16th Dec2021

ກະຊວງປ້ອງກັນຄວາມສະຫງົບ ຈັດກອງປະຊຸມສະຫຼຸບວຽກງານປະຈໍາປີ 2021 ແລະ ວາງທິດທາງແຜນການປີ 2022.

by somchan

ກອງປະຊຸມສະຫຼຸບການຈັດຕັ້ງປະຕິບັດວຽກງານປ້ອງກັນຄວາມສະຫງົບປີ 2021 ແລະ ວາງທິດທາງແຜນການວຽກງານຈຸດສຸມ ປີ 2022. ໄດ້ໄຂຂຶ້ນໃນວັນທີ 16 ທັນວານີ້, ພາຍໃຕ້ການເປັນປະທານຂອງ ພົອ ວິໄລ ຫຼ້າຄຳຟອງ ກຳມະການກົມການເມືອງສູນກາງພັກ ລັດຖະມົນຕີກະຊວງ ປ້ອງກັນຄວາມສະຫົງບ, ມີຮອງລັດຖະມົນຕີ, ບັນດາກົມກອງອ້ອມຂ້າງ ແລະ ບັນດາ ປກສ ແຂວງທົ່ວປະເທດເຂົ້າຮ່ວມ.

ໂອກາດດັ່ງກ່າວ ພົອ ວິໄລ ຫຼ້າຄໍາຟອງ ໄດ້ກ່າວເປີດກອງປະຊຸມຢ່າງເປັນທາງການເຊີ່ງທ່ານໄດ້ກ່າວວ່າ:

 

 

ຫຼັງຈາກນັ້ນ ພົຈວ ຈັນສະແຫວງ ທີບຄູນທອງ ຮອງຫົວໜ້າຫ້ອງວ່າການ ກະຊວງປ້ອງກັນຄວາມສະຫງົບ ໄດ້ຜ່ານຮ່າງບົດສະຫຼຸບການຈັດຕັ້ງປະຕິບັດວຽກງານປ້ອງກັນຄວາມສະຫງົບປີ 2021 ແລະ ທິດທາງແຜນການ ວຽກງານຈຸດສຸມປີ 2022 ເຊີ່ງທ່ານໄດ້ຍົກໃຫ້ເຫັນວ່າ ໃນໄລຍະ 1 ປີຜ່ານມາ ກະຊວງປ້ອງກັນຄວາມສະຫົງບ ໄດ້ສຸມໃສ່ຈັດຕັ້ງປະຕິບັດ 4 ຄາດໝາຍ, 4 ແຜນງານ ແລະ 41 ໂຄງການຂອງກະຊວງວາງອອກ ເຊີ່ງມີຜົນງານຫລາຍດ້ານ ໂດຍສະເພາະ ແມ່ນວຽກງານປ້ອງກັນຄວາມສະຫົງບທາງດ້ານການເມືອງ, ວຽກງານຮັກສາຄວາມເປັນລະບຽບຮຽບຮ້ອຍໃນສັງຄົມ ໄດ້ເອົາໃຈໃສ່ແກ້ໄຂປະກົດການຫຍໍ້ທໍ້ທາງສັງຄົມ, ແກ້ໄຂບັນດາລາຍຄະດີທີ່ໃຫຍ່ ແລະ ມີຄວາມຫຍຸ້ງຍາກສັບສົນໃຫ້ມີຄວາມຖືກຕ້ອງຕາມລະບຽບກົດໝາຍ ແລະ ສອດຄ່ອງກັບຫຼັກການວິຊາສະເພາະ, ເພື່ອເຮັດໃຫ້ຫາງສຽງຂອງສັງຄົມທີ່ມີການສົ່ງຂ່າວຕໍ່ເຈົ້າໜ້າທີ່ດຳເນີນຄະດີນັບມື້ຫຼຸດໜ້ອຍຖອຍລົງ, ສະແດງອອກ ໃນປີ 2021 ມີຄະດີອາຍາເກີດຂຶ້ນທົ່ວປະເທດ 6.554 ລາຍ, ແກ້ໄຂໄດ້ 5.066 ລາຍ, ກັກຕົວຜູ້ຖຶກຫາ 7.666 ຄົນ. ທຽບໃສ່ປີຜ່ານມາເພີ່ມຂຶ້ນ 345 ລາຍ,  ຄະດີທົ່ວໄປມີ 2.541 ລາຍ, ແກ້ໄຂໄດ້ 1.639 ລາຍ ແລະ ຄະດີຄ້າມະນຸດ 33 ລາຍ, ແກ້ໄຂໄດ້ 20 ລາຍ ເດັ່ນກ່ວາໝູ່ແມ່ນຄະດີຢາເສບຕິດ  ສາມາດແກ້ໄຂໄດ້ 3.407 ລາຍ, ຄະດີເສດຖະກິດ 351 ລາຍ ແລະ ລັກຊັບພົນລະເມືອງ 1.409 ລາຍ. ວຽກງານປັບປຸງ-ກໍ່ສ້າງກຳລັງປ້ອງກັນຄວາມສະຫງົບປະຊາຊົນໃຫ້ປອດໃສ, ເຂັ້ມແຂງໜັກແໜ້ນ ແລະ ມີແບບແຜນທັນສະໄໝ ໄດ້ສຸມໃສ່ປັບປຸງກໍ່ສ້າງພັກຕາມ 5 ຫັຼກການ ແລະ 3 ທິດນຳ ໂດຍຖືເອົາຄຸນນະພາບເປັນກົກ, ການຈັດຕັ້ງທຸກຂັ້ນ ແລະ ສະມາຊິກພັກທຸກສະຫາຍ ໄດ້ປະຕິບັດຫຼັກການລວມສູນປະຊາທິປະໄຕ ແລະ ກົດລະບຽບຂອງພັກຢ່າງເຂັ້ມງວດ, ຖືເອົາການສຳຫຼວດກວດກາ, ຕີລາຄາແບ່ງປະເພດສະມາຊິກພັກ ແລະ ຮາກຖານພັກ, ແກ້ໄຂບັນດາປະກົດການຫຍໍ້ທໍ້ທີ່ເກີດຂຶ້ນພາຍໃນພັກ, ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ. ປັບປຸງກົງຈັກການຈັດຕັ້ງບາງຫົວໜ່ວຍ ຢູ່ບັນດາກົມກອງອ້ອມຂ້າງກະຊວງ ແລະ ທ້ອງຖິ່ນ ຈຳນວນ 2.356 ຕຳແໜ່ງ, ຍິງ 289 ຕຳແໜ່ງ. ເອົາໃຈໃສ່ກໍ່ສ້າງ ແລະ ບຳລຸງວິຊາສະເພາະ ໃນລະດັບຕ່າງໆ ໄປຍົກລະດັບທາງດ້ານວິຊາສະເພາະ ແລະ ທິດສະດີຢູ່ພາຍໃນ ແລະ ຕ່າງປະເທດ ຈຳນວນ 2.823 ສະຫາຍ ແລະ ວຽກງານອື່ນໆ. ໃນກອງປະຊຸມຍັງຈະໄດ້ຮັບຟັງການລາຍງານການຈັດຕັ້ງປະຕິບັດວຽກງານວິຊາສະເພາະຂອງແຕ່ລະກົມກອງ ແລະ ບັນດາ ປກສແຂວງ. ກອງປະຊຸມຈະໄດ້ດຳເນີນເປັນເວລາ 2 ວັນຈື່ງສຳເລັດ.

 

Off

Comments are closed.