04th Jul2014

ມີສະຕິໃນການບໍລິໂພກຂໍ້ມູນຂ່າວສານທາງອິນເຕີເນັດ

by somchan

​ປະຈຸ​ບັນວິທະຍາສາດ​ເຕັກ​ໂນ​ໂລ​ຢີໄດ້​ຮັບ​ການ​ພັດທະນາ​​ ໃຫ້​ມີ​ຄວາມ​ທັນ​ສະ​ໄໝຫຼາຍ​ດ້ານ ​ໂດຍ​ສະ​ເພາະ​ ແມ່ນ​ອິນ​ເຕີ​ເນັດ, ການ​ພັດທະນາດັ່ງກ່າວ​ໄດ້​ສ້າງ​ ຄວາມ​ສະດວກ ​ກໍ່​ຄື​ຜົນ​ດີ​ໃຫ້​ແກ່​ສັງຄົມເປັນ​ຕົ້ນ​ ແມ່ນ ​ໃນຂະ​ແໜ່ງທຸລະ​ກິດ, ການ​ເມືອງ, ວຽກ​ງານ​ຄວາມ​ໜັ້ນຄົງ, ການ​ສຶກສາ, ສາທາລະນະ​ສຸກ, ການບັນ​ເທີ​ງ,

 ການ​ສື່ສານ ​ແລະ ອື່ນໆ. ​ເຫັນ​ໄດ້​ວ່າຄວາມ​ທັນ​ສະ​ໄໝ​ທາງ​ດ້ານເຕັກ​ໂນ​ໂລ​ຢີ, ​ໄອ​ຊີ​ທີ ​ໄດ້​ກາຍ​ມາ​ເປັນ​ເຄື່ອງມື​ອັນ​ສຳຄັນ ​ເພື່ອ​ສ້າງ​ຄວາມ​ສະດວກ​ສະບາຍ​ໃນ​ການ​ຄຸ້ມ​ຄອງ​ ບໍລິຫານ​ແລະ​ຈັດການ​ກ່ຽວ​ກັບວຽກງານ ​ໃນ​ຂະ​ແໜ່​ງການຕ່າງໆ, ນຳ​ໃຊ້​ເປັນ​ເຄື່ອງມື​ເພື່ອ​ແລກປ່ຽນ​ຂໍ້​ມູນ​ຂ່າວສານ, ນຳ​ສະ​ເໜີ​ສະພາບ​ການ​ຕ່າງໆ​ທີ່​ເກີດ​ຂື້ນຜ່ານທາງ​ເວ​ບ​ໄຊ້, ​ເຜີຍ​ແຜ່​ຄວາມ​ຮູ້​, ຄວາມ​ບັນ​ເທີ​ງ, ຮູບ​ພາບ, ວິ​ດີ​ໂອ, ຕ່າງໆ​ໄດ້​ທົ່ວ​ເຖີ່​ງ ໝາຍ​ຄວາມວ່າ​ທຸກ​ຄົນ​ໃນທົ່ວ​ໂລກສາມາດ​ເຂົ້າ​ເຖີ່​ງອິນ​ເຕີ​ເນັດໄດ້​ຢ່າງວ່ອງ​ໄວ ​ ​ເພາະ​ໃນ​ປະຈຸ​ບັນ​ເຮົາ​ສາມາດ​ຫຼີ້ນອິນ​ເຕີ​ເນັດ​ໄດ້​ສະດວກ​​ທາງ​ລະບົບ​ຄອມ​ພິວ​ເຕີຕັ້ງ​ໂຕະ ​ແລະ ​​ໂທລະສັບມື​ຖື​ສະມາດ​ໂຟນຕ່າງໆ ​ເຊີ່ງ​ເຮັດ​ໃຫ້​ຄົນ​ເຮົາ​ສາມາດ​ຮັບ​ຂໍ້​ມູນ​ຂ່າວສານ​ໄດ້​​ທຸກ​ເວລາ ທຸກ​ສະຖານ​ທີ​ທີ່​ມີ​ສັນຍານ​ອິນ​ເຕີ​ເນັດ. ທັງ​ໝົດນັ້ນ​ໄດ້ສະ​ແດງ​ໃຫ້​ເຫັນ​ເຖີງຄວາມ​ກ້າວໜ້າ, ຄວາມ​ທັນ​ສະ​ໄໝ​ຂອງ​ເຕັກ​ໂນ​ໂລ​ຢີ​ໃນ​ປະຈຸ​ບັນ, ກໍ່​ຄື​ໃຫ້​ຜົນ​ປະ​ໂຫຍ​ດ​ແກ່​ສັງຄົມ.

