16th Dec2021

ປກສ ເມືອງຄູນຄໍາ ສະກັດລົດຂົນຄັນຊາອັດແທ່ງລວມນໍ້າໜັກ 352 ກິໂລກຼາມ

by somchan

ໃນວັນທີ 15 ທັນວາ 2021, ເຈົ້າໜ້າທີ່ ປກສ ເມືອງຄູນຄໍາ ແຂວງຄໍາມ່ວນ ສາມາດສະກັດລົດນິດສັນນາວາລາ ທີ່ຂົນສົ່ງກັນຊາອັດແທ່ງ ຈໍານວນ 9 ເປົາ ລວມນໍ້າໜັກ 352 ກິໂລກຼາມ ພ້ອມກັບຢາບ້າຈໍານວນໜຶ່ງ ແລະ ຜູ້ຖືກຫາອີກ 2 ຄົນ.

ເຈົ້າໜ້າທີ່ ປກສ ເມືອງຄູນຄໍາ ເປີດເຜີຍວ່າ: ພາຍຫຼັງທີ່ໄດ້ຮັບແຈ້ງຄວາມຈາກພົນລະເມືອງດີໃນວັນທີ 14 ທັນວາ 2021 ວ່າ: ຈະມີການຂົນສົ່ງຢາເສບຕິດ ມາແຕ່ເມືອງຄໍາເກີດ ແຂວງບໍລິຄໍາໄຊ ໂດຍຜ່ານ ເມືອງຄູນຄໍາ ແຂວງຄໍາມ່ວນ ຈຶ່ງໄດ້ລາຍງານຕໍ່ຄະນະພັກຄະນະກອງບັນຊາການ ປກສ ເມືອງ ຄູນຄໍາ ແລ້ວປະສານສົບກັບໜ່ວຍງານສະກັດກັ້ນ ແລະ ຕ້ານຢາເສບຕິດ ແລະ ກອງຈະລາຈອນ-ມອດໄຟ ບັນຈຸກໍາລັງລົງຕິດຕາມເປົ້າໝາຍດັ່ງກ່າວ; ມາຮອດເວລາ 6:40 ໂມງຂອງວັນທີ 15 ທັນວາ 2021 ຈຶ່ງໄດ້ພົບເຫັນລົດກະບະ ຍີ່ຫໍ້ NISSAN ສີຂາວໝາຍເລກທະບຽນ ກກ 6855 ຄໍາມ່ວນ ໄດ້ຂັບຂີ່ມາແຕ່ທາງ ຫຼັກ 20 ເມືອງຄໍາເກີດ ແຂວງບໍລິຄໍາໄຊ ຈະມຸ້ງໜ້າໄປທາງແບ່ງບ້ານວຽງຄໍາ  ເມືອງປາກກະດິງ  ແຂວງບໍລິຄໍາໄຊ ແລະ ພໍມາຮອດປ້ອມສາມແຍກກອງລໍ ເຈົ້າໜ້າທີ່ຕໍາຫຼວດ ປກສ ເມືອງຄູນຄໍາ ຈຶ່ງໄດ້ສະກັດກັ້ນ ລົດພ້ອມດ້ວຍຜູ້ຂັບຂີ່ທັງ 2 ຄົນຢູ່ໃນລົດຄັນດັ່ງກ່າວ ແລ້ວນໍາເຂົ້າໄປຫ້ອງການກອງບັນຊາການ ປກສ ເມືອງຄູນຄໍາ ແລ້ວສົມທົບກັບອົງການໄອຍະການປະຊາຊົນເຂດ 1 ປະຈໍາເມືອງຄູນຄໍາ, ອໍານາດການປົກຄອງບ້ານຄູນແກ້ວ ແລະ ພາກສ່ວນກ່ຽວຂ້ອງ ເພື່ອຮ່ວມກັນກວດຄົ້ນພະຫະນະຄັນດັ່ງກ່າວ. ຜ່ານການກວດຄົ້ນຕົວຈິງ ພົບເຫັນຢາເສບຕິດ ປະເພດກັນຊາແຫ້ງ (ອັດແທ່ງ) ຈໍານວນ 9 ເປົາ ມີນ້ໍາໜັກລວມ 352 ກິໂລກຼາມ ແລະ ກວດຄົ້ນຕົວ ທ້າວ ຄໍາຮອນ ພົບເຫັນຢາເສບຕິດ ປະເພດຢາບ້າ ຈໍານວນ 12 ເມັດ ຢູ່ຖົງໂສ້ງ.

ພວກຕ້ອງຫາທີ່ເຈົ້້າໜ້າທີ່ກັກຕົວໄດ້ 2 ຄົນມີ: ທ້າວ ຄໍາຮອນ ອາຍຸ 36 ປີ ຢູ່ບ້ານຫ້ວຍແກ້ວ ເມືອງຄໍາເກີດ ແຂວງບໍລິຄໍາໄຊ ແລະ ທ້າວ ສຸວັນໂນ ອາຍຸ 25 ປີ ຢູ່ບ້ານນາບົງ ເມືອງທ່າແຂກ  ແຂວງຄໍາມ່ວນ  ສ່ວນລົດແມ່ນອອກຊື່ ທ້າວ ສຸວັນໂນ; ຈາກນັ້ນຈຶ່ງໄດ້ສົ່ງພວກຖືກຫາ ພ້ອມດ້ວຍເຄື່ອງຂອງກາງ ແລະ ລົດຄັນດັ່ງກ່າວ ມອບໃຫ້ກອງບັນຊາການ ປກສ ແຂວງຄໍາມ່ວນ ສືບຕໍ່ດໍາເນີນຄະດີຕາມຂັ້ນຕອນຂອງກົດໝາຍ.

Off

Comments are closed.