09th Dec2021

ເຈົ້າແຂວງ ໄຊຍະບູລີ ລົງຊຸກຍູ້ວຽກງານຮອບດ້ານ ຢູ່ເມືອງ ໄຊສະຖານ.

by somda phoneor

ໃນວັນທີ 9 ທັນວາ ນີ້ ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ພ້ອມຄະນະ ໄດ້ ລົງຊຸກຍູ້ວຽກງານຮອບດ້ານ ຢູ່ເມືອງ ໄຊສະຖານ, ໃຫ້ການຕ້ອນຮັບໂດຍ ທ່ານ ສີສະຫມອນ ນາມວົງ ວ່າການເຈົ້າເມືອງ ໄຊສະຖານ ພ້ອມດ້ວຍການນໍາຫຼັກແຫຼ່ງຂອງເມືອງ.

ທ່ານ ສີສະຫມອນ ນາມວົງ ວ່າການເຈົ້າເມືອງ ໄຊສະຖານ ໄດ້ລາຍງານວຽກງານຮອບດ້ານ ໂດຍຫຍໍ້ໂດຍສະເພາະແມ່ນວຽກງານເສດຖະກິດເປັນຕົ້ນແມ່ນການເກັບກູ້ພືດລະດູຝົນ ແລະ ການ ກະກຽມຜະລິດລະດູແລ້ງ. ສໍາລັບການກະກຽມລົງກວດກາປະເມີນ ຫນ່ວຍພັກປອດໃສ, ເຂັ້ມແຂງ ແລະ ຫນັກແຫນ້ນ ຮອດປະຈຸບັນແມ່ນມີຄວາມພ້ອມດ້ານຕ່າງໆເຊັ່ນ: ໄດ້ອອກມະຕິຕົກລົງແບ່ງຄວາມ ຮັບຜິດຊອບໃຫ້ຄະນະປະຈໍາພັກ, ກໍາມະການພັກເມືອງແຕ່ລະສະຫາຍ ແລະ ພະນັກງານຫຼັກແຫຼ່ງ ຂອງເມືອງລົງເຮັດວຽກຕົວຈິງຢູ່ແຕ່ລະບ້ານ, ບັນດາເອກະສານຕ່າງໆຕິດພັນກັບ 2 ວາລະແຫ່ງຊາດທີ່ ຈະເຜີຍແຜ່ ໃຫ້ພະນັກງານ ແລະ ປະຊາຊົນບັນດາເຜົ່າ, ວາລະການນໍາເນີນວຽກງານຢ່າງລະອຽດ ຈະແຈ້ງ ແລະ ໄດ້ກໍານົດເອົາວັນທີ 14 ທັນວານີ້ເປັນການເຮັດທົດລອງຢູ່ບ້ານ ດວຍກາວ, ຈາກນັ້ນຈະ ໄດ້ແບ່ງເປັນທີມເພື່ອລົງພ້ອມກັນຢູ່ແຕ່ລະບ້ານ ແລະ ສໍານັກງານອົງການທົ່ວເມືອງ ແລະ ຄາດຄະເນ ຈະ ໃຫ້ສໍາເລັດໃນທົ່ວເມືອງໃນເດືອນ ກຸມພາ 2022.

ຈາກນັ້ນ ທ່ານ ພົງສະຫວັນ ສິດທະວົງ ກໍ່ໄດ້ໃຫ້ທິດຊີ້ນໍາຕໍ່ການນໍາຂອງເມືອງເພື່ອເປັນທິດທາງ ໃນການລົງກວດກາປະເມີນຫນ່ວຍພັກ ປອດໃສ, ເຂັ້ມແຂງ ແລະ ຫນັກແຫນ້ນ ຢູ່ແຕ່ລະຫນ່ວຍພັກໃຫ້ ໄດ້ຮັບຜົນສໍາເລັດອັນຈົບງາມ, ໂດຍເອົາໃຈໃສ່ ກໍາເເຫນ້ນຈຸດປະສົງເປົ້າຫມາຍຂອງການຂະຫຍາຍພັກ , ຕາມ 15 ຕໍາແຫນ່ງງານ, ຊຸກຍູ້ການຜະລິດຕິດພັນກັບການປະຕິບັດ 2 ວາລະແຫ່ງຊາດຄື: ການແກ້ໄຂບັນຫາເສດຖະກິດ ແລະ ການແກ້ໄຂບັນຫາຢາເສບຕິດ, ຕິດຕາມ, ຊຸກຍູ້ ແລະ ປຸກລະດົມປະຊາຊົນແຕ່ລະຂົງເຂດ ໂດຍອິງຕາມທ່າແຮງຄວາມເປັນໄປໄດ້ຂອງທ້ອງຖິ່ນໃນການຜະລິດເປັນສິນຄ້າ.

Off

Comments are closed.