15th Dec2021

ປະທານປະເທດ ມອບສານຕາຕັ້ງທູດລາວໄປ ປະຈຳຢູ່ຕ່າງປະເທດ

by somchan

ໃນວັນທີ 14 ທັນວາ 2021 ທີ່ນະຄອນຫລວງວຽງຈັນ, ທ່ານ ທອງລຸນ ສີສຸລິດ ປະ ທານປະເທດ ແຫ່ງ ສປປ ລາວ ໄດ້ມອບສານຕາຕັ້ງໃຫ້ທູດລາວ ໄປປະຈຳຢູ່ຕ່າງປະເທດ ຄື: ກຳປູເຈຍ, ໂອຕຣິດ, ຝຣັ່ງ ແລະ ອົດສະຕຣາລີ.

ທ່ານປະທານປະເທດ ທອງລຸນ ສີສຸລິດ ໄດ້ມອບສານຕາຕັ້ງໃຫ້ ທ່ານ ບົວແກ້ວ ພູມວົງໄຊ ຫົວໜ້າກົມຂ່າວ ກະຊວງການຕ່າງປະເທດ ເພື່ອໄປດໍາລົງຕໍາແໜ່ງເປັນເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳຣາຊະອານາຈັກກຳປູເຈຍ, ມອບສານຕາຕັ້ງໃຫ້ ທ່ານ ຄອນເພັງ ທຳມະວົງ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປປ ລາວ ໄປປະຈຳ ຢູ່ ສາທາລະນະລັດໂອຕຣິດ, ທ່ານ ຄຳອິນ ຄິດຈະເດດ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປປ ລາວ ໄປປະຈຳຢູ່ຝຣັ່ງ ແລະ ທ່ານ ສິນໃຈ ມະນີວັນ ຫົວໜ້າຫ້ອງການບໍລິການສະຖານທູດ ກະຊວງການຕ່າງປະເທດ ໄປດໍາລົງຕໍາແໜ່ງເປັນເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳອົດສະຕຣາລີ.

ໂອກາດດັ່ງກ່າວ, ທ່ານ ທອງລຸນ ສີສຸລິດ ປະທານປະເທດ ໄດ້ສະແດງຄວາມຍ້ອງຍໍຊົມເຊີຍຕໍ່ບັນດາທ່ານເອກອັກຄະລັດຖະທູດ ທັງ 4 ທ່ານ ທີ່ຈະໄປປະຕິບັດໜ້າທີ່ການທູດຢູ່ຕ່າງປະເທດ ຈົ່ງສືບຕໍ່ປະກອບສ່ວນເຂົ້າໃນການຮັດແໜ້ນ ແລະ ເສີມຂະຫຍາຍສາຍພົວພັນການທູດທີ່ມີມາແຕ່ດົນນານ ລະຫວ່າງ ສປປ ລາວ ແລະ ປະເທດເພື່ອນມິດໃຫ້ແໜ້ນແຟ້ນຍິ່ງຂຶ້ນ ແລະ ທ່ານປະທານປະເທດ ຍັງກ່າວວ່າ: ເປັນນັກການທູດຕ້ອງເປັນນັກການເມືອງ, ດຶງດູດການຮ່ວມມືທາງດ້ານເສດຖະກິດ, ການຄ້າ, ການລົງທຶນ ແລະ ເປັນນັກພັດທະນາຄວາມສຳພັນໃຫ້ດີ, ສ້າງຄວາມເປັນມິດກັບທຸກປະເທດ ກັບທຸກອົງການຈັດຕັ້ງທີ່ຕົນປະຕິບັດໜ້າທີ່ການທູດ ຢ່າງດີທີ່ສຸດ ແລະ ຫວັງຢ່າງຍິ່ງວ່າ ຈະປະຕິບັດຕາມໜ້າທີ່ ທີ່ໄດ້ຮັບມອບໝາຍໃຫ້ໄດ້ຮັບຜົນສຳເລັດ.

Off

Comments are closed.