11th Dec2021

ສປປ ລາວ ກຽມແຜນເປີດປະເທດ ຕ້ອນຮັບນັກທ່ອງທ່ຽວ ຕົ້ນປີ 2022

by Peaung Thanonkeo

ໃນ​ວັນ​ທີ່ 10 ທັນວາ 2021 ນີ້, ກະຊວງ​ຖະ​ແຫລ​ງຂ່າວ ວັດທະນະທຳ ​ແລະ ທ່ອງ​ທ່ຽວ  ຮ່ວມ​ກັບ ສະພາ​ການ​ຄ້າ ​ແລະ ອຸດສາຫະກຳແຫ່ງຊາດ​ລາວ ​ໄດ້​ຈັດ​ຕັ້ງກອງ​ປະ​ຊຸມ ປຶກສາ​ຫາລືກັບ​ພາກ​ລັດ ​ແລະ ພາກ​ທຸລະ​ກິດ​ຂັ້ນ​ສູນ​ກາງ ​ແລະ ​ແຂວງ​ເປົ້າ​ໝາຍ ​ເພື່ອ​ກະ​ກຽມ​ແຜນ​ເປີດ​ປະ​ເທດ ຕ້ອນຮັບ​ນັກ​ທ່ອງ​ທ່ຽວ. ​ໂດຍ​ມີ​ ທ່ານນາງ ແພງຈັນ ແພງເມືອງ ຫົວໜ້າກົມແຜນການ ແລະ ການຮ່ວມມືສາກົນກະຊວງ ຖະແຫຼງຂ່າວວັດທະນາທຳ ແລະ ທ່ອງທ່ຽວ, ພ້ອມ​ດ້ວຍຜູ້ຕາງໜ້າ ຈາກ​ຂະ​ແໜງ​ການ​ທີ່​ກ່ຽວຂ້ອງ ອ້ອມ​ຂ້າງ​ສູນກາງ ​ແລະ ບັນດາ​ແຂວງ​ເປົ້າ​ໝາຍ ​ ​ເຂົ້າ​ຮ່ວມແບບ​​ເຊິ່ງໜ້າ ​ແລະ ​ແບບອອນ​ລາຍ.

ກອງປະຊຸມ ​ໃນ​ຄັ້ງ​ນີ້, ​ໄດ້ປຶກສາຫາລືກັນ​ ໃນ​ຫລາຍ​ບັນຫາ​ສຳຄັນ ໂດຍສະເພາະ ການກໍານົດເຂດ ແລະ ກິດຈະກຳ ການບໍລິການ ໃນເຂດທ່ອງທ່ຽວສີຂຽວ ຢູ່ແຂວງເປົ້າໝາຍ ​ເປັນ​ຕົ້ນນະຄອນຫລວງວຽງຈັນ, ເມືອງວັງວຽງ ແຂວງວຽງຈັນ, ແຂວງຈໍາປາສັກ, ແຂວງຫລວງພະບາງ, ແຂວງຄໍາມ່ວນ ​ແລະ ແຂວງໄຊຍະບູລີ, ​ຄາດ​ວ່າ ຈະ​ເປີດໃນ ເດືອນມັງກອນ 2022 ທີ່​ຈະ​ມາ​ເຖິງ​ນີ້. ກອງປະຊຸມ​ໃນ​ຄັ້ງ​ນີ້,  ແລະ ເປັນພື້ນຖານໃຫ້ແກ່ ການໂຄສະນາປະຊາສໍາພັນ ໃຫ້ນັກທ່ອງທ່ຽວຮັບຮູ້ຂໍ້ມູນຕ່າງໆ ກ່ອນເຂົ້າມາທ່ອງທ່ຽວ ສປປ ລາວ. ​ໂອກາດ​ດັ່ງ​ກ່າວ, ທ່ານນາງ ແພງຈັນ ແພງເມືອງ ລາຍ​ງານ​ໃຫ້​ຮູ້​ວ່າ: ໃນໄລຍະທີ່ຜ່ານມາ ລັດຖະບານ ໄດ້ມີການກຳນົດ ນະໂຍບາຍດ້ານຕ່າງໆ ເພື່ອແກ້ໄຂ ສະພາບວິກິດ ການທາງດ້ານເສດຖະກິດ ທີ່ໄດ້ຮັບຜົນກະທົບ ຈາກການລະບາດຂອງພະຍາດ ໂຄວິດ-19 ຢ່າງຕໍ່ເນື່ອງ, ພ້ອມ​ທັງໄດ້ຄົ້ນຄ້ວາ ກະກຽມເປີດປະເທດ ເພື່ອຕ້ອນຮັບນັກທ່ອງທ່ຽວ, ​ໂດຍມອບໃຫ້ກະຊວງຖະແຫລງຂ່າວ ວັດທະນະທຳ ແລະ ທ່ອງທ່ຽວ ເປັນໃຈກາງ ໃນການປະສານສົມທົບ ກັບພາກສ່ວນທີ່ກ່ຽວຂ້ອງ ໃນການຄົ້ນຄ້ວາແຜນກະກຽມ ໃນການເປີດປະເທດ ເພື່ອຕ້ອນຮັບນັກທ່ອງທ່ຽວ ໃຫ້ມີຄວາມປອດໄພ. ​​ໃນ​ໄລຍະ​ຜ່ານ​ມາ ໄດ້ມີການປຶກສາຫາລື ລະຫວ່າງພາກລັດ ແລະ ພາກທຸລະກິດ ຂຶ້ນຫລາຍ​ຄັ້ງ ​ໂດຍສະເພາະ ແມ່ນການກໍານົດເງື່ອນໄຂ, ນິຕິກໍາຂອງລັດຖະບານ ແລະ ຄວາມພ້ອມຂອງ ພາກທຸລະກິດ ໃນການຮອງຮັບໃຫ້ ແກ່ການເປີດປະເທດ, ພ້ອມທັງກໍານົດແຜນວຽກ ໃນການກະກຽມຄວາມພ້ອມ ຂອງແຕ່ ລະຂະແໜງການ ເພື່ອຕ້ອນຮັບນັກທ່ອງທ່ຽວ ທີ່ໄດ້ຮັບການຊັກຢາວັກຊີນຄົບໂດສ.

