18th Dec2021

ຫ້ອງ 509 ສົມທົບ ປກສ ເມືອງສັງທອງ ປຶກສາຫາລື ສຸມໃສ່ 3 ວຽກໃຫຍ່ ໃນການຈັດຕັ້ງປະຕິບັດວາລະແຫ່ງຊາດ.

by somchan

ວັນທີ 17 ທັນວາ 2021, ທີ່ກອງບັນຊາການ ປກສ ເມືອງສັງທອງ ພັທ ປາຖະໜາ ລັດຕະນະປັນຍາ ຮອງຫົວໜ້າຫອ້ງ 509 ປກສ ນວ, ພ້ອມດ້ວຍຄະນະ ໄດ້ຮ່ວມກອງປະຊຸມປຶກສາຫາລື ການຈັດຕັ້ງປະຕິບັດຕາມວາລະແຫ່ງຊາດ ກັບກອງບັນຊາການ ປກສ ເມືອງສັງທອງ ໂດຍມີ ພັທ ພອນສີ ພັນທະວົງ ຮອງຫົວໜ້າກອງບັນຊາການ ປກສ ເມືອງສັງທອງ ຜູ້ຊີ້ນຳພະແນກສຳມະໂນຄົວ ແລະ ກໍ່ສ້າງຮາກຖານພ້ອມດ້ວຍພະນັກງານ-ນັກຮົບເຂົ້າຮ່ວມ.

ໃນກອງປະຊຸມ ໄດ້ຜ່ານແຜນການຈັດຕັ້ງປະຕິບັດ ກ່ຽວກັບແຜນການ ຊີ້ນໍາ- ນໍາພາ ແກ້ໄຂບັນຫາຢາເສບຕິດ ຂອງຫ້ອງຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານແຕ່ນີ້ຮອດປີ 2023. ໃນການເຄື່ອນໄຫວຈັດຕັ້ງປະຕິບັດໜ້າທີ່ຄັ້ງນີ້ ແມ່ນຈະສຸມໃສ 3 ວຽກຈຸດສຸມຄື: ສ້າງຄວາມຮູ້ໃຫ້ທົ່ວສັງຄົມດ້ວຍການສຶກສາອົບຮົມ ແລະ ໂຄສະນາເຜີຍແຜ່ຜົນຮ້າຍ, ໄພອັນຕະລາຍຂອງຢາເສບຕິດ ແລະ ລະບຽບກົດໝາຍ ໃຫ້ສັງຄົມໄດ້ຮັບຮູ້ ເຂົ້າໃຈຢ່າງເລິກເຊິ່ງ.  ຍົກສູງປະສິດທິພາບດ້ານການຄຸ້ມຄອງເປົ້າໝາຍ, ແຍກກຸ່ມປະເພດເປົ້າໝາຍ, ຈັດແບ່ງປະເພດເປົ້າໝາຍບຸກຄົນ ແລະ ພື້ນທີ່ ພ້ອມທັງແບ່ງຂັ້ນຄຸ້ມຄອງຈະແຈ້ງ. 3 ສົມທົບກັບຂະແໜງການຂັ້ນນະຄອນຫຼວງວຽງຈັນ ແລະ ອົງການປົກຄອງເມືອງ ເພື່ອປັບປຸງຂີດຄວາມສາມາດເຮັດໜ້າທີ່ການເມືອງ ຂອງບັນດາຂະແໜງການ ຂັ້ນນະຄອນຫຼວງວຽງຈັນ, ເມືອງ ແລະ ບ້ານ ໃນການແກ້ໄຂບັນຫາຢາເສບຕິດ, ພ້ອມນີ້ ຍັງໄດ້ໂຄສະນາ, ແນະນໍາໃຫ້ປະຊາຊົນ ໄດ້ຮັບຮູ້ ແລະ ເຂົ້າໃຈວີທີປ້ອງກັນສະກັດການແຜ່ລະບາດພະຍາດໂຄວິດ-19.
ການລົງເຮັດວຽກໃນຄັ້ງນີ້ ຈະໄດ້ແຍກປະເພດເປົ້າໝາຍຢູ່ພາຍໃນບ້ານ, ກຸ່ມ, ເມືອງ ຄ່ຽງຄູ່ກັບການເຮັດບົດບັນທຶກກັບບັນດາຫ້າງ, ຮ້ານຕ່າງໆ ທີ່ອາດຈະເປັນບ່ອນມົ້ວສຸມ ຊື້-ຂາຍຢາເສບຕິດ ແລະ ປຸກລະດົມ ໃຫ້ປະຊາຊົນ ເປັນເຈົ້າການປະຕິບັດພັນທະຂອງຕົນ ໃນການແກ້ໄຂບັນຫາຢາເສບຕິດ ທີ່ຢູ່ໃນຂອບເຂດຄວາມຮັບຜິດຊອບຂອງຕົນ ຫາກພົບເຫັນປະກົດຫຍໍທໍ້ເກີດຂຶ້ນ ໃຫ້ຈິ່ງໃຈຮີບຮ້ອນລາຍງານຕໍ່ເຈົ້າໜ້າທີ່ ເພື່ອແກ້ໄຂໃຫ້ທັນກັບສະພາບກັນ ແນໃສ່ເຮັດໃຫ້ເມືອງສັງທອງ ກໍຄື ນວ ມີຄວາມສະຫົງບ-ປອດໄພຫຼາຍຂຶ້ນເປັນກ້າວ.

Off

Comments are closed.