10th Dec2021

ປກສ ເມືອງສັງທອງ ຜ່ານແຜນ ຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການ ແກ້ໄຂບັນຫາຢາເສບຕິດ

by Peaung Thanonkeo

ກອງບັນຊາການ ປກສ ເມືອງສັງທອງ ນະຄອນຫຼວງວຽງຈັນ ຈັດກອງປະຊຸມຜ່ານແຜນຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດແຕ່ປີ 2021-2023 ໃນວັນທີ 9 ທັນວາ 2021, ຢູ່ສະໂມສອນ ກອງບັນຊາການ ປກສ ເມືອງ ໂດຍການໃຫ້ກຽດເປັນປະທານ ຂອງທ່ານ ພົງສະຫວັນ ສີລິພັນ ເຈົ້າເມືອງສັງທອງ, ມີ ພັທ ສີວິໄລ ພູມນະໄຊ ຫົວໜ້າກອງບັນຊາການ ປກສ ເມືອງສັງທອງ, ມີບັນດາຄະນະກອງບັນຊາການ, ຫ້ອງການອອ້ມຂ້າງ ແລະ ຂະແໜງການທີ່ກ່ຽວຂ້ອງ, ມີນາຍບ້ານ 35 ບ້ານ ພ້ອມດ້ວຍພະນັກງານນັກຮົບ ເຂົ້າຮ່ວມ.

ພັທ ຄໍາປະເສີດ ວົງພູທອງ ຮອງຫົວໜ້າກອງບັນຊາການ ປກສ ເມືອງສັງທອງ ໄດ້ຜ່ານແຜນ ປະຕິບັດງານແກ້ໄຂບັນຫາຢາເສບຕິດ ຂອງກອງບັນຊາການ ປກສ ເມືອງສັງທອງ ແຕ່ປີ 2021-2023 ໂດຍໃຫ້ຮູ້ວ່າ: ການຈັດຕັ້ງຜັນຂະຫຍາຍວາລະແຫ່ງຊາດຢູ່ເມືອງສັງທອງ ແມ່ນມີ 3 ບາດກ້າວ ໃນການຈັດຕັ້ງປະຕິບັດຄື:  ບາດກ້າວກະກຽມ,  ບາດກ້າວດໍາເນີນ ແລະ ບາດກ້າວຕີລາຄາຖອດຖອນບົດຮຽນ.

ສໍາລັບເນື້ອໃນຈັດຕັ້ງປະຕິບັດແຜນການມີ 5 ວຽກຈຸດສຸມຄື: ສ້າງຄວາມຮູ້ໃຫ້ທົ່ວສັງຄົມດ້ວຍການສຶກສາອົບຮົມ ແລະ ໂຄສະນາເຜີຍແຜ່ຜົນຮ້າຍ, ໄພອັນຕະລາຍຂອງຢາເສບຕິດ ແລະ ລະບຽບກົດໝາຍ; ເຂົ້າຮ່ວມ ແລະ ຄົ້ນຄວ້າບັນດານິຕິກໍາຕ່າງໆ ກ່ຽວກັບວຽກງານແກ້ໄຂຢາເສບຕິດ; ປັບປຸງກົງຈັກການຈັດຕັ້ງ ແລະ ຍົກລະດັບ ຄວາມຮູ້ຄວາມສາມາດໃນການເຄື່ອນໄຫວເຮັດໜ້າທີ່ຂອງ ກໍາລັງ ປກສ ເມືອງສັງທອງ ທີ່ພົວພັນກັບການແກ້ໄຂບັນຫາຢາເສບຕິດ; ຍົກສູງປະສິດທິພາບດ້ານການຄຸ້ມຄອງເປົ້າໝາຍ, ຊີ້ນໍາ-ບັນຊາ ແລະ ຈັດຕັ້ງປະຕິບັດວຽກງານແກ້ໄຂເປົ້າໝາຍຢາເສບຕິດ; ສົມທົບກັບຂະແໜງການຂັ້ນເມືອງ ເພື່ອປັບປຸງຂີດຄວາມສາມາດເຮັດໜ້າທີ່ການເມືອງຂອງບັນດາຂະແໜງການຂັ້ນເມືອງ ແລະ ບ້ານໃນການແກ້ໄຂບັນຫາຢາເສບຕິດ ແລະ ວຽກງານພົວພັນກັບເຈົ້າໜ້າທີ່ຕໍາຫຼວດ ແລະ ອົງການປົກຄອງຂອງບັນດາເມືອງ ທີ່ມີຊາຍແດນຕິດຈອດກັບເມືອງສັງທອງໃນວຽກງານແກ້ໄຂບັນຫາຢາເສບຕິດ.

 

Off

Comments are closed.