17th Dec2021

ກະຊວງ ປກສ ສຳເລັດກອງປະຊຸມສະຫຼຸບວຽກງານ ປະຈຳປີ 2021.

by somchan

ກອງປະຊຸມສະຫຼຸບການຈັດຕັ້ງປະຕິບັດວຽກງານປ້ອງກັນຄວາມສະຫົງບ ປະຈຳປີ 2021 ແລະ ທິດທາງແຜນການວຽກງານຈຸດສຸມປີ 2022 ໄດ້ສໍາເລັດໃນວັນທີ 17 ທັນວາ 2021 ນີ້ ພາຍຫຼັງດໍາເນີນມາເປັນເວລາ 2 ວັນ. ພາຍໃຕ້ການເປັນປະທານຂອງ ພົອ ວິໄລ ຫຼ້າຄໍາຟອງ ກໍາມະການກົມການເມືອງສູນກາງພັກ ລັດຖະມົນຕີກະຊວງ ປ້ອງກັນຄວາມສະຫົງບ, ມີຮອງລັດຖະມົນຕີ, ບັນດາກົມໃຫຍ່, ກົມກອງອ້ອມຂ້າງ ແລະ ບັນດາປກສແຂວງທົ່ວປະເທດເຂົ້າຮ່ວມ.

ໃນກອງປະຊຸມບັນດາຜູ້ເຂົ້າຮ່ວມກອງປະຊຸມ ໄດ້ພ້ອມກັນປະກອບຄໍາຄິດຄໍາເຫັນໃສ່ເນື້ອໃນແລະບັນດາວຽກງານຕ່າງໆເຊີ່ງໄດ້ຍົກໃຫ້ເຫັນດ້ານຕັ້ງໜ້າຜົນງານ ແລະ ດ້ານທີ່ຍັງຄົງຄ້າງທີ່ຈະສຶບຕໍ່ແກ້ໄຂໃນຕໍ່ໜ້າ. ໂອກາດດັ່ງກ່າວ ພົອ ວິໄລ ຫຼ້າຄຳຟອງ ກໍໄດ້ໂອ້ລົມ ແລະ ເນັ້ນໜັກຫຼາຍວຽກໃຫ້ຄະນະພັກ-ຄະນະບັນຊາໃນກຳລັງປ້ອງກັນຄວາມສະຫົງບເອົາໃຈໃສ່ 4 ບັນຫາຄື: ຂົງເຂດວຽກງານປົກປັກຮັກສາສະຖຽນລະພາບທາງດ້ານການເມືອງ ແລະ ຄວາມເປັນລະບຽບຮ້ອຍໃນສັງຄົມ, ຂົງເຂດວຽກງານປັບປຸງກໍ່ສ້າງພັກ, ກໍ່ສ້າງກຳລັງປ້ອງກັນຄວາມສະຫົງບ, ຂົງເຂດວຽກງານຮັບປະກັນດ້ານພະລາທິການ ແລະ ຂົງເຂດວຽກງານພົວພັນຮ່ວມມືກັບຕ່າງປະເທດ.

Off

Comments are closed.