18th Dec2021

ວຽກງານໂຄສະນາ ສຶກສາອົບຮົມ ວາລະຊາດແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຂອງກະຊວງ ປກສ.

by somchan

ພົຈວ ປອ ສຸວັນນີ ສີສຸພາບມີໄຊ ຮອງຫົວໜ້າກົມໃຫ່ຍການເມືອງປ້ອງກັນຄວາມສະຫງົບ ໄດ້ຕາງໜ້າໃຫ້ຄະນະອະນຸກໍາມະການຮັບຜິດຊອບວຽກງານໂຄສະນາສຶກສາອົບຮົມ ວາລະຊາດແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ, ໄດ້ໃຫ້ສໍາພາດຕໍ່ນັກຂ່າວສື່ມວນຊົນປ້ອງກັນຄວາມສະຫງົບ ໃນວັນທີ 17 ທັນວາ 2021 ນີ້ ໃນໂອກາດທີ່ໄດ້ເຂົ້າຮ່ວມກອງປະຊຸມສະຫຼຸບການຈັດຕັ້ງປະຕີບັດວຽກງານປ້ອງກັນຄວາມສະຫງົບ ປະຈໍາປີ 2021 ແລະ ທິດທາງແຜນການວຽກງານຈຸດສຸມປີ 2022 ວ່າ:

ເພື່ອຈັດຕັ້ງປະຕິບັດຄໍາສັ່ງເລກທີ 02 ຂອງກົມການເມືອງສູນກາງພັກ, ມະຕິ 04 ຂອງສະພາແຫ່ງຊາດ ແລະ ຂໍ້ຕົກລົງເລກທີ 1512 ຂອງລັດຖະມົນຕີກະຊວງປ້ອງກັນຄວາມສະຫງົບ ວ່າດ້ວຍວາລະແຫ່ງຊາດແກ້ໄຂບັນຫາຢາເສບຕິດ ໃຫ້ປະກົດຜົນເປັນຈິງ, ຄະນະຮັບຜິດຊອບວຽກງານໂຄສະນາສຶກສາອົບຮົມ  ໄດ້ເອົາໃຈໃສ່ຈັດຕັ້ງ ປະຕິບັດຄື: ໄດ້ຈັດຕັ້ງເຊື່ອມຊຶມບັນດາເອກະການ, ນິຕິກໍາຕ່າງໆ ກ່ຽວກັບວາລະແຫ່ງຊາດແກ້ໄຂບັນຫາຢາເສບຕິດ, ຢູ່ອ້ອມຂ້າງສູນກາງ ແລະ ທ້ອງຖິ່ນໄດ້ສໍາເລັດ, ໄດ້ຂຽນຄໍາຂວັນໂຄສະນາ, ໂປຼດເຕີ, ແຜນພັບ ແລະ ຮູບພາບ, ນໍາສະເໜີຜ່ານກະຊວງ ແລະ ຫ້ອງວ່າການສໍານັກງານນາຍົກລັດຖະມົນຕີ, ເພື່ອຕົກລົງນໍາ ໃຊ້ຢ່າງເປັນທາງການ ແລະພ້ອມນີ້ຍັງ ໄດ້ປະສານສົມທົບ ແລະ ປະຊຸມຮ່ວມ ກັບກະຊວງໂຍທາທິການ ແລະ ຂົນສົ່ງ, ກະຊວງທະແຫຼ່ງຂ່າວວັດທະນະທໍາ ແລະ ທ່ອງທ່ຽວ, ນະຄອນຫຼວງວຽງຈັນ, ແຂວງບໍລິຄໍາໄຊ, ແຂວງຄໍາມ່ວນ, ສະຫວັນນະເຂດ ແລະ ແຂວງ ຈໍາປາສັກ, ໃນການສໍາຫຼວດກໍານົດຈຸດຕິດຕັ້ງປ້າຍໂຄສະນາໄດ້ສໍາເລັດ ແລະ ວຽກງານອື່ນໆ.

 

ພົຈວ ປອ ສຸວັນນີ ສີສຸພາບມີໄຊຍັງໃຫ້ຮູ້ຕື່ມວ່າສໍາລັບທິດທາງ ໂຄສະນາໃນຕໍ່ໜ້າແມ່ນສຸມໃສ່ 7 ບັນຫາຕົ້ນຕໍຄື:  ສືບຕໍ່ໂຄສະນາສຶກສາອົບຮົມ, ບັນດາເນື້ອໃນເອກະສານຕ່າງໆຂອງວາລະແຫ່ງຊາດ ແກ້ໄຂຢາເສບຕິດໂດຍຜ່ານລາຍການວິທະຍຸ, ໂທລະພາບ, ໜັງສືພີມ ແລະ ສື່ສັງຄົມອອນລາຍ ໃຫ້ທົ່ວເຖິງແຕ່ສູນກາງຮອດທ້ອງຖິ່ນ, ສືບຕໍ່ສ້າງສະປອດໂຄສະນາ, ສ້າງສາລະຄະດີ, ບົດເພງ, ຂັບລໍາ, ລະຄອນ ແລະ ລົງສໍາພາດການ ແກ້ໄຂຢາເສບຕິດ, ສືບຕໍ່ຕິດຕັ້ງປ້າຍໂຄສະນາ ຢູ່ນະຄອນຫຼວງ ແລະ ບັນດາ ແຂວງພາກກາງ, ພາກໃຕ້ໃຫ້ສໍາເລັດ. ພ້ອມນີ້ ສືບຕໍ່ສ້າງຂໍ້ແຂ່ງຂັນກັນ ກັບບັນດາກົມກອງອ້ອມຂ້າງກະຊວງ ແລະ ປກສ ແຂວງ ໃນທົ່ວປະເທດເພື່ອຕ້ານ ແລະ ແກ້ໄຂຢາເສບຕິດ, ສືບຕໍ່ລົງສໍາຫຼວດ ແລະ ຕິດຕັ້ງປ້າຍໂຄສະນາຢູ່ ບັນດາແຂວງ ພາກເຫນືອ ໃຫ້ສໍາເລັດ ແລະ ສືບຕໍ່ປັບປຸງການສ້ອມແປງສະຖານີເຄືອຄ່າຍວິທະຍຸປ້ອງປ້ອງຄວາມສະຫງົບ ໃຫ້ສໍາເລັດຢູ່ 5 ແຂວງ ເພື່ອຮັບໃຊ້ວຽກງານໂຄສະນາວະລະແຫ່ງຊາດ ໃນການແກ້ໄຂບັນຫາຢາເສບຕິດໃຫ້ເຄື່ອນໄຫວໄດ້ເປັນປົກກະຕິ ແລະ ວຽກງານອື່ນໆ.

 

 

Off

Comments are closed.