17th Dec2021

ປກສ 07 ຕົວເມືອງ ທົ່ວແຂວງ ບໍລິຄໍາໄຊ ເປີດຂະບວນການຈັດຕັ້ງຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ.

by somchan

ພິທີເປີດຂະບວນການຈັດຕັ້ງຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ຢູ່ກອງບັນຊາການ ປກສ  07 ຕົວເມືອງ ທົ່ວແຂວງ ບໍລິຄໍາໄຊ ຄື: ປກສ ເມືອງປາກຊັນ, ປກສ ເມືອງ ບໍລິຄັນ, ປກສ ເມືອງ ທ່າພະບາດ, ປກສ ເມືອງ ປາກກະດິງ, ປກສ ເມືອງ ຄໍາເກີດ, ປກສ ເມືອງ ວຽງທອງ ແລະ ປກສ ເມືອງ ໄຊຈໍາພອນ  ແຂວງ ບໍລິຄໍາໄຊ ຕາມຄໍາຂັວນທີ່ວ່າ: ການແກ້ໄຂບັນຫາຢາເສບຕິດແມ່ນບັ້ນຮົບທີ່ສໍາຄັນທີ່ພວກເຮົາທຸກຄົນຕ້ອງຮ່ວມກັນຕໍ່ສູ້ ແລະ ດັບສູນ ! ໄດ້ເປັນເອກະພາບໄຂຂື້ນພ້ອມກັນຢ່າງເປັນທາງການ ໃນຕອນເຊົ້າວັນທີ 15 ທັນວາ 2021 ທີ່ຫ້ອງການ ປກສ ກຸ່ມບ້ານ ຂອງແຕ່ລະກອງບັນຊາການ ປກສ ເມືອງ ເຊິ່ງຄະນະນໍາພາ-ຊີ້ນໍາຈັດຕັ້ງຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດຂັ້ນກອງບັນຊາການ ປກສ ແຂວງ ນໍາພາໂດຍ ທ່ານ ພັນເອກ ກົງຈັນ ໄຊປັນຍາ ກໍາມະການພັກແຂວງ, ເລຂາຄະນະພັກ, ຫົວໜ້າກອງບັນຊາການ ປກສ ແຂວງ ພ້ອມດ້ວຍຄະນະ, ເປັນກຽດເຂົ້າຮ່ວມໂດຍ ບັນດາທ່ານເລຂາພັກເມືອງ, ເຈົ້າເມືອງ  07 ຕົວເມືອງທີ່ເປັນຫົວໜ້າຄະນະນໍາພາ-ຊີ້ນໍາຈັດຕັ້ງຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດຂັ້ນເມືອງ ພ້ອມດ້ວຍຄະນະ,  ມີບັນດາທ່ານຫົວໜ້າກອງບັນຊາການ ປກສ 07 ຕົວເມືອງ, ພະນັກງານ-ນັກຮົບ, ປກສ ກຸ່ມບ້ານ, ອໍານາດການປົກຄອງບ້ານພ້ອມດ້ວຍພໍ່ແມ່ປະຊາຊົນເຂົ້າຮ່ວມ.

