12th Dec2014

ກະຊວງປ້ອງກັນຄວາມສະຫງົບປະກາດຍົກຍ້າຍ ແລະ ແຕ່ງຕັ້ງນາຍຕຳຫຼວດ

by somchan

ກະຊວງປ້ອງກັນຄວາມສະຫງົບໄດ້ປະກາດຍົກຍ້າຍ ແລະ ແຕ່ງຕັ້ງນາຍຕຳຫຼວດຂັ້ນສູງ ໃນວັນທີ 10 ທັນວານີ້ ໂດຍການ ເຂົ້າຮ່ວມຂອງທ່ານ ພົນຈັດຕະວາ ສົມແກ້ວສີລາວົງ ກຳມະການ ສູນກາງພັກ ຮັກສາການ ລັດຖະມົນຕີວ່າການກະຊວງ ປ້ອງກັນຄວາມສະຫງົບ ມີຄະນະພັກ ຄະນະບັນຊາ ກົມ, ກອງບັນຊາການ ວິທະຍາຄານ ປກສ ນະຄອນຫຼວງ ພ້ອມດ້ວຍພະນັກງານຫຼັກແຫຼ່ງອ້ອມຂ້າງກະຊວງເຂົ້າຮ່ວມ.

pa-kard-kan-jand-police

ພັນເອກ ທອງຈັນ ຈັນທະພົງ ຮອງຫົວໜ້າກົມໃຫຍ່ການເມືອງ ປກສ ໄດ້ຜ່ານຄຳສັ່ງ ແລະ ດຳລັດຂອງນາຍົກລັດຖະມົນຕີ ວ່າດ້ວຍການຍົກຍ້າຍ ແລະ ແຕ່ງຕັ້ງນາຍຕຳຫຼວດ ໃນນັ້ນໄດ້ແຕ່ງຕັ້ງ ພັອ ດຣ ທອງເຄນ ບຸນໝັ້ນ ຈາກຮອງກົມໃຫຍ່ການເມືອງໄປຮັບໜ້າທີ່ໃໝ່ເປັນຫົວໜ້າກອງບັນຊາການ ປກສ ແຂວງວຽງຈັນ , ພັອ ດຣ ມາລາ ວິລະຈິດ ຜູ້ອຳນວຍການວິທະຍາຄານປ້ອງກັນຄວາມສະຫງົບແຫ່ງຊາດ ຮັບໜ້າທີ່ໃໝ່ ເປັນຮອງກົມ 504, ພັອ ຄຳມ້າວ ຫຼ້າຈັນເພັດ ຫົວໜ້າ ປກສ ແຂວງວຽງຈັນ ຮັບໜ້າທີ່ໃໝ່ເປັນຮອງຫົວໜ້າກົມໃຫຍ່ສັນຕິບານ, ພັອ ດຣ ທອງເຫຼັກ ມັ່ງໜໍ່ເມກ ຫົວໜ້າ ປກສ ແຂວງຫຼວງພະບາງ ຮັບໜ້າທີ່ໃຫມ່ເປັນຮອງຫົວໜ້າກົມໃຫຍ່ຕຳຫຼວດ, ພັອ ກິແກ້ວ ເນົາວະລັດ ຫົວໜ້າກົມຄຸ້ມຄອງສຳມະໂນຄົວ ແລະ  ກໍ່ສ້າງຮາກຖານ ຮັບໜ້າທີ່ໃໝ່ເປັນຮອງກົມໃຫຍ່ພະລາທິການ ພັອ ດຣ ວັນທອນ ສຸລິສັກ ຮອງກົມໃຫຍ່ສັນຕິບານ ຮັບໜ້າທີ່ໃໝ່ ເປັນຜູ້ອຳນວຍການວິທະຍາຄານປ້ອງກັນຄວາມສະຫງົບແຫ່ງຊາດ , ພ້ອມທັງແຕ່ງຕັ້ງ ພັອ ຄຳສາຍ ຈັນທະວົງ ຂຶ້ນເປັນຫົວໜ້າກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ, ພັອ ບົວພັນ ຍໍລະວົງສາ ເປັນຮອງກົມ 504 , ແລະ ພັອ ສົມຈັນ ແກ້ວຈັນດາ ຂຶ້ນເປັນຫົວໜ້າກອງບັນຊາການ ປກສ ແຂວງຫຼວງພະບາງ .

ການແຕ່ງຕັ້ງແລະຍົກຍ້າຍຄັ້ງນີ້ເພື່ອເປັນການປັບປຸງ ກົງຈັດການຈັດຕັ້ງຂອງ ກຳລັງ ປກສ ຢູ່ແຕ່ລະຂັ້ນ ໃຫ້ມີຄວາມໜັກແໜ້ນເຂັ້ມແຂງ ທາງດ້ານການຈັດຕັ້ງແລະ ສາມາດຕອບສະໜອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່. ພ້ອມກັນນີ້ ພົຈວ ສົມແກ້ວ ສີລາວົງຍັງໄດ້ເໜັ້ນໜັກໃຫ້ບັນດາສະຫາຍທີ່ໄດ້ຮັບການແຕ່ງຕັ້ງໃນຄັ້ງນີ້ ຕ້ອງເສີມຂະຫຍາຍທາດແທ້ ມູນເຊື່ອ ອັນດີງາມຂອງກຳລັງ ປກສ ສືບຕໍ່ເຝິກຝົນຫຼໍ່ຫຼອມຕົນເອງຢ່າງຮອບດ້ານ ເພື່ອເຮັດສຳເລັດໜ້າທີ່ ໂດຍສະເພາະບັນດາສະຫາຍທີ່ເປັນພະນັກງານຫຼັກແຫ່ລງ ເປັນຜູ້ບັງຄັບບັນຊາ ເປັນຜູ້ຕັດສິນວຽກງານ ຕ້ອງເພີ່ມທະວີຄວາມຮັບຜິດຊອບຮັກສາຄວາມເປັນແບບຢ່າງນຳໜ້າໃຫ້ພະນັກງານ-ນັກຮົບໃນທົ່ວກຳລັງ ເພື່ອຊີ້ນຳວິຊາສະເພາະທີ່ຕົນຮັບຜິດຊອບໃຫ້ມີຜົນສຳເລັດ.

Off

Comments are closed.