11th Dec2021

ແຂວງ ເຊກອງ ປະກາດອະໄພຍະໂທດ ປະຈຳປີ 2021

by Peaung Thanonkeo

ວັນທີ 10 ທັນວາ 2021 ທີ່ຄ້າຍຂຸມຂັງ-ດັດສ້າງ ກອງບັນຊາການ ປກສ ແຂວງເຊກອງ ໄດ້ຈັດພິທີປະກາດ ໃຫ້ອະໄພຍະໂທດ ແລະ ຫລຸດຜ່ອນໂທດໃຫ້ນັກໂທດ ທີ່ມີຄວາມກ້າວໜ້າ ເນື່ອງໃນໂອກາດວັນຊາດທີ 2 ທັນວາ ຄົບຮອບ 46 ປີ ໂດຍມີ ທ່ານ ຄໍາບາງ ພະສະແຫວງ ຫົວໜ້າອົງການໄອຍະການປະຊາຊົນແຂວງ, ຮອງປະທານຄະນະກໍາມະການອະໄພຍະໂທດຂັ້ນແຂວງ,  ພັນເອກ ທະວີສັກ ເພັດພູຫລວງ ຮອງຫົວໜ້າກອງບັນຊາການ ປກສ ແຂວງ,  ພັນໂທ ສົມຫວັງ ກວດແກ້ວມະນີວົງ ຫົວໜ້າຄ້າຍຂຸມຂັງ-ດັດສ້າງ, ມີ ຄະນະກໍາມະການອະໄພຍະໂທດຂັ້ນແຂວງ ແລະ ພາກສ່ວນກ່ຽວຂ້ອງເຂົ້າຮ່ວມ.

ໃນພິທີໄດ້ຜ່ານບົດສະຫລຸບຕີລາຄາໂດຍຫຍໍ້ ກ່ຽວກັບການຈັດຕັ້ງປະຕິບັດວຽກງານອະໄພຍະໂທດປະຈໍາປີ 2021 ແລະ ວາງທິດທາງແຜນການວຽກງານຈຸດສຸມປີ 2022, ຜ່ານລັດຖະດໍາລັດຂອງປະທານປະເທດ ສະບັບເລກທີ 219/ປປທ, ລົງວັນທີ 19 ພະຈິກ 2021 ວ່າດ້ວຍການໃຫ້ອະໄພຍະໂທດ ແກ່ນັກໂທດທີ່ມີຄວາມກ້າວໜ້າ ໃນຂອບເຂດທົ່ວປະເທດ ເນື່ອງໃນໂອກາດວັນຊາດທີ 2 ທັນວາ 2021 ຄົບຮອບ 46 ປີ ສະເພາະແຂວງເຊກອງມີນັກໂທດທີ່ມີເງື່ອນໄຂໄດ້ຮັບການອະໄພຍະໂທດ ແລະ ຫລຸດຜ່ອນໂທດທັງໝົດ 37 ຄົນ, ຍິງ 4 ຄົນ.

ໂອກາດນີ້, ທ່ານ ຄໍາບາງ ພະສະແຫວງ ໄດ້ມີຄໍາເຫັນ ຍ້ອງຍໍຊົມເຊີຍມາຍັງຄະນະກໍາມະການອະໄພຍະໂທດຂັ້ນແຂວງ ທີ່ເອົາໃຈໃສ່ຄົ້ນຄວ້າ ການອະໄພຍະໂທດໃຫ້ແກ່ນັກ ໂທດທີ່ມີຄວາມກ້າວໜ້າຢ່າງຖືກຕ້ອງ, ພາວະວິໄສ ແລະ ມີຄວາມເປັນທໍາ. ພ້ອມນີ້, ທ່ານຍັງໄດ້ເນັ້ນໃຫ້ນັກໂທດແຕ່ລະຄົນ ສືບຕໍ່ເປັນເຈົ້າການຝຶກຝົນຫລໍ່ຫລອມຕົນເອງ ໃຫ້ກາຍ ເປັນຄົນດີ, ປະຕິບັດກົດລະບຽບຂອງຄ້າຍຂຸມຂັງ-ດັດສ້າງ ແລະ ລະບຽບກົດໝາຍຂອງພັກ -ລັດວາງອອກຢ່າງເຂັ້ມງວດ ເພື່ອສ້າງໃຫ້ຕົນເອງໃຫ້ກາຍເປັນພົນລະເມືອງທີ່ດີ, ມີຄວາມກ້າວໜ້າ ເພື່ອໃຫ້ໄດ້ຮັບນະໂຍບາຍການອະໄພຍະໂທດໃນປີຕໍ່ໄປ, ພາຍຫລັງຫລຸດພົ້ນໂທດ ແລະ ຖືກປ່ອຍຕົວແລ້ວ ຈົ່ງປະຕິບັດຕົນໃຫ້ກາຍເປັນລູກທີ່ດີຂອງພໍ່-ແມ່, ເປັນພົນລະເມືອງດີຂອງຊາດ, ຕັ້ງໜ້າພັດທະນາຊີວິດການເປັນຢູ່ຂອງຄອບຄົວ ໃຫ້ຖືກຕ້ອງຕາມແນວທາງນະໂຍບາຍຂອງພັກ-ລັດ, ປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ນັບມື້ຈະເລີນກ້າວຂຶ້ນ.

Off

Comments are closed.