18th Dec2021

1 ປີ ຜ່ານມາ ກະຊວງ ປກສ ຍາດໄດ້ຜົນງານ, ຜົນສຳເລັດຫຼາຍດ້ານ.

by somchan

ພົນຈັດຕະວາ ຈັນສະແຫວງ ທິບຄູນທອງ ຄະນະພັກກະຊວງ ຮອງຫົວໜ້າຫ້ອງວ່າການກະຊວງປ້ອງກັນຄວາມສະຫງົບ ໄດ້ຜ່ານບົດສະຫຼຸບລາຍງານຕໍ່ກອງປະຊຸມການຈັດຕັ້ງປະຕິບັດວຽກງານປ້ອງກັນຄວາມສະຫງົບ ປະຈຳປີ 2021 ແລະ ທິດທາງແຜນການວຽກງານຈຸດສຸມ ປີ 2022 ໃນວັນທີ 16 ທັນວາ 2021 ທ່ານໄດ້ກ່າວວ່າ: ໂດຍປະຕິບັດຕາມ 4 ແຜນງານ 41 ໂຄງການ ໃນ 1 ປີ ຜ່ານມາ ກະຊວງປ້ອງກັນຄວາມສະຫງົບ ສາມາດຍາດໄດ້ຜົນງານ, ຜົນສຳເລັດ ຫຼາຍດ້ານ ຕາມການມອບໝາຍຈາກພັກ-ລັດ  ແລະ ປະຊາຊົນມອບໝາຍໃຫ້, ເປັນຕົ້ນ ວຽກງານຮັກສາຄວາມສະຫງົບເປັນລະບຽບຮຽບຮ້ອບໃນສັງຄົມ ເຊັ່ນ: ໄດ້ເອົາໃຈໃສ່ແກ້ໄຂປະກົດການຫຍໍ້ທໍ້ໃນສັງຄົມ ໂດຍຈັດຕັ້ງຜັນຂະຫຍາຍຄຳສັ່ງເລກທີ 15/ນຍ,​ ຄຳສັ່ງເລກທີ 22/ຄລສພ, ຄຳສັ່ງເລກທີ 1470/ປກສ ຫັນເປັນ 1 ແຜນງານ 4 ໂຄງການ ແລະ 12 ແຜນວຽກຂອງກົມໃຫຍ່ຕຳຫຼວດ ແລະ ກອງບັນຊາການ ປກສ ແຂວງ ໃນຂອບເຂດທົ່ວປະເທດ, ແກ້ໄຂບັນຫາຄະດີລາຍໃຫຍ່ ແລະ ມີຄວາມຫຍຸ້ງຍາກສັບສົນ ໃຫ້ມີຄວາມຖືກຕ້ອງຕາມລະບຽບກົດໝາຍ ແລະ ສອດຄ່ອງກັບຫຼັກການວິຊາສະເພາະ ເພື່ອເຮັດໃຫ້ຫາງສຽງຂອງສັງຄົມທີ່ມີການສົ່ງຂ່າວຕໍ່ເຈົ້າໜ້າທີ່ ດຳເນີນຄະດີນັບມື້ຫຼຸດໜ້ອຍຖອຍລົງ. ສະແດງອອກ ປີ 2021 ທົ່ວປະເທດ ມີຄະດີອາຍາເກີດຂຶ້ນທັງໝົດ 6,554 ລາຍ, ມ້າງໄດ້ 5,066 ລາຍ, ກັກຕົວຜູ້ຖືກຫາໄດ້ 7,666 ຄົນ, ຍິງ 949 ຄົນ, ຄົນຕ່າງປະເທດ 133 ຄົນ, ໃນນີ້, ຄະດີອາຍາທົ່ວໄປ 2,541 ລາຍ, ມ້າງໄດ້ 1,639 ລາຍ, ຄະດີຄ້າມະນຸດ 33 ລາຍ, ມ້າງໄດ້ 20 ລາຍ, ເດັ່ນກວ່າ ແມ່ນບັນຫາຢາເສບຕິດເກີດຂຶ້ນ 3,407 ລາຍ, ຮອງລົງມາແມ່ນຄະດີເສດຖະກິດ, ລັກຊັບພົນລະເມືອງ ແລະ ອື່ນໆ.

 

ພົຈວ ຈັນສະແຫວງ ທິບຄູນທອງ ຄະນະພັກກະຊວງ ຮອງຫົວໜ້າຫ້ອງວ່າການກະຊວງປ້ອງກັນຄວາມສະຫງົບ ໃຫ້ຮູ້ຕື່ມວ່າ: ຄ່ຽງຄູ່ກັບໄຊຊະນະ ແລະ ຜົນງານທີ່ຍາດມາໄດ້ນັ້ນ ກໍ່ບໍ່ສາມາດຈາກສະຈາກໄດ້ຂໍ້ຄົງຄ້າງຈຳນວນໜຶ່ງເປັນຕົ້ນ: ການແກ້ໄຂປະກົດການຫຍໍ້ທໍ້ໃນສັງຄົມ ຍັງບໍ່ທັນຫຼຸດລົງຢ່າງຈະແຈ້ງ  ແລະ ຍັງບໍ່ທັນແກ້ໄຂໄດ້ຢ່າງຂາດຕົວ ເຊັ່ນ: ບັນຍາອາຊະຍາກຳຕ່າງໆ ຍັງມີບາງລັກສະນະເພີ່ມຂຶ້ນ, ມີເລ່ລ່ຽມກະທຳຜິດໃຫມ່ໆເກີດຂຶ້ນ ແຕ່ການຄົ້ນຄິດມາດຕະການ, ວິທີການສະກັດກັ້ນ, ແກ້ໄຂຍັງຊັກຊ້າ ບໍ່ທັນກັບສະພາບການ ແລະ ຍັງບໍ່ເດັດຂາດ. ພ້ອມນີ້, ການແກ້ໄຂວຽກງານວິຊາສະເພາະຍັງບໍ່ທັນໄດ້ຕາມລະດັບຄາດໝາຍ, ຄະດີເກີດຂຶ້ນຫຼາຍ ແຕ່ການແກ້ໄຂ ແລະ ການມ້າງເປົ້າໝາຍຍັງໄດ້ໜ້ອຍ, ການແກ້ໄຂຄຳຮ້ອງຟ້ອງ, ຄຳຮ້ອງທຸກຕ່າງໆ ກໍ່ຊັກຊ້າແກ່ຍາວເວລາ. ເຮັດໃຫ້ຄະດີອັ່ງອໍ, ການແກ້ໄຂຄະດີຍັງມີລັກສະນະຟ້າວຝັ່ງ, ບໍ່ລະອຽດຮັດກຸມ, ບາງຄະດີກົດໜ່ວງເວລາເຮັດຜິດເປັນຖືກ, ເຮັດຖືກເປັນຜິດ, ບໍ່ຖືກຕາມລະບຽບກົດໝາຍ ເຮັດໃຫ້ສັງຄົມມີຫາງສຽງວິພາກວິຈານຕໍ່ກັບການປະຕິບັດໜ້າທີ່ພວກເຮົາ ແລະ ມີເຈົ້າໜ້າທີ່ຈຳນວນໜຶ່ງຖືກຮ້ອງຟ້ອງ ແລະ ບັນຫາອື່ນໆ.

Off

Comments are closed.