25th Dec2021

ທ່ານບຸນທອງ ຈິດມະນີ ເນັ້ນໃຫ້ແຂວງອຸດົມໄຊ ສືບຕໍ່ປະຕິບັດ 3 ບັນຫາສໍາຄັນ

by Peaung Thanonkeo

ໃນໂອກາດຢ້ຽມຢາມ ແລະ ເຮັດວຽກຢູ່ແຂວງອຸດົມໄຊ ໃນວັນທີ 23-24 ທັນວາ 2021 ນີ້, ທ່ານ ບຸນທອງ ຈິດມະນີ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນ ກາງພັກ, ຮອງປະທານປະເທດ ໄດ້ໂອ້ລົມການນຳ ແລະ ພະນັກງານຫລັກແຫລ່ງຂອງແຂວງ ໂດຍໄດ້ ເນັ້ນໜັກ 3 ບັນຫາສໍາຄັນທີ່ແຂວງຕ້ອງໄດ້ສືບຕໍ່ປະຕິບັດຄື: ເພີ່ມທະວີການຈັດຕັ້ງຜັນຂະຫຍາຍມະຕິ ກອງປະຊຸມໃຫຍ່ ຄັ້ງທີ XI ຂອງພັກ ໂດຍສະເພາະ ແມ່ນວາລະແຫ່ງຊາດ ກ່ຽວກັບການແກ້ໄຂບັນຫາ ຄວາມຫຍຸ້ງຍາກດ້ານເສດຖະກິດ-ການເງິນ ແລະ ບັນຫາຢາເສບຕິດ ຍູ້ແຮງວຽກງານປັບປຸງພາຍໃນ ພັກກໍ່ສ້າງພະນັກງານ ແລະ ເພີ່ມທະວີວຽກງານກວດກາ ໃຫ້ແຂງແຮງ ຜັນຂະຫຍາຍຈິດໃຈຂອງ ກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI ຜ່ານມາສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງ ໃນວຽກງານພະນັກງານ ສືບຕໍ່ເອົາໃຈໃສ່ວຽກງານກໍ່ສ້າງຮາກຖານການເມືອງໃຫ້ໜັກແໜ້ນ ແລະ ເຂັ້ມແຂງ.

ທ່ານ ບຸນທອງ ເນັ້ນໃຫ້ ສືບຕໍ່ເຂັ້ມງວດໃນວຽກງານປ້ອງກັນຊາດ-ປ້ອງກັນ ຄວາມສະຫງົບ ໃຫ້ມີສະຖຽນລະພາບທາງດ້ານການເມືອງໜັກແໜ້ນ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານຖືເອົາການນຳພາ-ຊີ້ນຳ ແກ້ໄຂຄວາມຫຍຸ້ງຍາກທາງດ້ານ ເສດຖະກິດ-ການເງິນ ເປັນພື້ນຖານສຳຄັນຂອງການສ້າງການຫັນປ່ຽນທີ່ແຂງແຮງເລິກເຊິ່ງ ແລະ ຮອບດ້ານ ຍູ້ແຮງການລົງທຶນ ທັງພາຍໃນ ແລະ ຕ່າງປະເທດ ເພື່ອຂະຫຍາຍແຫລ່ງລາຍຮັບໃຫ້ຫລາຍ ກວ່າເກົ່າໄປພ້ອມກັບການຍູ້ແຮງການຄ້າຊາຍແດນ ຕາມເສັ້ນທາງລົດໄຟ ລາວ-ຈີນ ໃຫ້ມີການ ແລກປ່ຽນຫລາຍກວ່າເກົ່າ ໂດຍອຳນວຍຄວາມສະດວກຫຼີກເວັ້ນການສ້າງຄວາມຫຍຸ້ງຍາກສັບສົນໃຫ້ ກັບປະຊາຊົນ ແລະ ພໍ່ຄ້າຊາວຂາຍ ໂດຍສະເພາະ ຂອດພາສີອາກອນຄ່າທຳນຽມ, ການຂົນສົ່ງ ແລະ ຄ່າໃຊ້ຈ່າຍໃນການອະນຸມັດໃຫ້ໂປ່ງໃສ, ໃນເງື່ອນໄຂ ແລະ ປັດໄຈໃໝ່ຂອງການເຊື່ອມຈອດພາກພື້ນ ດ້ານຄົມມະນາຄົມຂົນສົ່ງຕາມເສັ້ນທາງລົດໄຟ ລາວ-ຈີນ ເອົາໃຈໃສ່ ຈັດສັນທີ່ດິນຕາມເສັ້ນທາງ ລົດໄຟເພື່ອການພັດມະນາ ໂດຍອີງໃສ່ສັນຍາຕ່າງໆທີ່ເຄີຍລົງນາມຕ້ອງເອົາໃຈໃສ່ນຳພາຊຸກຍູ້ດ້ານ ການບໍລິການ ຕິດພັນກັບການຜະລິດ, ຂົນສົ່ງການພັດທະນາເຂດເສດຖະກິດຕ່າງໆ ແລະ ເປັນເງື່ອນ ໜຶ່ງທີ່ສາມາດສ້າງໂອກາດຍູ້ແຮງໃຫ້ ການ ພັດທະນາແຂວງອຸດົມໄຊ.

ຂະນະດຽວກັນ, ທ່ານ ບຸນຄົງ ຫລ້າຈຽມພອນ ກຳມະການສຳຮອງສູນກາງພັກ, ເລຂາພັກ ແຂວງ, ເຈົ້າແຂວງອຸດົມໄຊ ກໍໄດ້ລາຍງານການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງ ສູນກາງພັກ ຕິດພັນກັບມະຕິກອງປະຊຸມໃຫຍ່ຄັ້ງທີ IX ຂອງອົງຄະນະພັກແຂວງອຸດົມໄຊ ແຜນ ພັດທະນາເສດຖະກິດ-ສັງຄົມ ວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກງານປັບປຸງພາຍ ໃນພັກ, ກໍ່ສ້າງພະນັກງານ, ວຽກງານກວດກາ, ວຽກງານກໍ່ສ້າງຮາກຖານການເມືອງການປະຕິບັດມາດ ຕະການປ້ອງກັນພະຍາດໂຄວິດ-19 ແລະ ການຈັດຕັ້ງປະຕິບັດ 2 ວາລະແຫ່ງຊາດຂອງແຂວງໂດຍ ສັງເຂບ.

ໂອກາດດຽວກັນທ່ານ ບຸນທອງ ຈິດມະນີ ພ້ອມຄະນະກໍ່ໄດ້ລົງຢ້ຽມຢາມ ແລະ ເຮັດວຽກຢູ່ ເມືອງງາ ແລະ ຢ້ຽມຢາມເບິ່ງສະຖານີລົດໄຟລາວ-ຈີນ ຂອງແຂວງອຸດົມໄຊ ແລະ ໄດ້ມອບອຸປະກອນ ການຮຽນປະກອບມີ: ຖົງ, ສໍດໍາ, ປື້ມຂຽນ, ລົດຖີບໃຫ້ ແຂວງອຸດົມໄຊ ເພື່ອນຳໄປມອບໃຫ້ບັນດາ ໂຮງຮຽນ ທີ່ຍັງຂາດເຂີນ, ມອບຜ້າຫົ່ມ ແລະ ອຸປະກອນຮັບໃຊ້ ໃນການປ້ອງກັນເຊື້ອພະຍາດໂຄວິດ 19 ອີກຈຳນວນໜຶ່ງ

Off

Comments are closed.