19th Dec2021

ປະທານປະເທດແຫ່ງ ສປປ ລາວ ຢ້ຽມຢາມໂຮງງານ ກາເຟດາວ ແລະ ສວນຊາ 36 ຢູ່ ແຂວງຈຳປາສັກ.

by somchan

ໃນວັນທີ 17 ທັນວາ 2021, ທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນປະຕິວັດລາວປະທານປະເທດ ແຫ່ງ ສປປ ລາວ ພ້ອມດ້ວຍຄະນະນຳ ຈາກສູນກາງ ໄດ້ເຄື່ອນໄຫວຢ້ຽມຢາມ ແຂວງ ຈຳປາສັກ, ໂດຍມີ ທ່ານ ວິໄລວົງ ບຸດດາຄໍາ ກໍາມະການສູນກາງພັກ, ເລຂາຄະນະບໍລິຫານງານພັກແຂວງເຈົ້າແຂວງຈຳປາສັກ,ພ້ອມຄະນະໃຫ້ການຕ້ອນຮັບ.

 ໃນໂອກາດດັ່ງກ່າວທ່ານ ທອງລຸນ ສີສຸລິດ ແລະ ຄະນະ ໄດ້ເຄື່ອນໄຫວຢ້ຽມຢາມໂຮງງານກາເຟດາວ ທີ່ຕັ້ງຢູ່ບ້ານຫລັກ 21 ເມືອງບາຈຽງຈະເລີນສຸກ ແຂວງຈຳປາສັກ ແລະ ໄດ້ຮັບຟັງການລາຍງານຄວາມຄືບໜ້າ ໃນການດຳເນີນທຸລະກິດກາເຟດາວ ຈຳກັດພາຍຫລັງການເຊັນສັນຍາຜູ້ຖືຮຸ້ນ ໃນເດືອນພະຈິກ 2020 ຜ່ານມາບໍລິສັດກາເຟດາວ ຈຳກັດ ມີທຶນຈົດທະບຽນທັງໝົດ 278 ລ້ານໂດລາສະຫະລັດໃນນັ້ນລັດຖະບານຖືຫຸ້ນໃນສັດສ່ວນກວມເອົາ 56% ເທົ່າກັບ 154,9 ລ້ານໂດລາແລະກຸ່ມບໍລິສັດກາເຟດາວຖືຫຸ້ນ 44% ເທົ່າກັບ 123,1 ລ້ານໂດລາ. ສຳລັບຜົນການດຳເນີນທຸລະກິດ ບໍລິສັດກາເຟດາວ ໃນປີ 2021 ມີລາຍຮັບ 150,02 ຕື້ກີບ, ໃນນັ້ນລາຍຮັບຈາກການສົ່ງອອກກວມ 54%.ໂຮງງານແຫ່ງນີ້ສ້າງຕັ້ງຂຶ້ນໃນປີ 2012, ມີເນື້ອທີ່ລວມທັງໝົດ 13 ເຮັກຕາມີກຳລັງການຜະລິດສູງເຖິງ 3.500 ໂຕນຕໍ່ປີ ແລະ ໄດ້ນໍາໃຊ້ລະບົບອຸດສະຫະກໍາເຄື່ອງຈັກ ທີ່ມີຄວາມທັນສະໄໝ ຈາກທະວີບເອີຮົບເຊິ່ງເຄື່ອງຈັກທັງໝົດທີ່ຢູ່ໃນໂຮງງານ ແມ່ນນຳເຂົ້າຈາກແບນເຄື່ອງຈັກທີ່ມີຊື່ສຽງ ເຊັ່ນ: ເຄື່ອງຂົ້ວກາເຟ ຈາກປະເທດເຢຍລະມັນເຄື່ອງຈັກລະບົບຜະລິດກາເຟສຳເລັດຮູບ ຈາກປະເທດເດັນມາກ ແລະ ເຄື່ອງຈັກບັນຈຸພັນຈາກປະເທດຍີ່ປຸ່ນ ເພື່ອຜະລິດກາເຟສຳເລັດຮູບໃຫ້ມີຄຸນນະພາບສູງ ແລະ ໃຫ້ໄດ້ມາດຕະຖານ. ປັດຈຸບັນໂຮງງານກາເຟດາວ ໄດ້ນໍາໃຊ້ລະບົບຄວາມສະອາດປອດໄພ ຂອງຜະລິດຕະພັນອາຫານ ກໍຄື ISO 22000. ຜະລິດຕະພັນຂອງກາເຟດາວ ມີກາເຟຂົ້ວເມັດກາເຟສຳເລັດຮູບ ແລະຮູບແບບຂອງການຜະລິດ(OEM).
  ຈາກນັ້ນທ່ານ ທອງລຸນ ສີສຸລິດ ພ້ອມຄະນະ ໄດ້ຢ້ຽມຢາມສວນຊາ 36 ເຊິ່ງແມ່ນໂຮງງານ ຜະລິດຊາສໍາເລັດຮູບ ທີ່ຕັ້ງຢູ່ເຂດພູພຽງບໍລະເວນ ບ້ານຫລັກ 36 ຢູ່ ເມືອງປາກຊ່ອງ ແຂວງຈຳປາສັກ, ເຊິ່ງເປັນກິດຈະການຂອງ ບໍລິສັດລາວ ທີຊິກ ມາເນີ ການຄ້າ ຂາອອກ-ຂາເຂົ້າ ຈໍາກັດຜູ້ດຽວ ສ້າງຕັ້ງຂຶ້ນປີ 2017. ມີມູນຄ່າການລົງທືນ 11 ລ້ານໂດລາສະຫາລັດມີເນື້ອທີ່ 150 ເຮັກຕາມີຕົ້ນຊາທັງໝົດ 110.000 ກວ່າຕົ້ນດຳເນີນກິດຈະການຜະລິດປຸງແຕ່ງຊາສໍາເລັດຮູບເພື່ອສົ່ງອອກ.

Off

Comments are closed.