08th Dec2021

ອົງການໄອຍະການປະຊາຊົນສູງສຸດ ແລະ ກະຊວງປ້ອງກັນຄວາມສະຫງົບ ຮ່ວມລົງນາມໃນບົດບັນທຶກການກໍານົດກົນໄກປະສານງານ.

by somda phoneor

ໃນວັນທີ 8 ທັນວາ 2021 ຢູ່ທີ່ຫ້ອງປະຊຸມຂອງອົງການໄອຍະການປະຊາຊົນສູງສຸດ ໄດ້ຈັດ ພິທີເຊັນບົດບັນທຶກການປະສານງານຮ່ວມກັນ ລະຫວ່າງ ອົງການໄອຍະການປະຊາຊົນສູງສຸດ ແລະ ກະຊວງປ້ອງກັນຄວາມສະຫງົບ ໂດຍການເປັນປະທານຮ່ວມຂອງ ພົນເອກ ວິໄລ ຫຼ້າຄໍາຟອງ ກໍາມະການກົມການເມືອງສູນກາງພັກ ລັດຖະມົນຕີກະຊວງ ປກສ, ທ່ານ ໄຊຊະນະ ໂຄດພູທອນ ກໍາມະການສູນກາງພັກ ຫົວຫນ້າ ອົງການໄອຍະການປະຊາຊົນສູງສຸດ, ມີ ຄະນະພັກ-ຄະນະນໍາ, ບັນດາ ຫົວຫນ້າກົມ ແລະ ພະນັກງານ ຫຼັກແຫຼ່ງ ຂອງທັງສອງພາກສ່ວນ ເຂົ້າຮ່ວມຢ່າງພ້ອມພຽງ.

ການເຊັນບົດບັນທຶກສ້າງກົນໄກປະສານງານຮ່ວມກັນໃນຄັ້ງນີ້ ແມ່ນເພື່ອເປັນການຈັດຕັ້ງ ປະຕິບັດ ເນື້ອໃນບົດບັນທຶກຮ່ວມ 4 ພາກສ່ວນ ກ່ຽວກັບການດໍາເນີນຄະດີ ຕາມຂະບວນຍຸຕິທໍາ ຄັ້ງ ທີ VI, ເຂົ້າສູ່ວຽກງານຕົວຈິງ ຂອງອົງການໄອຍະການປະຊາຊົນສູງສຸດ ແລະ ກະຊວງປ້ອງກັນຄວາມ ສະຫງົບ, ແນ່ໃສ່ສະກັດກັ້ນປະກົດການຫຍໍ້ທໍ້ໃນການດໍາເນີນຄະດີອາຍາ, ເຄົາລົບ ແລະ ປະຕິບັດຕາມ ພາລະບົດບາດ, ຫນ້າທີ່ ແລະ ຂອບເຂດສິດ ຂອງແຕ່ລະພາກສ່ວນ ທີ່ໄດ້ກໍານົດໄວ້ໃນ ກົດຫມາຍ ແລະ ນິຕິກໍລຸ່ມກົດຫມາຍ ພ້ອມທັງຮັບປະກັນຄວາມສັກສິດຂອງກົດຫມາຍ, ປະຕິບັດ ຫຼັກການລວມສູນ ແລະ ເປັນເອກະພາບ ຕາມລະບົບສາຍຕັ້ງ ຫຼື ສາຍບັນຊາແຕ່ຂັ້ນສູນກາງລົງຮອດຂັ້ນ ທ້ອງຖິ່ນໃນ ຂອບເຂດທົ່ວປະເທດ, ເຮັດໃຫ້ການດໍາເນີນຄະດີອາຍາ ໄດ້ດໍາເນີນໄປຢ່າງຖືກຕ້ອງ, ໂປ່ງໃສ, ທັນ ຕາມກໍານົດເວລາ ແລະ ຍຸຕິທໍາ.

ທັງສອງອົງການຈິ່ງໄດ້ປະສານສົມທົບກັນ ຄົ້ນຄວ້າຕົກລົງເຫັນດີເປັນເອກະພາບສ້າງບົດ ມ້ນທຶກກົນໄກ ຊຶ່ງ ປະກອບມີ 7 ຂໍ້ ໂດຍໄດ້ກໍານົດຫນ້າທີ່ຄວາມຮັບຜິດຊອບຂອງແຕ່ລະພາກສ່ວນອອກເປັນຫນ້າວຽກ ອັນລະອຽດ ເພື່ອຍົກສູງຄວາມຮັບຜິດຊອບ ແລະ ຈັດຕັ້ງປະຕິບັດເນື້ອໃນຂອງບົດ ບັນທຶກຮ່ວມ ໃຫ້ປະກົດຜົນເປັນຈີງ ປະກອບສ່ວນໃຫ້ການຄຸ້ມຄອງລັດ, ຄຸ້ມຄອງເສດຖະກິດ ໃຫ້ມີ ຄວາມໂປ່ງໃສ, ເຂັ້ມແຂງ, ມີປະສິດທິພາບ, ປະສິດທິຜົນ, ປະຢັດ ແລະ ປະຕິບັດມາດຕະການສະກັດ ກັນ ແລະ ແກ້ໄຂການລະເມີດກົດຫມາຍ ຕາມຂະບວນການຍຸຕິທໍາ.

 

Off

Comments are closed.