ໃນພິທີ ບັນດາຄະນະປະທານ ແລະ ຄະນະຮັບຜິດຊອບໄດ້ຜັດປ່ຽນກັນຂື້ນເຜີຍແຜ່ເຊື່ອມຊຶມເອກະສານທີ່ສໍາຄັນໃຫ້ພໍ່ແມ່ປະຊາຊົນໄດ້ຮັບຮູ້ເຂົ້າໃຈເຊັ່ນ: ຄໍາສັ່ງຂອງກົມການເມືອງສູນກາງພັກ ເລກທີ 02/ກມສພ ລົງວັນທີ 26 ກັນຍາ 2021 ວ່າດ້ວຍການເພີ່ມທະວີການນໍາພາ-ຊີ້ນໍາຂອງຄະນະພັກແຕ່ລະຂັ້ນຕໍ່ການສະກັດກັ້ນ ແລະ ແກ້ໄຂບັນຫາຢາເສບຕິດ, ມະຕິຕົກລົງຂອງຄະນະປະຈໍາພັກແຂວງ, ຄະນະປະຈໍາພັກເມືອງ ວ່າດ້ວຍການແຕ່ງຕັ້ງຄະນະນໍາພາ-ຊີ້ນໍາ ແລະ ຄະນະຮັບຜິດຊອບຈັດຕັ້ງຜັນຂະຫຍາຍວາລະແຫ່ງຊາດກ່ຽວກັບການແກ້ໄຂບັນຫາຢາເສບຕິດ, ໂຄງການຈັດຕັ້ງປະຕິບັດວາລະແຫ່ງຊາດກ່ຽວກັບການສະກັດກັ້ນ ແລະ ແກ້ໄຂບັນຫາຢາເສບຕິດຂອງແຕ່ລະກອງບັນຊາການ ປກສ 07 ຕົວເມືອງໃນທົ່ວແຂວງ, ພ້ອມນັ້ນຍັງໄດ້ນໍາເອົາຜົນຮ້າຍ ແລະ ໄພອັນຕະລາຍຂອງຢາເສບຕິດມາເຜີຍແຜ່ເຊື່ອມຊຶມໃຫ້ພໍ່ແມ່ປະຊາຊົນ ແລະ ບັນດາກຸ່ມເປົ້າໝາຍໄດ້ຮັບຮູ້ເຂົ້າໃຈ, ເຊິ່ງຢາເສບຕິດທຸກຊະນິດລ້ວນມີຜົນກະທົບໂດຍກົງຕໍ່ບຸກຄົນ, ຄອບຄົວທີ່ພົວພັນຄ້າ-ຂາຍ ແລະ ເສບຢາເສບຕິດ, ຕໍ່ກັບຜູ້ເສບກໍ່ເຮັດໃຫ້ສຸຂະພາບຮ່າງກາຍຊຸດໂຊມຈ່ອຍຜອມ, ເກີດອາການປະສາດຫຼອນ,ເຮັດໃຫ້ການປະກອບອາຊີບເພື່ອພັດທະນາຄອບຄົວລຸດລົງ, ເຮັດໃຫ້ຄອບຄົວບໍ່ມີຄວາມສະຫົງບສຸກ, ສັງຄົມບໍ່ມີຄວາມສະຫງົບປອດໄພ, ເກີດການກໍ່ອາລະວາດຕີກັນ, ປຸ້ນຈີ້, ຊິງຊັບ, ລັກຊັບ, ຂົ່ມຂືນທໍາຊໍາເລົາ ແລະ ອື່ນໆ, ຕໍ່ກັບຜູ້ທີ່ພົວພັນຄ້າຂາຍກໍ່ຈະຖືກເຈົ້າໜ້າທີ່ຈັບຕົວມາດໍາເນີນຄະດີຕາມກົດໝາຍ, ຖືກສານຕັດສິນລົງໂທດຕັດອິດສາລະພາບຈໍາຄຸກຕາມສະຖານໜັກເບົາ, ໃນກໍລະນີຮ້າຍແຮງກໍ່ຈະຖືກຕັດສິນຈໍາຄຸກຕະຫຼອດຊີວິດ ຫຼື ຖືກປະຫານຊີວິດ.

