14th Dec2021

ເປີດກອງປະຊຸມການເງິນທົ່ວປະເທດ ປະຈຳປີ 2021

by Peaung Thanonkeo

ກະຊວງການເງິນ ໄດ້ເປີດກອງປະຊຸມສະຫຼຸບວຽກງານການເງິນທົ່ວປະເທດ ປະຈໍາປີ 2021 ແລະ ທິດທາງແຜນການປະຈໍາປີ 2022 ໃນວັນທີ 13 ທັນວານີ້ ທີ່ຫໍປະຊຸມແຫ່ງຊາດ (ຫຼັກ 6) ຜ່ານລະບົບກອງປະຊຸມທາງໄກ ໂດຍການເປັນປະທານຂອງທ່ານ ບຸນໂຈມ ອຸບົນປະເສີດ ກຳມະການສູນກາງພັກ ເລຂາຄະນະບໍລິຫານງານພັກ ລັດຖະມົນຕີກະຊວງການເງິນ, ມີບັນດາລັດຖະມົນຕີ, ຫົວໜ້າອົງການທຽບເທົ່າກະຊວງອ້ອມຂ້າງສູນກາງ, ເຈົ້າຄອງນະຄອນຫຼວງ, ບັນດາເຈົ້າແຂວງ ແລະ ແຂກຖືກເຊີນເຂົ້າຮ່ວມ.

ໂອກາດດັ່ງກ່າວ, ທ່ານ ບຸນໂຈມ ອຸບົນປະເສີດ ໄດ້ມີຄໍາເຫັນກ່າວເປີດກອງປະຊຸມ ຊຶ່ງໄດ້ຍົກໃຫ້ເຫັນສະພາບການຈັດຕັ້ງປະຕິບັດງົບປະມານແຫ່ງລັດປະຈຳປີ 2021 ມີທັງອັນພົ້ນເດັ່ນ ແລະ ສິ່ງທ້າທ້າຍເປັນຕົ້ນ: ການຍົກລະດັບການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນເປັນວາລະແຫ່ງຊາດ, ພ້ອມທັງສຸມໃສ່ປ້ອງກັນ ຄວບຄຸມ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ຢ່າງຕັ້ງໜ້າ, ເພື່ອຮັບປະກັນຊີວິດ ແລະ ສຸຂະພາບຂອງປະຊາຊົນກໍຄືແກ້ໄຂຜົນກະທົບຕໍ່ການພັດທະນາເສດຖະກິດ-ສັງຄົມ, ສາມາດຮັບປະກັນສະຖຽນລະພາບທາງດ້ານການເມືອງໄວ້ໄດ້ຢ່າງໜັກແໜ້ນ, ການພັດທະນາເສດຖະກິດ-ສັງຄົມສືບຕໍ່ດຳເນີນໄປຢ່າງຕໍ່ເນື່ອງ, ອັດຕາການເຕີບໂຕຂອງ GDP ຂະຫຍາຍໂຕໃນລະດັບ 2,8%. ພ້ອມນັ້ນ, ກໍເຫັນໄດ້ຈະແຈ້ງບັນຫາຂໍ້ຄົງຄ້າງທີ່ຕ້ອງສຸມໃສ່ແກ້ໄຂຢ່າງເອົາຈິງເອົາຈັງ ແລະ ເປັນລະບົບຄືອັດຕາແລກປ່ຽນສະກຸນເງິນຕ່າງໆ, ອັດຕາເງິນເຟີ້, ຄ່າຄອງຊີບ, ບັນຫາໜີ້ສິນສາທາລະນະ, ການເກັບລາຍຮັບເຂົ້າງົບປະມານ, ການຄຸ້ມຄອງ-ຈັດຫາວຽກເຮັດງານທຳ, ການຊຸກຍູ້ສົ່ງເສີມການຜະລິດໃຫ້ບັນລຸຕາມຄາດໝາຍທີ່ວາງໄວ້.

