17th Dec2021

ກະຊວງ ປກສ ສຸມໃສ່ການຈັດຕັ້ງປະຕິບັດວຽກງານໂຄສະນາເຜີຍແຜ່ ວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ.

by somchan

ພົຕ ວັນທອງ ກອງມະນີ ຮອງລັດຖະມົນຕີ ຫົວໜ້າກົມໃຫຍ່ການເມືອງປ້ອງກັນຄວາມສະຫົງບໄດ້ລາຍງານການຈັດຕັ້ງປະຕິບັດວຽກງານໂຄສະນາເຜີຍແຜ່ ວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ຕໍ່ກອງປະຊຸມການຈັດຕັ້ງປະຕິບັດວຽກງານປ້ອງກັນຄວາມສະຫົງບປີ 2021 ແລະ ທິດທາງແຜນການວຽກງານຈຸດສຸມປີ 2022 ວ່າ: ໃນໄລຍະຜ່ານມາ ກົມໃຫຍ່ການເມືອງປ້ອງກັນຄວາມສະຫງົບ ໄດ້ເອົາໃຈໃສ່ຈັດຕັ້ງປະຕິບັດວາລະດັ່ງກ່າວ ສາມາດສ້າງໄດ້ດ້ານດີຜົນງານຄື: ໄດ້ຄົ້ນຄ້ວາອອກແບບຄຳຂັວນໂຄສະນາຈຳນວນ 8 ຄຳຂັວນ, ແຜ່ນພັບ-ໂປຣເຕີ 2 ແບບ, ປ້າຍໂຄສະນາຜ່ານ LED ຈຳນວນ 7 ຮູບແບບ ແລະ ອື່ນໆ ພ້ອມທັງປະສານສົມທົບເປີດກອງປະຊຸມຮ່ວມກັບພາກສ່ວນກ່ຽວຂ້ອງ ແລະ ລົງສຳຫຼວດກວດກາສະຖານທີ່ຕິດປ້າຍໂຄສະນາຢູ່ 6 ແຂວງຄື: ນະຄອນຫຼວງວຽງຈັນ 10 ຈຸດ, ແຂວງບໍລິຄຳໄຊ 3 ຈຸດ, ແຂວງຄຳມ່ວນ 4 ຈຸດ, ແຂວງສະຫັວນນະເຂດ 6 ຈຸດ ແລະ ແຂວງຈຳປາສັກ 5 ຈຸດ. ໄດ້ປັບປຸງເຄື່ອງສົ່ງສັນຍານວິທະຍຸກຳລັງປ້ອງກັນຄວາມສະຫົງບຢູ່ບັນດາສະຖານີຕ່າງໆ ໃນຂອບເຂດທົ່ວປະເທດ ຈຳນວນ 5 ຈຸດ ເພື່ອຮັບປະກັນໃນການຈັດຕັ້ງເຜີຍແຜ່ຂໍ້ມູນຂ່າວສານຕ່າງໆອອກສູ່ສັງຄົມ, ເປັນຕົ້ນ: ໂຄສະນາຜົນຮ້າຍຂອງຢາເສບຕິດໃຫ້ມີຄວາມສະດວກ, ຊັດເຈນກ່ວາເກົ່າ, ໄດ້ຊຸກຍູ້ 3 ອົງການຈັດຕັ້ງມະຫາຊົນເພື່ອສ້າງລາຍການວິທະຍຸ, ໂທລະພາບຜ່ານສື່ມວນຊົນ ປກສ  ແນ່ໃສ່ຈັດຕັ້ງຜັນຂະຫຍາຍເນື້ອໃນ ວາລະແຫ່ງຊາດແກ້ໄຂບັນຫາຢາເສບຕິດໃຫ້ທົ່ວເຖິງທຸກເປົ້າໝາຍ. ລົງສຳພາດບັນດາກອງບັນຊາການ ປກສ ເມືອງ, ປກສກຸ່ມ ກ່ຽວກັບການແກ້ໄຂຢາເສບຕິດ ເພື່ອສ້າງລາຍການສົນທະນາພິເສດລົງສື່ວິທະຍຸ, ໂທລະພາບ ແລະ ສ້າງຄໍລໍ້າການແກ້ໄຂບັນຫາຢາເສບຕິດຢູ່ໜ້າໜັງສືພີມ ປກສ, ພ້ອມທັງໄດ້ຊີ້ນຳຈັດຕັ້ງສ້າງນັກຂ່າວ, ຕາໜ່າງຂ່າວລົງຕິດຕາມເກັບກຳການແກ້ໄຂບັນຫາຢາເສບຕິດ ຢູ່ບັນດາກົມກອງວິຊາສະເພາະ ເພື່ອຜະລິດລາຍການຕ້ານໄພຢາເສບຕິດຜ່ານສື່ຂອງກຳລັງປ້ອງກັນຄວາມສະຫົງບ ເພື່ອໃຫ້ທົ່ວສັງຄົມຮັບຮູ້, ເຂົ້າໃຈຮ່ວມແຮງຮ່ວມໃຈປະກອບສ່ວນສະກັດກັ້ນ ແລະ ແກ້ໄຂບັນຫາຢາເສບຕິດ.

Off

Comments are closed.