ໂຄງການຈັດຕັ້ງປະຕິບັດວາລະແຫ່ງຊາດກ່ຽວກັບການສະກັດກັ້ນ ແລະ ແກ້ໄຂບັນຫາຢາເສບຕິດຂອງແຕ່ລະກອງບັນຊາການ ປກສ 07 ຕົວເມືອງທົ່ວແຂວງ ບໍລິຄໍາໄຊໃນຄັ້ງນີ້, ບັນດາຄະນະຮັບຜິດຊອບທຸກຂັ້ນຈະໄດ້ຮ່ວມມືປະສານສົມທົບກັບອໍານາດການປົກຄອງບ້ານ ແລະ ພໍ່ແມ່ປະຊາຊົນໃນແຕ່ລະບ້ານເພື່ອເຮັດວຽກງານສອບສວນຂັ້ນພື້ນຖານ, ເກັບກໍາສະພາບລວມຂອງແຕ່ລະບ້ານ, ຄັດຈ້ອນ, ຂື້ນບັນຊີເປົ້າໝາຍ, ວິເຄາະ, ໄຈ້ແຍກ ແບ່ງປະເພດເປົ້າໝາຍເຊັ່ນ: ເປົ້າໝາຍຄ້າ-ຂາຍ, ຂົນສົ່ງ, ເປົ້າໝາຍເຄີຍຖືກຄະດີ, ເຄີຍຖືກສານຕັດສິນ, ເຄີຍຖືກດັດສ້າງ, ຖືກສຶກສາອົບຮົມ, ເປົ້າໝາຍຕ້ອງສົງໄສ ແລະ ເປົ້າໝາຍທີ່ເປັນຄົນຕ່າງປະເທດ ຢ່າງລະອຽດ, ຈະແຈ້ງ, ຮັດກຸມ, ເພື່ອແບ່ງຄວາມຮັບຜິດຊອບໃຫ້ແຕ່ລະພາກສ່ວນຄຸ້ມຄອງ, ຕິດຕາມ, ກວດກາ, ສຶກສາອົບຮົມກ່າວເຕືອນ, ຕໍ່ເປົ້າໝາຍທີ່ມີຄວາມຕື່ນຕົວສະໝັກໃຈລາຍງານ ກໍ່ຈະໄດ້ເຮັດບົດບັນທຶກມອບໃຫ້ພໍ່ແມ່ຜູ້ປົກຄອງ, ການຈັດຕັ້ງບ້ານ ແລະ ເຈົ້າໜ້າທີ່ ປກສກຸ່ມບ້ານ, ປກສ ເມືອງ ຄຸ້ມຄອງ,ຕິດຕາມ, ກວດກາ, ສຶກສາອົບຮົມໃຫ້ຢຸດເຊົາ, ຖ້າບໍ່ສາມາດຢຸດເຊົາດ້ວຍຕົວເອງກໍ່ຈະໄດ້ສົ່ງຕົວໄປບໍາບັດປິ່ນປົວ, ຕໍ່ກັບເປົ້າ ໝາຍທີ່ບໍ່ໃຫ້ການຮ່ວມມື, ບໍ່ຈິງໃຈລາຍງານ ແມ່ນຈະໄດ້ໃຊ້ມາດຕະການທາງດ້ານກົດໝາຍ ເຊັ່ນ: ນໍາຕົວມາກວດນໍ້າປັດສະວະເພື່ອຊອກຫາສານເສບຕິດ, ນໍາຕົວມາສືບສວນ-ສອບສວນ ແລະ ດໍາເນີນຄະດີຕາມຂັ້ນຕອນຂອງກົດໝາຍຢ່າງເຂັ້ມງວດ ທັງໝົດນີ້ກໍ່ເພື່ອແນ່ໃສ່ເຮັດໃຫ້ບັນຫາຢາເສບຕິດຢູ່ພາຍໃນແຂວງ ບໍລິຄໍາໄຊໄດ້ຮັບການສະກັດກັ້ນ, ແກ້ໄຂໃຫ້ໝົດສິ້້ນໄປໂດຍໄວ, ໃນຕອນທ້າຍ ຄະນະນໍາພາ-ຊີ້ນໍາຈັດຕັ້ງຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດກອງບັນຊາການ ປກສ ແຂວງ ໄດ້ຕາງໜ້າໃຫ້ແກ່ຄະນະນໍາພາ-ຊີ້ນໍາ ຂັ້ນແຂວງ ມອບເງິນສົດ ຈໍານວນໜຶ່ງ ໃຫ້ແກ່ ປກສ 07 ຕົວເມືອງ ເພື່ອນໍາໃຊ້ເຂົ້າໃນການປະຕິບັດ ວາລະແຫ່ງຊາດກ່ຽວກັບການສະກັດກັ້ນ ແລະ ແກ້ໄຂບັນຫາຢາເສບຕິດ ອີກດ້ວຍ.

 

Off

Comments are closed.