14th Dec2021

ສານປະຊາຊົນສູງສຸດໄດ້ຮັບ ເຄື່ອງຊ່ວຍເຫຼືອເອເລັກໂຕຣນິກ ຈາກສະຖານທູດອາເມຣິກາ

by Peaung Thanonkeo

ສານປະຊາຊົນສູງສຸດ ໄດ້ຮັບການສະໜັບສະໜູນເປັນປະເພດເຄື່ອງເລັກໂຕຣນິກ ຈາກສະຖານທູດ ອາເມຣິກາ ປະຈຳ ສປປ ລາວ ໃນວັນທີ 13 ທັນວາ ນີ້ ໃຫ້ກຽດກ່າວມອບໂດຍທ່ານ ທ່ານ​ ປີເຕີ ​ເຮມອນ ເອກອັກຄະລັດຖະທູດ ແຫ່ງ ສະຫະລັດອາເມຣິກາ ປະຈຳ ສປປ ລາວ ແລະ ໃຫ້ກຽດກ່າວຮັບ ໂດຍທ່ານ ນາງ ວຽງທອງ ສີພັນດອນ ປະທານສານປະຊາຊົນສູງສຸດ ຊຶ່ງມີພະນັກງານສອງຝ່າຍເຂົ້າຮ່ວມ.

ເຄື່ອງທີ່ນຳມາມອບໃນຄັ້ງນີ້ເປັນປະເພດເຄື່ອງເອເລັກໂຕຣນິກ ລວມມູນຄ່າທັງໝົດ 198.140.000 ກີບ  ເພື່ອນຳໃຊ້ເຂົ້າໃນການປະຕິບັດໜ້າທີ່ວຽກງານຂອງສານປະຊາຊົນສູງສຸດ.

ທ່ານ​ ນາງ ວຽງທອງ ສີພັນດອນ ໄດ້ຕາງໜ້າໃຫ້ພະນັກງານ ສະແດງຄວາມຂອບໃຈເປັນຢ່າງສູງ ໄປຍັງ ລັດຖະບານ ແລະ ປະຊາຊົນ​ ອາເມ​ຣິກາ  ໂດຍຜ່ານ ສະຖານທູດ ອາເມຣິກາ ປະຈຳ ສປປ ລາວ ແລະ ເຄື່ອງຈຳນວນດັ່ງກ່າວ ຈະນຳໃຊ້ໃຫ້ມີປະສິດທິພາບ ແລະ ປະສິດທິຜົນສູງສຸດ ແລະ  ຈະຊ່ວຍເຮັດໃຫ້ ສາມາດປະຕິບັດ ກອງປະຊຸມທາງໄກຕ່າງໆສະດວກ ແລະ ມີປະສິດທິພາບສູງ ໃນໄລຍະທີ່ພະຍາດໂຄວິດ-19​ ພວມແຜ່ລະບາດຂະຫຍາຍເປັນວົງກວ້າງ ໃນປັດຈຸບັນ ໂດຍສະເພາະຢູ່ ນະຄອນຫຼວງວຽງຈັນ ແລະ ບັນດາເມືອງໃນຫຼາຍແຂວງທົ່ວປະເທດ  ແລະ ອວຍພອນໃຫ້ສາຍພົວພັນ ມິດຕະພາບ ແລະ ການຮ່ວມມື ລະຫວ່າງສອງປະເທດ ລາວ- ອາເມຣີກາ ນັບມື້ໄດ້ຮັບການຮັດແໜ້ນ ແລະ ເສີມຂະຫຍາຍຢ່າງບໍ່ຢຸດຢັ້ງ.

Off

Comments are closed.