07th Dec2021

ຮອງເຈົ້າແຂວງໄຊຍະບູລີ ລົງຕິດຕາມສະພາບການລະບາດພະຍາດໂຄວິດ-19 ຢູ່ເມືອງເງິນ.

by somda phoneor

ໃນວັນທີ 6 ທັນວາ ນີ້, ທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ, ຫົວຫນ້າຄະນະ ສະເພາະກິດປ້ອງກັນ, ຄວບຄຸມ ແລະ ແກ້ໄຂການແພ່ລະບາດພະຍາດໂຄວິດ-19 ຂັ້ນແຂວງ, ພ້ອມ ດ້ວຍທີມງານພະແນກສາທາລະນະສຸກແຂວງ ລົງຕິດຕາມສະພາບການລະບາດຂອງພະຍາດໂຄວິດ19 ຢູ່ເມືອງເງິນ.

ໂອກາດນີ້, ທ່ານ ບຸນເລືອນ ບົວໄລ ຮອງເຈົ້າເມືອງເງິນ, ຫົວຫນ້າຄະນະສະເພາະກິດຂັ້ນເມືອງ ໄດ້ລາຍງານຜົນການຈັດຕັ້ງປະຕິບັດວຽກງານ ການຄວບຄຸມການແຜ່ລະບາດຂອງພະຍາດໂຄວິດ-19 ຢູ່ພາຍເມືອງວ່າ: ປັດຈຸບັນ, ມີບ້ານທີ່ກໍານົດເປັນ ບ້ານເຂດແດງ 7 ບ້ານ, ເຂດເຫລືອງ 15 ບ້ານ, ໄດ້ ກວດພົບເຊື້ອພະຍາດໂຄວິດ-19 ໃນວັນທີ 12 ພະຈິກ 2021 ຢູ່ສູນຈໍາກັດບໍລິເວນ ແລະ ພົບຜູ້ ຕິດເຊື້ອພາຍໃນ ວັນທີ 22 ພະຈິກ 2021 ແລະ ມາຮອດວັນທີ 4 ທັນວາ 2021 ໄດ້ກວດຫາເຊື້ອ ພະຍາດໂຄວິດ-19 ທັງຫມົດ 1.459 ກໍລະນີ, ມີຜູ້ຕິດເຊື້ອ 149 ກໍລະນີ ໃນນັ້ນ ໄດ້ນໍາເຂົ້າ ປິ່ນປົວຢູ່ ສູນຫົງສາ 12 ກໍລະນີ, ໂຮງຫມໍພາກສະຫນາມ ບ້ານຂອນ 23 ກໍລະນີ, ຕິດຕາມປິ່ນປົວຢູ່ເຮືອນ 76 ກໍລະນີ, ຕິດຕາມປິ່ນປົວຢູ່ວັດ(ເປັນພະສົງສໍາມະເນນ) 38 ກໍລະນີ, ແລະ ປິ່ນປົວດີ 3 ກໍລະນີ. ປັດຈຸບັນ ທິມງານໄດ້ສຸມໃສ່ຄົ້ນຫາຜູ້ຕິດເຊື້ອ, ສືບຕໍ່ປີດການເຂົ້າ-ອອກເມືອງ, ສຸມໃສ່ໂຄສະນາສຸກ ຂະສຶກສາ ແລະ ປິ່ນປົວຜູ້ຕິດເຊື້ອຢູ່ສະຖານທີ່ຕ່າງໆໃຫ້ດີໂດຍໄວ, ພ້ອມທັງມີການລາຍງານ ແລະ ປະ ເມີນເຫດການໃນແຕ່ລະວັນ ເພື່ອສະຫລຸບສັງລວມ ແລ້ວລາຍງານໃຫ້ທາງຄະນະສະເພາະກິດ ເປັນ ປົກກະຕິ.

ຈາກນັ້ນ, ທ່ານ ເພັດພິໄຊ ສູນວິໄລ ກໍໄດ້ເນັ້ນໃຫ້ຄະນະສະເພາະກິດຂັ້ນເມືອງ ແລະ ພາກສ່ວນກ່ຽວຂ້ອງ ສຸມທຸກເຫື່ອແຮງສະຕິປັນຍາ ເຂົ້າໃນວຽກງານຕ້ານການແຜ່ລະບາດພະຍາດໂຄ ວິດ-19 ໃຫ້ຫມົດໄປຈາກເມືອງເງິນ, ພ້ອມທັງ ມອບເງິນສົດ 10 ລ້ານກີບ ແລະ ເຄື່ອງກວດໂຄວິດ, 100 ຊຸດ ເພື່ອນໍາໃຊ້ເຂົ້າໃນການຕ້ານການແຜ່ລະບາດຂອງພະຍາດໂຄວິດ-19 ຢູ່ເມືອງເງິນ ຕື່ມອີກ.

 

Off

Comments are closed.