08th Dec2021

ກອງປະຊຸມສະຫຼຸບການຈັດຕັ້ງປະຕິບັດວຽກງານການຜະລິດຂອງກົມໃຫຍ່ການເມືອງ ປກສ ປະຈໍາປີ 2021 ແລະ ທິດທາງແຜນການປະຈໍາປີ 2022.

by somda phoneor

ກອງປະຊຸມສະຫຼຸບການຈັດຕັ້ງປະຕິບັດວຽກງານ ການຜະລິດຂອງກົມໃຫຍ່ການເມືອງ ປກສ ປະຈໍາປີ 2021 ແລະ ທິດທາງແຜນການປະຈໍາປີ 2022 ໂດຍພາຍໃຕ້ການເປັນປະທານຂອງ ພົຈວ ຄໍາສາຍ ຈັນທະວົງ ຮອງຫົວຫນ້າກົມໃຫຍ່ການເມືອງ ປກສ ເຂົ້າຮ່ວມມີ ອໍານວຍການໂຮງຮຽນ ວັດທະນະທໍາຫລັກ 67, ຄະນະກົມໃຫຍ່ການເມືອງ ພ້ອມດ້ວຍທີມງານການຜະລິດຂອງກົມໃຫຍ່ ການເມືອງເຂົ້າຮ່ວມ.

ໃນກອງປະຊຸມ ພັທ ປອ ວຽງໄຊ ທໍາມະສິດ ຮອງຫົວຫນ້າຫ້ອງການກົມໃຫຍ່ການເມືອງ ປກສ ໄດ້ລາຍງານການຈັດຕັ້ງປະຕິບັດວຽກງານການຜະລິດຂອງກົມໃຫຍ່ການເມືອງປະຈໍາປີ 2021 ແລະ ທິດທາງແຜນການປີ 2022 ໃນໄລຍະ 1 ປີຜ່ານມາ ຄະນະຮັບຜິດຊອບໄດ້ປະສານສົມທົບກັບ ບໍລິສັດຜູ້ຮັບເຫມົາ ໂດຍສະເພາະເເມ່ນ ເຮັດຫນ້າທີ່ບຸກເບີກທີ່ດີນພື້ນທີ່ປູກໄມ້ ແລະ ຫນອງລ້ຽງປາ ເຊິ່ງ ໄດ້ສຸມໃສ່ຈັດຕັ້ງປະຕິບັດ ບັນດາຫນ້າວຽກທີ່ສໍາຄັນຫລາຍດ້ານ ເປັນຕົ້ນແມ່ນໄດ້ບຸກເບີກທີ່ດິນ, ປັບ ພື້ນທີ່ດິນຢູ່ໂຮງຮຽນຫຼັກ67 ຈໍານວນ 25 ເຮັກຕາ, ມູນຄ່າ 100 ລ້ານກ່ວາກີບ, ປູກໄມ້ວິກຈໍານວນ 40,000 ກວ່າຕົ້ນ, ໃນນີ້ໄດ້ປັບປຸງຫນອງປາທີ່ມີຢູ່ແລ້ວໃນຂອບເຂດ ຫຼັກ 67 ແລະ ຫຼັກ 62 ເຊິ່ງມີ ຈໍານວນທັງຫມົດ13 ຫນອງ ມູນຄ່າ 300 ລ້ານກ່ວາກີບ ເຊິ່ງໄດ້ແບ່ງປັນໃຫ້ພາກສ່ວນຕ່າງໆ ລ້ຽງປາຈໍ ນວນ 05 ຫນອງ, ໃຊ້ເກັບນ້ໍາເພື່ອທໍາການຜະລິດຂອງໂຮງຮຽນ ວັດທະນະທໍາຫຼັກ 67 ຈໍານວນ 01 ຫນອງ ແລະ ນໍາໃຊ້ເຂົ້າໃນການຜະລິດຂອງກົມໃຫຍ່ ຈໍານວນ 07 ຫນອງ, ເຊິ່ງ ໄດ້ປ່ອຍປາແລ້ວ ຈໍານວນ 1 ແສນກວ່າໂຕ ລວມມູນຄ່າ 50 ລ້ານກ່ວາກີບ, ສ້າງຟາມລ້ຽງໄກ່ພັນໄຂ່ ເຊິ່ງມີມູນຄ່າການ ລົງທຶນເບື້ອງຕົ້ນ 100 ລ້ານກ່ວາກີບ, ໄດ້ເລີ່ມລົງມືຈັດຕັ້ງປະຕິບັດແຕ່ເດືອນຕຸລາ 2021 ເຊິ່ງມີໄກ່ພັນ ໄຂ່ຈໍານວນ 1.000 ໂຕ, ປະຈຸບັນສາມາດສະຫນອງໄຂ່ໄກ່ເຂົ້າເຮືອນຄົວລວມໂຮງຮຽນວັດທະນະທໍາ ຫຼັກ 67 ແລະ ພາກສ່ວນຕ່າງໆແລ້ວຈໍານວນຫນຶ່ງ, ຄາດກະ 6 ເດືອນຂື້ນໄປຈະໄດ້ໄຂ່ໄກ່ຕາມເປົ້າທີ່ ກໍານົດໄວ້. ພ້ອມນັ້ນກໍ່ໄດ້ຈັດຕັ້ງນໍາພາພະນັກງານວິຊາການ ໄປຝຶກອົບຮົມໄລຍະສັ້ນ ກ່ຽວກັບວິທີ ການ-ຂັ້ນຕອນ ການລ້ຽງ, ການບົວລະບັດຮັກສາ, ການໃຫ້ອາຫານ ແລະ ການຜະລິດຫົວອາຫານໄກ່ ພັນໄຂ່ດ້ວຍຕົນເອງ, ສ້າງຕັ້ງຮ້ານຄ້າສະດວກຊື້ ແລະ ຮ້ານອາຫານ ຢູ່ໂຮງຮຽນວັດທະນະທໍາຫຼັກ 67, ໂຄງການດັ່ງກ່າວ ເລີ່ມກໍ່ສ້າງ ນັບແຕ່ວັນທີ່ 14 ຕຸລາ 2021, ມູນຄ່າໃນການກໍ່ສ້າງ 500 ລ້ານກີບ. ຈຸດປະສົ່ງວຽກງານການຜະລິດເພື່ອຕອບສະຫນອງ ແລະ ສ້າງຄວາມສະດວກ ໃຫ້ແກ່ຄູ ອາຈານ ແລະ ນັກຮຽນ ພາຍໃນໂຮງຮຽນວັດທະນະທໍາຫຼັກ 67 ແລະ ທັງເປັນການສ້າງລາຍຮັບໃຫ້ແກ່ກົມໃຫຍ່ ການເມືອງ ປກສ. ນອກນັ້ນກໍ່ໄດ້ປູກສ້າງສະຖານທີ່ພັກເຊົາ, ເຮັດຫ້ອງນ້ໍາ, ເດີນສາຍໄຟຟ້າ, ຂຸດຮ່ອງ ລະບາຍນ້ໍາ ແລະ ທໍ່ນໍາຈາກ ໂຮງຮຽນວັດທະນະທໍາຫຼັກ 67 ໄປຫາສະຖານທີ່ພັກເຊົາ ແລະ ຄອກໄກ່. ພ້ອມທັງບຸກເບີກທີ່ດີນປູກແນວພັນຫຍ້າ ຢູ່ຫຼັກ 67 ແລະ ຫຼັກ 62 ໃນເນື້ອທີ່ປະມານ 5 ໄລ່, ລົດຕົ້ນທຶນໃນການຊື້ຫົວອາຫານປາ ແລະ ເພື່ອຂະຫຍາຍແນວພັນຫຍ້ານໍາ ໃຊ້ໃນການລ້ຽງງົວ ແລະ ສັດປະເພດອື່ນໆ ໃນຕໍ່ຫນ້າ, ນອກນັ້ນຍັງໄດ້ເອົາໃຈໃສ່ຕິດຕາມບົວລະບັດຮັກສາຕົ້ນໄມ້ວິກ, ຫນອງປາ, ຄອກໄກ່, ແບ່ງຄວາມຮັບ ຜິດຊອບໃຫ້ພະນັກງານ ລ້ຽງເກືອປາ, ໄກ່ພັນໄຂ່ ເພື່ອເປັນສິນຄ້າ ຈໍາຫນ່າຍ ໃຫ້ໄດ້ຫລາຍຂຶ້ນ. ສໍາລັບທິດທາງແຜນການຈຸດສຸມໃນປີ 2022 ຈະສືບຕໍ່ພັດທະນາວຽກງານການ ຜະລິດຂອງກົມໃຫຍ່ການເມືອງ ປ້ອງກັນຄວາມສະຫງົບໂດຍສະເພາະ ແມ່ນການຂະຫຍາຍພື້ນທີ່ປູກ ໄມ້ວິກ, ຫນອງປາ, ຟາມໄກ່ ໃຫ້ເຕີບໃຫຍ່ເຂັ້ມແຂງ ເພື່ອນໍາເອົາຜົນປະໂຫຍດ ແລະ ຜົນສໍາເລັດ ມາ ໃຫ້ແກ່ພະນັກງານ-ນັກຮົບ ກໍ່ຄືກົມໃຫຍ່ການເມືອງ ປ້ອງກັນຄວາມສະຫງົບ.