ໂອກາດນິີ້, ທ່ານນາງ ແພງຈັນ ແພງເມືອງ ຍັງ​ໄດ້ຮຽກຮ້ອງໃຫ້ທຸກພາກສ່ວນ ຊ່ວຍປະກອບຄໍາຄິດເຫັນ ຢ່າງກົງໄປກົງມາ ດ້ວຍເຫດຜົນ, ສ້າງສັນ ແລະ ມີຄວາມຮັບຜິດຊອບສູງ ​ເພື່ອເຮັດໃຫ້ການປຶກສາຫາລື ການເປີດປະເທດ ເພື່ອຕ້ອນຮັບນັກທ່ອງທ່ຽວ ໃຫ້ມີເນື້ອໃນທີ່ຄົບຖ້ວນ ແລະ ຂັ້ນຕອນທີ່ກະທັດຮັດ ເນັ້ນໃສ່ການເດີນທາງທ່ອງທ່ຽວ ທີ່ມີຄວາມ ຮັບປະກັນ ຄວາມປອດໄພ, ສ້າງຄວາມເຊື່ອໝັ້ນໃຫ້ນັກທ່ອງທ່ຽວ ເພື່ອຜັນຂະຫຍາຍທິດຊີ້ນຳຂອງຂັ້ນເທິງ ໃຫ້ມີຜົນ ສັກສິດ. ສຳລັບ ເງື່ອນໄຂການເປີດເຂດທ່ອງທ່ຽວສີຂຽວ, ນັກທ່ອງທ່ຽວທັງພາຍໃນ ແລະ ຕ່າງປະເທດ ທີ່ສາມາດເຂົ້າມາ ໃນເຂດ ທ່ອງທ່ຽວສີຂຽວ ຕ້ອງໄດ້ຮັບການ ສັກວັກຊີນຄົບໂດສ ຢ່າງໜ້ອຍ 14 ວັນ ກ່ອນການເດີນທາງ, ນັກທ່ອງທ່ຽວຕ່າງປະເທດ ຕ້ອງສະໝັກບັດ ຜ່ານເຂດທ່ອງທ່ຽວສີຂຽວ ໂດຍປະກອບຂໍ້ມູນຕ່າງໆ ໃສ່ແບບຟອມອອນລາຍ ຈາກເວັບໄຊທາງການ eVisa, ຕ້ອງກວດຫາເຊື້ອ​ໂຄ​ວິດ-19 ດ້ວຍເຄື່ອງກວດ RT-PCR ຢ່າງໜ້ອຍ 72 ຊົ່ວໂມງ ກ່ອນເດີນທາງ ແລະ ຕ້ອງຖືກເກັບຕົວຢ່າງ ກວດຫາເຊື້ອອີກຄັ້ງ ເມື່ອມາຮອດ ສປປ ລາວ; ດາວໂຫລດ app ຕິດຕາມຂໍ້ມູນຕິດຕໍ່ ທີ່ນຳໃຊ້ສະດວກ ກັບລະຫັດ QR ໃນເວລາແຈ້ງ ເຂົ້າສະຖານທີ່ ທີ່ໄດ້ຮັບການອະນຸມັດແລ້ວ, ສະແດງຫລັກຖານການສັກວັກຊີນ ກ່ອນການເຂົ້າ ເຂດທ່ອງທ່ຽວ ສີຂຽວ ​ແລະ​ ອື່ນໆ.

 

Off

Comments are closed.