15th Dec2021

ແຂວງຫລວງພະບາງ ຈັດພິທີອະໄພຍະໂທດ ແລະ ປ່ອຍຕົວນັກໂທດ.

by somchan

ໃນວັນທີ 13 ທັນວາ ປີ 2021  ແຂວງຫລວງພະບາງ ໄດ້ຈັດພິທີອະໄພຍະໂທດ ແລະ ປ່ອຍຕົວນັກໂທດກ່ອນກຳນົດຢູ່ທີ່ຄ້າຍຄຸມຂັງ-ດັດສ້າງ ປກສ ແຂວງຫຼວງພະບາງ,ໃຫ້ກຽດເຂົ້າຮ່ວມ ໂດຍທ່ານ ຊົ່ງຊົ່ວ ຊື່ນູ່ ຮັກສາການຫົວໜ້າອົງການໄອຍະການ ແຂວງຫຼວງພະບາງ ຮອງປະທານຄະນະກຳມະການອະໄພຍະໂທດຂັ້ນແຂວງ, ມີ ພັທ ສົມບູນ ທະນາວັນ ຄະນະພັກກອງບັນຊາການ ຮອງກອງບັນຊາການ ປກສ ແຂວງຫຼວງພະບາງ ແລະ ມີພະນັກງານ-ນັກຮົບ ຕະຫຼອດຮອດນັກໂທດທີ່ໄດ້ຮັບອະໄພຍະໂທດເຂົ້າຮ່ວມ.

ໃນພິທີດັ່ງກ່າວທ່ານ ເພັດສີດາ ແສງພະຈັນ ຮອງໄອຍະການແຂວງຫຼວງພະບາງ ຫົວໜ້າກອງເລຂາອະໄພຍະໂທດຂັ້ນແຂວງ ໄດ້ຂຶ້ນຜ່ານດຳລັດຂອງປະທານປະເທດ ວ່າດ້ວຍການອະໄພຍະໂທດປ່ອຍຕົວນັກໂທດກ່ອນກຳນົດ ໄລຍະປ້ອງກັນ, ຄວບຄຸມ ແລະ ການແຜ່ລະບາດຂອງພະຍາດໂຄວິດ 19 ປະຈຳປີ 2021, ຂໍ້ຕົກລົງອະໄພຍະໂທດຫຼຸດຜ່ອນໂທດ ຈຳນວນ 89 ຄົນ, ຍິງ 13 ຄົນ,ໃນນີ້ຕົກລົງອະໄພຍະໂທດປ່ອຍຕົວ ຈຳນວນ 03 ຄົນ, ເຊິ່ງເປັນການປະຕິບັດແນວທາງນະໂຍບາຍຂອງພັກ-ລັດ, ທັງເປັນການປະຕິບັດຄວາມເປັນມະນຸດສະທຳ ຕໍ່ນັກໂທດຜູ່ທີ່ມີຜົນງານດຸໝັ່ນ, ຫ້າວຫັນ ແລະ ປະຕິບັດລະບຽບຂອງຄ້າຍຄຸມຂັງ-ດັດສ້າງໄດ້ດີ, ມີຜົນງານໃນການເພີ່ມພູນຜະລິດຜົນ ແລະ ອື່ນໆ.

ຈາກນັ້ນກໍມີຕາງໜ້ານັກໂທດທີ່ຖືກອະໄພຍະໂທດປ່ອຍຕົວ ປະຕິຍານຕົນວ່າ ພວກຕົນເອງໄດ້ມີຄວາມກິນແໜງແຄງໃຈ ຕໍ່ການກະທຳຂອງຕົນເອງທີ່ຜ່ານມາ,ຈະຂໍປ່ຽນແປງແນວຄິດ,ການກະທຳທີ່ບໍ່ຖືກຕ້ອງ ເປັນການລະເມີດຕໍ່ລະບຽບກົດໝາຍ ກໍຄືຮີດຄອງປະເພນີອັນດີງາມຂອງຊາດ,ຈະເປັນເຈົ້າການນັບຖືລະບຽບກົດໝາຍຢ່າງເຂັ້ມງວດ, ໂດຍຈະເຝິກຝົນຫຼໍ່ຫຼອມຕົນເອງໃຫ້ກາຍເປັນຄົນດີຂອງສັງຄົມ ແລະ ຄອບຄົວ ແລະຈະບໍ່ກັບມາກະທຳຄວາມຜິດອີກ.

ໂອກາດດັ່ງກ່າວ ທ່ານ ຊົງຊົ່ວ ຊື່ນູ່ ຮັກສາການຫົວໜ້າອົງການໄອຍະການ ແຂວງຫຼວງພະບາງ ຮອງປະທານຄະນະກຳມະການອະໄພຍະໂທດຂັ້ນແຂວງ ກໍມີທິດຊີ້ນຳ ແລະ ໂອ້ລົມຫຼາຍບັນຫາ ເປັນຕົ້ນແມ່ນເນັ້ນໃຫ້ຜູ່ທີ່ຖືກປ່ອຍຕົວໃນຄັ້ງນີ້ ພາຍຫຼັງກັບຄືນສູ່ຄອບຄົວແລ້ວ ບໍ່ໃຫ້ມີແນວຄິດທໍ້ຖອຍ,ໃຫ້ສືບຕໍ່ສ້າງສາພັດທະນາເສດຖະກິດຄອບຄົວໃຫ້ຮັ່ງມີເຂັ້ມ,ຍຸຕິການກະທຳຜິດຕໍ່ລະບຽບກົດໝາຍ,ປະກອບສ່ວນເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບ,ເຄົາລົບນັບຖືລະບຽບກົດໝາຍ ແລະ ຮີດຄອງປະເພນີອັນດີງານຂອງຊາດ ແລະ ເນັ້ນໜັກໃຫ້ຜູ່ຖືກອະໄພຍະໂທດຫຼຸດຜ່ອນໂທດໃນຄັ້ງນີ້ ຈົ່ງສືບຕໍ່ປະຕິບັດລະບຽບຂອງຄ້າຍຄຸມຂັງ-ດັດສ້າງ,ເອົາໃຈໃສ່ເພີ່ມພູນຜະລິດຜົນ ແລະ ເອົາໃຈໃສ່ເຝິກຝົນຫຼໍ່ຫຼອມຕົນເອງໃຫ້ດີຂຶ້ນກວ່າເກົ່າ.

 

Off

Comments are closed.