10th Dec2021

ທະນາຄານແຫ່ງ ສປປ ລາວ ຮວ່ມມືກັບ ອົງການປະກັນ ສັງຄົມແຫ່ງຊາດ ໃນການເຂົ້າລະບົບປະກັນສັງຄົມ

by Peaung Thanonkeo

ໃນວັນທີ່ 09 ທັນວາ 2021ນີ້ ທີ່ທະນາຄານແຫ່ງ ສປປ ລາວ ນະຄອນຫລວງວຽງຈັນ, ໄດ້ມີພິທີເຊັນ ບົດບັນທຶກຄວາມເຂົ້າໃຈ ກ່ຽວກັບການເຂົ້າປະກັນສັງຄົມ ລະຫວ່າງ ທະນາຄານແຫ່ງ ສປປ ລາວ  ກັບອົງການ ປະກັນສັງຄົມ ແຫ່ງຊາດ ໂດຍການເຂົ້າຮວ່ມຂອງ   ທ່ານ ນາງ ໃບຄຳ ຂັດທິຍະ ລັດຖະມົນຕີ ກະຊວງແຮງງານ ແລະ ສະຫວັດດີ ການສັງຄົມ ແລະ ທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ, ມີບັນດາທ່ານຫົວໜ້າກົມ, ຮອງກົມ ອ້ອມຂ້າງທະນາຄານ ແຫ່ງ ສປປ ລາວ ເຂົ້າຮວ່ມ.

ຕາງໜ້າເຊັນໂດຍ, ທ່ານ ນາງ ແກ້ວ ຈັນທະວີໄຊ ຫົວໜ້າອົງການປະກັນ ສັງຄົມແຫ່ງຊາດ ແລະ ທ່ານ ເພັດສະຖາພອນ ແກ້ວວິຈິດ  ຫົວໜ້າຫ້ອງການ ທະນາຄານແຫ່ງ ສປປ ລາວ.

ການເຊັນບົດບັນທຶນດັ່ງກ່າວ, ເພື່ອເປັນຫລັກຄໍ້າປະກັນ ສິດຜົນປະໂຫຍດ ທາງດ້ານສະຫວັດດີການ ໃຫ້ແກ່ພະນັກງານ ຜູ້ອອກແຮງງານທັງພາກລັດ ແລະ ເອກະຊົນ ໃນເວລາປະສົບເຄາະຮ້າຍ ຈາກອຸປັດຕິເຫດ, ການເຈັບ-ປ່ວຍ, ເຖົ້າແກ່ສະລາ ຕະຫລອດເຖິງການເສຍຊີວິດ ແລະ ອື່ນໆ. ພ້ອມທັງແນໃສ່ເບິ່ງແຍງຊີວິດ ການເປັນຢູ່ຂອງພະນັກງານ ໃຫ້ດີຂຶ້ນເປັນກ້າວໆ ທັງເປັນການປະກອບສ່ວນເຂົ້າໃນ ການພັດທະນາ ປະເທດຊາດນຳອີກ. ເຊິ່ງການເຂົ້າລະບົບປະກັນສັງຄົມ ຂອງທະນະຄານ ແຫ່ງ ສປປ ລາວ ແມ່ນຈະໄດ້ເລີ່ມແຕ່ ເດືອນ ມັງກອນ ປີ 2022 ເປັນຕົ້ນໄປ ພະນັກງານແຕ່ລະຄົນ ຈະໄດ້ເຂົ້າສູ່ລະບົບ ປະກັນສັງຄົມຕາມກົດໝາຍ ວ່າດ້ວຍການປະກັນສັງຄົມຮູບແບບລັດຖະກອນ, ໂດຍມີການຂຶ້ນທະບຽນ ມອບເງິນສົມທົບ ຕາມລະບຽບການ ແລະ ຮັບນະໂຍບາຍ ສະຫວັດດີການ ຕາມທີ່ໄດ້ກໍານົດ ໃນລະບຽບກົດໝາຍ.

ໃນພິທີດັ່ງກ່າວ, ທ່ານ ນາງ ໃບຄຳ ຂັດທິຍະ ໄດ້ມີຄຳເຫັນວ່າ: ທັງສອງພາກສ່ວນຈະພ້ອມກັນປະຕິບັດພັນທະ ແລະ ນະໂຍບາຍຕາມລະບຽບກົດໝາຍ ໃຫ້ໄດ້ຮັບປະສິດທິພາບ ປະສິດຕິຜົນສູງ ເພື່ອໃຫ້ພະນັກງານທຸກຄົນ ໄດ້ຮັບຜົນປະໂຫຍດ ດ້ານສະຫວັດດີການຢ່າງທົ່ວເຖິງ, ພ້ອມກັນປຶກສາຫາລື ໃຫ້ການຊ່ວຍເຫລືອເຊິ່ງກັນ ແລະ ກັນ ໃນການແກ້ໄຂບັນຫາ ທີ່ອາດຈະເກີດຂຶ້ນ ເວລາຈັດຕັ້ງປະຕິບັດວຽກງານ, ມີການປຶກສາຫາລືຖອດຖອນບົດຮຽນ ແລະ ແກ້ໄຂບັນຫາທີ່ພົວພັນເຖິງສິດ, ຜົນປະໂຫຍດ ທີ່ເຫັນວ່າບໍ່ສອດຄ່ອງ, ຮ່ວມກັນຄົ້ນຄວ້າ, ກໍານົດ ແລະ ປັບປຸງຜົນປະໂຫຍດທີ່ກ່ຽວຂ້ອງ, ສົ່ງເສີມ ຊຸກຍູ້ວຽກງານປະກັນສັງຄົມ ໃຫ້ດີຂຶ້ນເປັນກ້າວໆ. ພ້ອມນີ້, ທ່ານ ຍັງໄດ້ສະແດງ ຄວາມຍ້ອງຍໍຊົມເຊີຍ ມາຍັງຄະນະພັກຄະນະນໍາ ທະນາຄານແຫ່ງ ສປປ ລາວ ທີ່ຍາມໃດກໍ່ເປັນຫ່ວງເປັນໄຍ ນໍາການປະຕິບັດນະໂຍບາຍ ດ້ານສະຫວັດດີການ ຂອງພະນັກຂອງຕົນ ແລະ ຊີ້ນໍາ-ນໍາພາ ຢ່າງໄກ້ຊິດ ໃນການຄົ້ນຄວ້າການເຂົ້າສູ່ ລະບົບປະກັນສັງຄົມ ຈົນມາຮອດມື້ນີ້.

Off

Comments are closed.