16th Dec2021

ຊຸກຍູ້, ຕິດຕາມ, ກວດກາການຈັດຕັ້ງປະຕິບັລັດຖະທໍາມະນູນ ແລະ ກົດໝາຍຢູ່ ປກສ ແຂວງ ບໍລິຄໍາໄຊ.

by somchan

ວັນທີ 14 ທັນວາ2021ນີ້ ທ່ານ ເລື່ອນວິໄລ ຈັນທະລາພັນ ຄະນະປະຈຳພັກແຂວງ, ຮອງປະທານສະພາປະຊາຊົນ ແຂວງ ບໍລິຄໍາໄຊ ພ້ອມດ້ວຍຄະນະໄດ້ລົງເຄື່ອນໄຫວຊຸກຍູ້ການຈັດຕັ້ງປະຕິບັດລັດຖະທຳມະນູນ ແລະ ກົດໝາຍ ຢູ່ກອງບັນຊາການ ປກສ ແຂວງບໍລິຄໍາໄຊ, ມີທ່ານ ພັນໂທ ເຄນວອນ ລໍວັນໄຊ ຄະນະພັກ, ຮອງຫົວໜ້າກອງບັນຊາການ ປກສ ແຂວງ, ມີບັນດາຄະນະຫ້ອງ, ຄ້າຍຄຸມຂັງ-ດັດສ້າງ, ພະນັກງານວິຊາການທີ່ກ່ຽວຂ້ອງເຂົ້າຮ່ວມ.

ພາຍຫລັງທີ່ຝ່າຍສະພາປະຊາຊົນ ມີຄໍາຖາມເຈາະຈິ້ມ, ຝ່າຍກອງຊັນຊາການ ປກສ ແຂວງ ກໍ່ໄດ້ພັດປ່ຽນກັນ ຜ່ານບົດລາຍງານຫຍໍ້ ການປະສານງານ, ການສ່ອງແສງລາຍງານລະຫວ່າງ ສະພາປະຊາຊົນແຂວງ ກັບ ກອງບັນຊາການ ປກສ ແຂວງ, ເຊີ່ງໄດ້ຍົກໃຫ້ເຫັນຂໍ້ສະດວກ, ຂໍ້ຫຍຸ້ງຍາກໃນການຈັດຕັ້ງປະຕິບັດວຽກງານດັ່ງກ່າວເຊິ່ງໄດ້ເຄື່ອນໄຫວຕາມພາລະບົດບາດ, ສິດ ແລະ ໜ້າທີ່ຄວາມຮັບຜິດຊອບ, ຍ້ອນການປະສານສົມທົບກັນລະຫວ່າງ ສະພາປະຊາຊົນ ແຂວງ ກັບກຳລັງປ້ອງກັນຄວາມສະຫງົບ ຢ່າງເປັນປົກກະຕິຕໍ່ເນື່ອງ, ຍ້ອນມີນິຕິກຳ, ກົດໝາຍ ເປັນບ່ອນອິງຈື່ງເຮັດໃຫ້ຂອດປະສານງານໃນການເຄືອນໄຫວຈັດຕັ້ງປະຕິບັດລັດຖະທໍາມະນູນ ແລະ ກົດໝາຍຢູ່ກອງບັນຊາການ ປກສ ແຂວງ ໄດ້ຮັບຜົນດີ, ຈາກນັ້ນບັນດາທ່ານທີ່ຕາງໜ້າໃຫ້ກັບຫ້ອງ, ຄ້າຍຄຸ້ມຂັງ-ດັດສ້າງ ໄດ້ຜັດປ່ຽນກັນຂື້ນລາຍງານສະພາບການເຄື່ອນໄຫວຈັດຕັ້ງປະຕິບັດວຽກງານດັ່ງກ່າວຢູ່ໃນຂອບເຂດຄວາມຮັບຜິດຊອບຂອງຕົນທີ່ຍັງມີຂໍ້ຄົງຄ້າງບາງດ້ານທີ່ຈະຕ້ອງໄດ້ປັບປຸງແກ້ໄຂໃຫ້ດີຂື້ນເຊັ່ນ: ວຽກງານການດຳເນີນຄະດີຕ່າງໆ, ການເຂົ້າ-ອອກເມືອງຜິດກົດໝາຍ, ການມາດຳເນີນທຸລະກິດ, ຄ້າ-ຂາຍ ແລະ ດໍາລົງຊີວິດຂອງຄົນຕ່າງປະເທດຢູ່ພາຍໃນແຂວງ ບໍລິຄໍາໄຊ, ການຍົກຍ້າຍຖີ່ນຖານຂອງປະຊາຊົນຈໍານວນໜຶ່ງຍັງບໍ່ຖືກຕ້ອງຕາມລະບຽບກົດໝາຍ ແລະ ບັນຫາອື່ນໆທີ່ນຳສະເໜີໃຫ້ປະທານ ແລະ ບັນດາຜູ້ເຂົ້າຮ່ວມກອງປະຊຸມໄດ້ຄົ້ນຄ້ວາປຶກສາຫາລືປັບປຸງແກ້ໄຂໃຫ້ດີຂື້ນເປັນກ້າວໆ.

ຕອນທ້າຍ ທ່ານ ເລື່ອນວິໄລ ຈັນທະລາພັນ ຮອງປະທານສະພາປະຊາຊົນ ແຂວງ ບໍລິຄໍາໄຊ ໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນໍາເຊິ່ງໄດ້ເໜັ້ນໜັກໃນການກວດກາຄຸ້ມຄອງຄົນຕ່າງປະເທດທີ່ມາດໍາເນີນທຸລະກິດ, ດໍາລົງຊີວິດຢູ່ພາຍໃນແຂວງ, ການເຂົ້າ-ອອກເມືອງໃຫ້ຖືກຕ້ອງຕາມລະບຽບກົດໝາຍ, ການດໍາເນີນການສືບສວນ-ສອບສວນ, ແກ້ໄຂຄະດີໃຫ້ຖືກຕ້ອງຍຸດຕິທໍາ, ເອົາໃຈໃສ່ກວດກາຕິດຕາມການຍົກຍ້າຍຖິ່ນຖານ, ການຂື້ນທະບຽນສໍາມະໂນຄົວ, ອອກບັດປະຈໍານວນໃຫ້ພົນລະເມືອງລາວ ແລະ ຊາວຕ່າງດ້າວໃຫ້ມີຄວາມຖືກຕ້ອງຕາມລະບຽບຫຼັກການຢ່າງເຂັ້ມງວດ, ເພີ່ມທະວີໃນການຄຸ້ມຄອງ, ສຶກສາອົບຮົມ, ຝຶກວິຊາຊີບໃຫ້ກັບບັນດານັກໂທດ-ດັດສ້າງໃຫ້ມີຄວາມຕື່ນຕົວເຄົາປະຕິບັດກົດລະບຽບຂອງຄ້າຍຄຸມຂັງ ແລະ ລະບຽບກົດໝາຍຢ່າງເຂັ້ມງວດ, ທັງໝົດນີ້ກໍ່ເພື່ອແນ່ໃສ່ເຮັດໃຫ້ການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍ ຢູ່ກອງບັນຊາການ ປກສ ແຂວງ ໄດ້ຮັບການຈັດຕັ້ງປະຕິບັດຢ່າງຖືກຕ້ອງ ແລະໄດ້ຮັບຜົນສໍາເລັດຢ່າງມີປະສິດທິຜົນສູງ.

Off

Comments are closed.