ນອກຈາກນີ້, ກອງປະຊຸມຍັງໄດ້ຮັບຟັງການສະເໜີບາງບັນຫາທີ່ຄວນເອົາໃຈໃສ່, ເພື່ອພ້ອມກັນຕີລາຄາສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປີ 2021, ການຈັດຕັ້ງປະຕິບັດແຜນງົບປະມານແຫ່ງລັດປີ 2021 ແລະ ທິດທາງແຜນການປີ 2022 ເປັນຕົ້ນ: ການຂຸດຄົ້ນທ່າແຮງບົ່ມຊ້ອນທີ່ເກັບເຂົ້າງົບປະມານແຫ່ງລັດຢ່າງພາວະວິໄສ, ຕີລາຄາບັນຫາທີ່ຕ້ອງຕັດສິນໃຈເດັດຂາດແກ້ໄຂ, ເພື່ອຂຸດຄົ້ນທຸກທ່າແຮງບົ່ມຊ້ອນໃຫ້ເພີ່ມຂຶ້ນຢ່າງຈະແຈ້ງ ແລະ ຊັດເຈນ, ພ້ອມກັນຄົ້ນຄວ້າ 14 ມາດຕະການທ້າຍປີ 2021 ແລະ 8 ມາດຕະການປີ 2022 ໃນການຄຸ້ມຄອງລາຍຮັບຕ້ານການຮົ່ວໄຫຼ, ຂຸດຄົ້ນທຸກທ່າແຮງບົ່ມຊ້ອນເຂົ້າງົບປະມານ ແລະ ນິຕິກຳຫຼາຍສະບັບທີ່ຈະສືບຕໍ່ປະກາດໃຊ້ໃນປີ 2022.

ທ່ານ ພູທະນູເພັດ ໄຊສົມບັດ ຮອງລັດຖະມົນຕີກະຊວງການເງິນ ໃຫ້ຮູ້ວ່າ: ໂດຍປະຕິບັດຕາມມະຕິຂອງສະພາແຫ່ງຊາດວ່າດ້ວຍການຮັບຮອງເອົາແຜນງົບປະມານແຫ່ງລັດປະຈໍາປີ 2021 ສະບັບເລກທີ 13/ສພຊ, ລົງວັນທີ 4 ພະຈິກ 2020, ຜ່ານການຈັດຕັ້ງປະຕິບັດແຜນງົບປະມານແຫ່ງລັດນັບແຕ່ວັນທີ 1 ມັງກອນ ຮອດ ວັນທີ 10 ທັນວາ 2021, ສາມາດປະຕິບັດລາຍຮັບໄດ້ທັງໝົດ 24.099 ຕື້ກີບ ເທົ່າກັບ 87% ຂອງແຜນປີ. ໃນນັ້ນ, ລາຍຮັບພາຍໃນ 21.491 ຕື້ກີບ ເທົ່າກັບ 85% ຂອງແຜນການປີ ແລະ ສ່ວນລາຍຮັບຈາກການຊ່ວຍເຫຼືອ ປະຕິບັດໄດ້ 2.607 ຕື້ກີບເທົ່າກັບ 108% ຂອງແຜນປີ; ສ່ວນຄາດຄະເນລາຍຮັບໝົດປີຈະສາມາດປະຕິບັດໄດ້ 26.957 ຕື້ກີບ ເທົ່າກັບ 98% ຂອງແຜນປີ.

ດ້ານລາຍຈ່າຍແມ່ນບໍ່ເກີນແຜນທີ່ສະພາແຫ່ງຊາດຮັບຮອງ ໂດຍຮັບປະກັນບັນດາລາຍຈ່າຍທີ່ຈໍາເປັນ ແລະ ບຸລິມະສິດຂອງລັດຖະບານໃຫ້ສາມາດເຄື່ອນໄຫວໄດ້ເປັນປົກກະຕິ. ສ່ວນການຂາດດຸນແມ່ນບົນພື້ນຖານການຄາດຄະເນລາຍຮັບຈະບໍ່ໄດ້ 2% ຫຼື ປະມານ 670 ຕື້ກີບ. ແຕ່ເຖິງຢ່າງໃດກໍຕາມການເກັບລາຍຮັບເຫັນວ່າຍັງເປັນສິ່ງທ້າທ້າຍ. ອີງໃສ່ໄລຍະເວລາທີ່ຍັງເຫຼືອແຕ່ນີ້ເຖິງທ້າຍປີຈະສູ້ຊົນເກັບລາຍຮັບຕື່ມ 2.542 ຕື້ກີບ ຫຼື 11%. ສະນັ້ນ, ຈະຕ້ອງໄດ້ສຸມໃສ່ປະຕິບັດບາງມາດຕະການຕົ້ນຕໍເພື່ອສູ້ຊົນເກັບລາຍຮັບໃຫ້ບັນລຸຕາມຄາດໝາຍ.

Off

Comments are closed.