ໃນໂອກາດດຽວກັນໃນກອງປະຊຸມກໍ່ໄດ້ຮັບຟັງການໂອ້ລົມ ແລະໃຫ້ທິດຊີ້ນໍາໃນການຜະລິດ ຈາກ ພົຈວ ຄໍາສາຍ ຈັນທະວົງ ຮອງຫົວຫນ້າກົມໃຫຍ່ການເມືອງປກສ ກ່ອນອື່ນທ່ານໄດ້ສະແດງ ຄວາມຍ້ອງຍໍຊົມເຊີຍຕໍ່ກັບຜົນງານໃນການທໍາການຜະລິດຂອງກົມໃຫຍ່ການເມືອງປກສ ພ້ອມນັ້ນ ທ່ານຍັງໄດ້ເນັ້ນຫນັກໃຫ້ແຕ່ລະພາກສ່ວນເພີ່ມຄວາມເອົາໃຈໃສ່ ແລະ ມີຄວາມຮັບຜິດຊອບໃຫ້ສູງຂຶ້ນ ໃນແຕ່ລະຫນ້າວຽກຂອງການຜະລິດໃຫ້ມີຄວາມເຕີບໃຫຍ່ກາຍເປັນສີນຄ້າອອກຈໍາຫນ່າຍທົ່ວສັງຄົມໃນ ອະນາຄົດ.

Off

Comments are closed.