18th Dec2021

ເຈົ້າໜ້າທີ່ຕຳຫຼວດ ກັກຕົວກຸ່ມຄົນ ທີ່ເຜີຍແຜ່ສິ່ງລາມົກອະນາຈານ ຜ່ານສື່ສັງຄົມອອນລາຍ.

by somchan

ພັທ ຄໍາປ່ຽນ ອຸດົມວິໄລ ຫົວໜ້າພະແນກຕໍາຫຼວດ ກອງບັນຊາການ ປກສ ເມືອງສີໂຄດຕະບອງ ນະຄອນຫຼວງວຽງຈັນ ໃຫ້ຮູ້ວ່າ: ໃນວັນທີ 16 ໄດ້ມີພົນລະເມືອງດີແຈ້ງວ່າ: ມີກຸ່ມຄົນກໍາລັງເຜີຍແຜ່ສິ່ງລາມົກອະນາຈານ ຜ່ານສື່ສັງຄົມອອນລາຍ ຜ່ານຊ່ອງທາງເຟັສບຸກ ຢູ່ອາພາດເມັ້ນແຫ່ງໜຶ່ງ ເຂດບ້ານປາກທ້າງ ເມືອງສີໂຄດຕະບອງ ນະຄອນຫຼວງວຽງຈັນ. ຈາກນັ້ນ, ພາຍຫຼັງໄດ້ຮັບແຈ້ງ ຈິ່ງໄດ້ປະສານສົບທົບກັບພະແນກສັນຕິບານເມືອງ, ປກສ ກຸ່ມ ໜອງດ້ວງ ແລະ ອໍານາດການປົກຄອງບ້ານປາກທ້າງລົງກວດກາ.

ຜ່ານການລົງກວດກາຕົວຈິງ ພົບເຫັນກຸ່ມຄົນ ຈໍານວນ 16 ຄົນ, ຍິງ 8 ຄົນ ເປັນຄົນສັນຊາດຈີນ 2 ຄົນ, ຢູ່ຫ້ອງເບີ 402 ພາຍໃນຫ້ອງມີຊາຍ 4 ຄົນ, ຍິງ 2 ຄົນ ຢູ່ໃນສະພາບເປື່ອຍກາຍ ແລະ ກໍາລັງບັນທຶກພາບວີດີໂອ ແລະ ເຜີຍແຜ່ສົດ, ສິ່ງລາມົກອະນາຈານຜ່ານເຟັສບຸກ ແລະ ສື່ສັງຄົມອອນລາຍ, ດັ່ງນັ້ນເຈົ້າໜ້າທີ່ ຈິ່ງໄດ້ນຳຕົວພວກກ່ຽວມາສືບສວນ-ສອບສວນ, ຈາກນັ້ນໄດ້ນຳຕົວພວກກ່ຽວຈຳກັດບໍລິເວນຢູ່ສູນເພື່ອຄວບຄຸມການແຜ່ລະບາດ ພະຍາດໂຄວິດ-19 ພາຍຫຼັງຄົບກໍານົດ 14 ວັນ ຈິ່ງຈະນໍາຕົວ ພວກກ່ຽວມາດຳເນີນຄະດີຕາມກົດໝາຍ.

Off

Comments are closed.