14th Dec2021

ສະເຫຼີມສະຫຼອງ ວັນສ້າງຕັ້ງແຂວງວຽງຈັນ ຄົບຮອບ 40 ປີ

by Peaung Thanonkeo

ແຂວງວຽງຈັນ ໄດ້ຈັດຕັ້ງພິທີສະເຫຼີມສະຫຼອງ ວັນສ້າງຕັ້ງແຂວງວຽງຈັນ ຄົບຮອບ 40 ປີ ຂຶ້ນ ທີ່ສະໂມສອນໃຫຍ່ຂອງແຂວງ ໃນວັນທີ 13 ທັນວານີ້ ໂດຍເປັນກຽດເຂົ້າຮ່ວມຂອງ ທ່ານ ກິແກ້ວ ໄຂຄໍາພິທູນ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ; ມີບັນດາທ່ານພະນັກງານບຳນານ, ອະດີດການນໍາແຂວງວຽງຈັນ ແລະ ບັນດາຄະນະນຳແຂວງວຽງຈັນເຂົ້າຮ່ວມ.ໃນພິທີ, ທ່ານ ຄໍາພັນ ສິດທິດໍາພາ ກຳມະການສູນກາງພັກ ເລຂາພັກແຂວງ ເຈົ້າແຂວງວຽງຈັນ ໄດ້ຜ່ານ ວ່າ: ການຈັດພິທີຄັ້ງນີ້ ກໍເພື່ຶອເປັນການອອກແຮງແຂ່ງຂັນສ້າງຜົນງານ, ສ້າງຂະບວນການຂ່ຳນັບຮັບຕ້ອນວັນສ້າງຕັ້ງແຂວງວຽງຈັນ ຄົບຮອບ 40 ປີ ແລະ ພ້ອມກັນສຸມໃສ່ຈັດຕັ້ງປະຕິບັດມະຕິກອງປະຊຸມໃຫຍ່ອົງຄະນະພັກແຂວງ ຄັ້ງທີ VI ແລະ ມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ຕິດພັນກັບບັນຍາກາດແຫ່ງການສະເຫຼີມສະຫຼອງ ວັນສະຖາປະນາ ສປປ ລາວ ຄົບຮອບ 46 ປີ, ວັນຄ້າຍວັນເກີດ ປະທານ ໄກສອນ ພົມວິຫານ ຄົບຮອບ101 ປີ ແລະ ຊົມເຊີຍຜົນສໍາເລັດການກໍ່ສ້າງ ແລະ ເປີດການນໍາໃຊ້ເສັ້ນທາງລົດໄຟລາວ-ຈີນ. ພິທີໃນມື້ນີ້, ເຕັມໄປດ້ວຍຄວາມເບີກບານມ່ວນຊື່ນ, ປ່ຽມລົ້ນໄປດ້ວຍຄວາມ ເອກອ້າງທະນົງໃຈ ຕໍ່ຜົນສໍາເລັດອັນໃຫຍ່ຫຼວງທີ່ທົ່ວພັກ, ທົ່ວກອງທັບ ແລະ ປະຊາຊົນບັນດາເຜົ່າເວົ້າລວມ, ເວົ້າສະເພາະຊາວແຂວງວຽງຈັນ ຍາດມາໄດ້ໃນໄລຍະຜ່ານມາ ແລະ ທັງເປັນການສະແດງເຖິງຄວາມອາໄລຮັກຢ່າງສຸດຊຶ້ງ ຄະນຶງເຖິງ ທ່ານປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກ ຂອງຊາດລາວວິລະຊົນ, ລູກຜູ້ປະເສີດຂອງປະຊາຊົນລາວຜູ້ພິລະອາດຫານ ແລະ ສະແດງຄວາມຮູ້ບຸນຄຸນໃຫຍ່ຫຼວງ ແລະ ອາໄລອາວອນ ຢ່າງສຸດຊຶ້ງ ເຖິງບັນດາສະຫາຍອະດີດການນໍາຂອງພັກ-ລັດ, ອະດີດການນຳຂອງແຂວງວຽງຈັນ, ບັນດາສະຫາຍສະມາຊິກພັກ, ພະນັກງານ, ນັກຮົບປະຕິວັດ, ປະຊາຊົນບັນດາເຜົ່າ ທີ່ໄດ້ເສຍສະຫຼະຊີວິດ ເພື່ອພາລະກິດປະຕິວັດ, ເພື່ອຄວາມຈະເລີນຮຸ່ງເຮືອງຂອງປະເທດຊາດ, ຄວາມຢູ່ເຢັນຜາສຸກ ກໍຄືຂອງປະຊາຊົນບັນດາເຜົ່າໂດຍສະເພາະ ກໍຄື ແຂວງວຽງຈັນ.

ໃນພິທີ, ທ່ານ ກິແກ້ວ ໄຂຄໍາພິທູນ ໄດ້ປະດັບຫຼຽນໄຊອິດສະຫຼະ ຊັ້ນ I ໃຫ້ແຂວງວຽງຈັນ ພ້ອມນີ້, ໃນພິທີຍັງໄດ້ມີການປະດັບຫຼຽນໄຊແຮງງານ ຊັ້ນ II ໃຫ້ ບໍລິສັດ ມາລີນີ ຈຳກັດ ທີ່ມີຜົນງານດີເດັ່ນໃນການລົງທຶນກໍ່ສ້າງຂົວຂ້າມນໍ້າງື່ມ ຢູ່ ບ້ານປາກກະຍຸງ ເມືອງວຽງຄຳ ແຂວງວຽງຈັນ; ປະດັບຫຼຽນໄຊແຮງງານ ຊັ້ນ III ຈຳນວນ 2 ຫຼຽນ ໃຫ້ 2 ທ່ານ ທີ່ມີຜົນງານດີເດັ່ນ; ມອບໃບຢັ້ງຢືນຜົນງານໃຫ້ອະດີດການນໍາແຂວງວຽງຈັນ 6 ທ່ານ ທີ່ມີຜົນງານດີເດັ່ນໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ກໍຄືແຂວງວຽງຈັນ ໃຫ້ມີຄວາມຈະເລີນຮຸ່ງເຮືອງຂຶ້ນເລື້ອຍໆ ແລະ ມອບໃບຈາລຶກຜົນງານໃຫ້ບັນດາການນຳຮຸ່ນກ່ອນ.

Off

Comments are closed.