ; ສ້າງ, ປັບປຸງກົດຫມາຍ ແລະ ນິຕິກໍາໃຕ້ກົດຫມາຍ ທີ່ກ່ຽວຂ້ອງກັບບັນຫາຢາເສບຕິດ. ປັບປຸງ ກົງຈັກການຈັດຕັ້ງ ແລະ ຍົກລະດັບຄວາມສາມາດຂອງອົງການປົກປ້ອງກົດຫມາຍ, ອົງການຕຸລາການ ແລະ ພາກສ່ວນທີ່ກ່ຽວຂ້ອງ ຕໍ່ການແກ້ໄຂບັນຫາຢາເສບຕິດ. ຍົກສູງປະສິດທິພາບ ດ້ານການຄຸ້ມຄອງ ແລະ ຊີ້ນໍາການຈັດຕັ້ງປະຕິບັດຮອບດ້ານ. ປັບປຸງຂີດຄວາມສາມາດ ໃນການແກ້ໄຂບັນຫາຢາເສບຕິດ ທີ່ເກີດຂື້ນຢູ່ໃນຄວາມຮັບຜິດຊອບຂອງການຈັດຕັ້ງຕ່າງໆກ່ຽວຂ້ອງ; ເພີ່ມທະວີວຽກງານການຮ່ວມມືສາກົນ ກ່ຽວກັບກົນໄກການຈັດຕັ້ງປະຕິບັດວາລະເເຫ່ງຊາດ ແມ່ນຈະບໍ່ໄດ້ແຕ່ງຕັ້ງຄະນະຮັບຜິດຊອບສະເພາະກິດຂື້ນ. ມີແຕ່ເນັ້ນຄວາມຮັບຜິດຊອບ ຂອງແຕ່ລະຂະແຫນງການກ່ຽວຂ້ອງ ເປັນຕົ້ນຕໍ ໂດຍກໍານົດໃຫ້ຂະແຫນງການຫຼັກເປັນຜູ້ຮັບຜິດຊອບ ແລະ ທັງເປັນໃຈກາງປະສານງານກັບພາກ ສ່ວນທີ່ກ່ຽວຂ້ອງທັງສູນກາງ ແລະ ທ້ອງຖິ່ນ ໃນການຈັດຕັ້ງປະຕິບັດຕົວຈິງ, ແຕ່ຈະມີການສະຫຼຸບລາຍງານຄວາມຄືບຫນ້າໃນແຕ່ລະໄລຍະ. ສໍາລັບກອງທຶນ ຫຼື ແຫຼ່ງທຶນ ໃນການຈັດຕັ້ງປະຕິບັດວາລະແຫ່ງຊາດ, ໂດຍສະເພາະວາລະແຫ່ງ ຊາດວ່າດ້ວຍການແກ້ໄຂບັນຫາຢາເສບຕິດ ແມ່ນໃຫ້ອີງໃສ່ກົດຫມາຍ ແລະ ລະບຽບການກ່ຽວຂ້ອງ.

ພ້ອມກັນນີ້, ລັດຖະບານຍັງໄດ້ສະເຫນີຮ່າງກົດຫມາຍສະບັບປັບປຸງ ຈໍານວນ 5 ສະບັບ ທີ່ພົວພັນກັບວາລະແຫ່ງຊາດທັງສອງ ເພື່ອໃຫ້ບັນດາສະມາຊິກສະພາແຫ່ງຊາດ ພິຈາລະນາຮັບຮອງ ຄື: ຮ່າງກົດຫມາຍວ່າດ້ວຍ ການຄຸ້ມຄອງສ່ວຍສາອາກອນ; ຮ່າງກົດຫມາຍ ວ່າດ້ວຍອາກອນມູນຄ່າເພີ່ມ; ຮ່າງກົດຫມາຍວ່າດ້ວຍອາກອນຊົມໃຊ້: ຮ່າງກົດຫມາຍວ່າດ້ວຍອາກອນລາຍໄດ້ ແລະ ຮ່າງກົດຫມາຍວ່າດ້ວຍຢາເສບຕິດ. ນອກຈາກນັ້ນ, ຍັງມີຮ່າງດໍາລັດ 2 ສະບັບ ແລະ ຄໍາສັງ 1 ສະບັບ ປະກອບດ້ວຍ: ຮ່າງດໍາລັດວ່າດ້ວຍການປະຢັດ ແລະ ຕ້ານການຟຸມເຟືອຍ; ຮ່າງດໍາລັດວ່າດ້ວຍລົດຂອງລັດ ຕິດພັນກັບລົດປະຈໍາຕໍາແຫນ່ງ ແລະ ຮ່າງຄໍາສັ່ງວ່າດ້ວຍການເພີ່ມທະວີການຄຸ້ມຄອງ ແລະ ຕ້ານການຮົ່ວໄຫຼຂອງລາຍຮັບງົບປະມານແຫ່ງລັດ.

ເພື່ອເຮັດໃຫ້ການຈັດຕັ້ງປະຕິບັດວາລະແຫ່ງຊາດ ບັນລຸໄດ້ຕາມຈຸດປະສົງ ແລະ ຄາດຫມາຍທີ່ກໍານົດໄວ້ ລັດຖະບານເຫັນວ່າມີຄວາມສໍາຄັນ ແລະ ຈໍາເປັນ ທີ່ທຸກພາກສ່ວນໃນສັງຄົມຕ້ອງໄດ້ຮັບຮູ້, ເຂົາໃຈຢ່າງຖືກຕ້ອງ, ມີຄວາມເສຍສະລະ ແລະ ໃຫ້ຄວາມຮ່ວມມືໃນການຈັດຕັ້ງປະຕິບັດບັນດາແຜນວຽກຈຸດສຸມຢ່າງຈິງຈັງ ເພື່ອຜົນປະໂຫຍດລວມຂອງຊາດ ແລະ ຂອງປະຊາຊົນ.

ຜ່ານການຮັບຟັງການລາຍງານ ກ່ຽວກັບຮ່າງວາລະເເຫ່ງຊາດ ວ່າດ້ວຍການເເກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ຮ່າງວາລະເເຫ່ງຊາດ ວ່າດ້ວຍການເເກ້ໄຂບັນຫາຢາເສບຕິດ ບັນດາທ່ານສະມາຊິກສະພາແຫ່ງຊາດ ຊຸດທີ IX ໄດ້ພິຈາລະນາຮັບຮອງເອົາຮ່າງວາລະແຫ່ງຊາດ, ຮ່າງກົດຫມາຍສະບັບປັບປຸງ ທີ່ປິ່ນອ້ອມ 2 ວາລະດັ່ງກ່າວ ຢ່າງເປັນເອກະສັນ; ຈາກນີ້ ກໍຈະໄດ້ນໍາສະເຫນີຕໍ່ປະທານປະເທດ ເພື່ອອອກລັດຖະດໍາລັດ ວ່າດ້ວຍການປະກາດໃຊ້ ແລະ ນໍາເຂົ້າສູ່ຂະບວນການຈັດຕັ້ງປະຕິບັດໃນຕົວຈິງຢ່າງເປັນທາງການ.

 

Off

Comments are closed.