​ແຕ່​ຄຽງ​ຄູ່​ກັບ​ການ​ພັດທະນາ​ຄວາມ​ກ້າວໜ້າທັນ​ສະ​ໄໝ​ດັ່ງກ່າວມັນ​ກໍ​ມີ​ອັນ​ທີ​ສົ່ງ​ຜົນ​ສະທ້ອນ​ທາງ​ລົບ​ເຊັ່ນ​ກັນ. ​​ໃນ​ນັ້ນມັນ​ໄດ້​ເກີດ​ມີ​ປະກົດ​ການ​ຫຍໍ້​ທໍ້​ຂື້ນຢູ່​ໃນ​ສັງຄົມ​ອອນ​​ໄລ​ນ໌ກໍ່​ຄື​ມີ​ຄົນ​ບໍ່​ດີຈຳນວນ​ໜຶ່ງ ​ໄດ້​ສວຍ​ໂອກາດ ​ໃຊ້​ເຄື່ອງມື​ທາງ​ອິນ​ເຕີ​ເນັດ ​ເປັນ​ເຄື່ອງມື​ໃນ​ການ​ສ້າງຄວາມ​ວຸ້ຍວາຍ​ໃນ​ສັງຄົມ, ​ເຜີຍ​ແຜ່​ສິ່ງ​ລາມົກ​ອາ​ນະ​ຈານ, ​ເຜີຍ​ແຜ່​ຂໍ້​ມູນ​ຂ່າວສານ​ທີ່​ບິດ​ເບືອນ​ຄວາມ​ຈິງ, ​ໃສ່​ຮ້າຍ​ປ້າຍ​ສີ, ​ໂຄສະນາ​ປັ່ນ​ປ່ວນ ​ເຮັດ​ໃຫ້​ສັງຄົມ​ເກີດ​ຄວາມ​ບໍ່​ສະຫງົບ ​ແລະ ​ເຮັດ​ໃຫ້​ຜູ້​ທີ່​ບໍລິ​ໂພ​ກຂໍ້​ມູນ​ຂ່າວສານຫຼົງ​ເຊື່ອ​ຄຳ​ຕົວະ​ຍົວະ​ໄດ້​ງ່າຍ. ນອກ​ນີ້​ກຸ່ມ​ຄົນ​ບໍ່​ດີຈຳນວນ​ໜຶ່ງ​ ຍິງ​ສວຍ​ໂອກາດ​ລັກ​ລອກ​ເອົາ ​ແລະທຳລາຍຂໍ້​ມູນ​ຂ່າວສານ​ທີ່​ສຳຄັນ​ຂອງ​ບຸກຄົນ​ອື່ນ ​ໂດຍ​ຮູບ​ແບບ​ການ​ກະຈາຍ​ໄວ​ລັດຄອມ​ພິວ​ເຕີ, ການ​ເຈາະ​ລະບົບ​ເນັດ​ເວີກ, ຊຶ່ງ​ໄດ້​ສົ່ງ​ຜົນ​ເສຍ​ຫາຍ​ຈາກ​ປະ​ເທດ​ໜຶ່ງ​ໄປ​ສູ່​ອີກ​ປະ​ເທດ​ອື່ນ ​ໂດຍ​ຜ່ານ​ອິນ​ເຕີ​ເນັດ​ອອນ​ລາຍ ​ເພາະ​ລະບົບ​ຄອມ​ພິວ​ເຕີ​ສະ​ໄໝ​ນີ້​ ໄດ້​ມີ​ການ​ເຊື່ອມ​ຕໍ່​ຕະຫຼອດ​ເວລາ ​ແລະມັນ​ກໍ່​ໄດ້​ສ້າງ​ໄພ​ອັນຕະລາຍ ​ໃນ​ຫຼາຍ​ຮູບ​ແບບ ​ເຊິ່ງ​ເອີ້​ນວ່າ ​ໄພ​ຄຸກ​ຄາມ​ທາງ​ໄຊ​ເບີ, ພ້ອມ​ກັນ​ນີ້​ກໍ່​ຍັງ​ເກີດ​ມີ​ການ​ກໍ່​ອາ​ດຊະ​ຍາ​ກຳ​ຫຼາຍໆ​ຢ່າງ ​ໂດຍ​ສະ​ເພາະ​ກໍ່​ແມ່ນອາດຊະຍາ​ກຳທາງ​ອິນ​ເຕີ​ເນັດການ​ໂຄສະນາ​ໃສ່​ຮ້າຍ​ປ້າຍ​ສີລະບອບ​ການ​ເມືອງ, ​ເສດຖະກິ​ດ-ສັງຄົມຂອງ​ບັນດາ​ປະຊາ​ຊາດ​ຕ່າງໆ​ໃນ​ໂລກ, ສຳລັບ​ປະ​ເທດ​ລາວ​ເຮົາການ​ນຳ​ໃຊ້​ອິນ​ເຕີ​ເນັດຖື​ວ່າ​ກຳລັງ​​ເປັນ​ທີ່ນິຍົມກັນ​ຫຼາຍ​ຢູ່ ​ໃນ​ອົງການສຳນັກງານ​ຕ່າງໆ, ນັກ​ສຶກສາ, ນັກຮຽນ​ຮູ້​ປັນຍາ​ຊົນ​. ​ໃນ​ຫວ່າງ​ບໍ່​ດົນ​ມາ​ນີ້​ກໍ່​ໄດ້​ມີ​ກຸ່ມ​ຄົນ​ບໍ່​ດີ​ໄດ້​ສ້າງ​ຄວາມ​ປັ່ນ​ປ່ວນ​ໃຫ້​ກັບ​ສັງຄົມ​ລາວກໍ່​ຄື​ການ​ທີ່​ມີ​ກຸ່ມ​ຄົນ​ບໍ່​ຫວັງ​ດີ​ໄດ້​ຂຽນຂໍ້ຄວາມ, ຕັດ​ຕໍ່ຮູບ​ພາບ ​ແລະສ້າງ​ວິ​ດີ​ໂອ​ ​ໄປ​ລົງ​ໃນ Face Book ກ່ຽວ​ກັບ​ມີ​ກຸ່ມ​ຄົນ​ຕ່າງ​ດ້າວ​ເຂົ້າມາສປປລາວ ​ແລ້ວລັກ​ເອົາ​ເດັກນ້ອຍ​ໄປ​ຂ້າ​ເພື່ອ​ເອົາ​ອະ​ໄວ​ຍະ​ວະ​ຕ່າງໆໄປ​ຂາຍ​. ຕໍ່​ກັບ​ສະພາບ​ການ​ດັ່ງກ່າວ​ໄດ້​ສ້າງ​ຄວາມ​ແຕກ​ຕື່ນ​ ​ເຮັດໃຫ້​ຄົນ​ຢູ່​ທົ່ວ​ສັງຄົມວິຕົກ​ກັງວົນລວມ​ໄປ​ເຖີ່​ງການ​ທີ​ມ່ວນ​ຊົນ​ມີ​ຫ່າງ​ສຽງ​ວິພາກ​ວິຈານຕໍ່​ວ່າ​ໃຫ້​ກັບການ​ປະຕິບັດ​ວຽກ​ງານ​ເຈົ້າໜ້າ​ທີ​ຕຳຫຼວດ​ໄປ​ໃນ​ທາງ​ທີ​ບໍ່​ດີ. ​ໃນ​ຄວາມ​ຈິງ​ແລ້ວ​ບັນຫາ​ດັ່ງກ່າວ​ແມ່ນ​ບໍ່​ໄດ້​ເກີດ​ຂື້ນຢ່າງ​ໃດ​ເລີຍ ​ແຕ່​ເປັນ​ການ​ສ້າງ​ສະຖານະ​ການ​ຂອງ​ກຸ່ມ​ຄົນທີ​ບໍ່​ຫວັງ​ດີ​ຕ້ອງການ​ເຮັດ​ໃຫ້​ສັງຄົມ​ລາວ​ບໍ່​ມີ​ຄວາມ​ສະຫງົບ. ​​ຕໍ່​ກັບ​ສະພາບ​ການ​ດັ່ງກ່າວ​ກຳລັງ​ປ້ອງ​ກັນ​ຄວາມ​ສະຫງົບ​ໄດ້​ສຸມ​ໃສ່​ຢ່າງ​ຕັ້ງໜ້າ​ໃນ​ການ​ສືບ​ສວນ-​ສອບ​ສວນ. ຜ່ານ​ການ​ລົງ​ກວດກາ​ຕົວ​ຈິງ​ຂອງ​ກຳລັງ​ປ້ອງ​ກັນ​ຄວາມ​ສະຫງົບ ​ໂດຍ​ສະ​ເພາະ​ຢູ່​ບັນດາ​ແຂວງ​ທີ່​ພົວພັນ​ກັບ​ຂ່າວ​ລື​ເຊັ່ນ: ​ແຂວງສາລະ​ວັນ, ​ແຂວງ​ຄຳ​ມ່ວນ, ​ແຂວງວຽງ​ຈັນ, ນະຄອນຫຼວງ​ວຽງ​ຈັນ ​ແລະບັນດາ​ທ້ອງ​ຖິ່ນ​ຕ່າງ​ໃນ​ຂອບ​ເຂດ​ທົ່ວ​ປະ​ເທດ. ​ເລື່ອ​ງດັ່ງກ່າວ​ແມ່ນ​ບໍ່​ມີ​ມູນ​ຄວາມ​ຈິງ​, ທັງ​ໝົດ​ນັ້ນ​ເປັນ​ກຸນ​ອຸບາຍ​ເລ່ລຽມຂອງ​ພວກ​ສັດຕູ ​ແລະກຸ່ມ​ຄົນ​ບໍ່​ດີ ​ເພື່ອ​ສ້າງ​ຄວາມ​ປັ່ນ​ປ່ວນ, ຍຸ​ແຍ່​ໃສ່​ຮ້າຍ​ປ້າຍ​ສີ​ເຮັດ​ໃຫ້​ສັງ​ລາວ​ມີ​ຄວາມ​ວຸ້ນວາຍ, ສັບສົນ.​ສະນັ້ນຈຶ່ງຢາກ​ຮຽກຮ້ອງ​ມາ​ຍັງຜູ້​ທີ່​ບໍລິ​ໂພ​ກຂໍ້ມູນທາງ​ອິນ​ເຕີ​ເນັດຈົ່ງ​​ໃຫ້​ມີ​ສະຕິ​ລະວັງ​ຕົວບໍ່​ຄວນ​ໄປ​ຫຼົງ​ເຊື່ຶອຂໍ້​ມູນທີ່​ນຳ​ສະ​ເໜີ​​ຫຼາຍ​ຈົນ​ເກີນ​ໄປ​ເພາະສ່ວນ​ຫຼວງ​ຫຼາຍ​ແລ້ວຂໍ້​ມູນ​​ໃນ​ອິນ​ເຕີ​ເນັດ ​ແມ່ນ​ເປັນ​ຂໍ້​ມູນ​ດິບຜູ້​ທີ​ເຜີຍ​ແຜ່​ຂາດ​ຄວາມ​ຮັບຜິດຊອບບໍ່​ໄດ້​ຮັບ​ການ​ກັ່ນ​ຕອງ​ຢຢ່າງຄັກ​ແນ່, ສະ​ນັ້ນ​ເຮົາ​ຄວນ​ມີ​ວິຈາລະນະຍານ, ຄົ້ນ​ຄິດຕຶກ​ຕອງ​ໃຫ້​ຖີ່​ຖ້ວນ, ບາງ​ອັນ​ກໍ່​ມີ​ຄວາມ​ຈິງ, ບາງ​ຢ່າງ​ກໍ່​ບິດ​ເບືອນ​ຄວາມ​ຈິງ, ສະ​ນັ້ນ​ເຮົາຄວນ​ມີ​ຫຼັກ​ໜັ້ນ​ໃນ​ການ​ຕັດສິນ​ໃຈກ່ອນ​ຈະ​ໄປ​ຫຼົງ​ເຊື່ອ​ຂໍ້​ມູນ​ ທີ່​ບໍ່ມີ​ຄວາມ​ຈິງທີ່​ຈະ​ກໍ່​ຄວາມ​ເສຍ​ຫາຍ​ໃຫ້​ກັບ​ຕົນ​ເອງກໍ່​ຄື​ສັງຄົມ ນອກຈາກ​ນີ້ ຖ້າ​ຫາກ​ບຸກຄົນ​ໃດ​ພົບ​ເຫັນ, ​ໄດ້​ຍິນ​ຫ່າງ​ສຽງ, ຂ່າວ​ລື​ຕ່າງໆ ກ່ຽວ​ກັບ​ສິ່ງ​ທີ​ສ້າງ​ປະກົດ​ການ​ຫຍໍ້​ທໍ້​ໃນ​ສັງຄົມ ​ແມ່ນ​ໃຫ້​ລາຍ​ງານ​ຕໍ່​ເຈົ້າໜ້າ​ທີ, ອຳນາດ​ການ​ປົກຄອງ​ບ້ານ ຫຼື ພາກສ່ວນ​ທີ​ກ່ຽວຂ້ອງ ​ເພື່ອ​ສະກັດ​ກັ້ນ​ແລະ​ແກ້​ໄຂ​ຢ່າງ​ທັນ​ການ.

Off

Comments are closed.