26th Dec2021

ກອງບັນຊາການ ປກສ ແຂວງວຽງຈັນ ຈັດພິທີປາຖະກະຖາ 2 ວັນປະຫວັດສາດ

by Peaung Thanonkeo

ໃນວັນທີ 23 ທັນວາ 2021ນີ້ ກອງບັນຊາການ ປກສ ແຂວງວຽງຈັນ ໄດ້ຈັດປາຖະກະຖາ 2 ວັນປະຫວັດສາດສຳຄັນຂອງຊາດຄີ ວັນຊາດທີ 2 ທັນວາ ຄົບຮອບ 46 ປີ ແລະ ວັນຄ້າຍເກີດຂອງ ປະທານໄກສອນ ພົມວິຫານ ຄົບຮອບ 101 ປີ ໃຫ້ກຽດເຂົ້າຮ່ວມ ແລະ ເຜີຍແຜ່ເອກະສານໂດຍ ພັບ ຄຳສິງ ຮົ່ມດວງໄຊ ຮອງຫົວໜ້າກອງບັນຊາການ, ຫົວໜ້າຫ້ອງການເມືອງ ປກສ ແຂວງວຽງຈັນ ມີ ຄະນະພັກ-ຄະນະບັນຊາ, ພະນັກງານສະມາຊິກພັກ, ພະນັກງານ-ນັກຮົບຈາກຫ້ອງ, ກອງພັນ, ຄ້າຍ ຄຸມຂັງດັດສ້າງ ເຂົ້າຮ່ວມ.

ທ່ານ ພັທຄຳສິງ ຮົ່ມຕວງໄຊ ຮອງຫົວໜ້າກອງບັນຊາການ, ຫົວໜ້າຫ້ອງການເມືອງ ປກສ ແຂວງວຽງຈັນ ໄດ້ຫວນຄືນມູນເຊື້ອຂອງວັນສະຖາປານາສາທາລະນະລັດ ປະຊາທິປະໄຕ ປະຊາຊົນ ລາວ ຄົບຮອບ 46 ປີ ວ່າ: ຊາດລາວເປັນຊາດໜຶ່ງ ທີ່ມີປະຫວັດສາດອັນຍາວນານຫຼາຍພັນປີ, ມີ ມູນເຊື້ອການຕໍ່ສູ້ອັນສະຫງ່າອົງອາດກ້າຫານບໍ່ຍອມຈຳນົນ, ສາມາດຕີເອົາຊະນະຈັກກະພັດຕ່າງດ້າວຜູ້ ຮຸກຮານ ທັງແບບເກົ່າ ແລະ ແບບໃໝ່ ທີ່ເຂົ້າມາຢຶດຄອງລາວເປັນຫົວເມືອງຂຶ້ນໃນເມື່ອກ່ອນ ເຊີ່ງໃນ ເວລານັ້ນປະຊາຊົນລາວຖືກກົດຂີ່ຂູດຮີດຢ່າງໜັກໜ່ວງ ແລະ ປ່າເຖື່ອນທີ່ສຸດ ສະນັ້ນ ປະຊາຊົນລາວ ບັນດາເຜົ່າກໍ່ໄດ້ສາມັກຄີກັນລຸກຮື້ຂື້ນຕໍ່ຕ້ານແອກປົກຄອງຂອງພວກລ່າເມືອງຂື້ນຢ່າງອົງອາດກ້າຫານ

ແລະ ເປັນຂະບວນການຕໍ່ເນື່ອງ ໂດຍພາຍໃຕ້ການນຳພາອັນສະຫຼາດສ່ອງໃສຂອງພັກປະຊາຊົນ ປະຕິວັດລາວ, ກອງທັບ ແລະ ປະຊາຊົນລາວ ສາມາດຕີເອົາໄຊຊະນະພວກສັດຕູ ໃນຫຼາຍໆບັ້ນຮົບ ເຊິ່ງເປັນເຫດການປະຫວັດສາດ ແລະ ເປັນຂີດໝາຍແຫ່ງຜົນສຳເລັດຂອງການປະຕິວັດຊາດ ປະຊາທິປະໄຕ ສາມາດຂັບໄລ່ພວກຈັກກະພັດຕ່າງດ້າວອອກຈາກຜືນແຜ່ນດິນອັນແສນຮັກ ແລະ ຫວງແຫນ ເຊິ່ງພັກປະຊາຊົນປະຕິວັດລາວ ໄດ້ນຳໃຊ້ຍຸດທະສາດ 3 ບາດຄ້ອນ ຍາດເອົາໄຊຊະນະຢ່າງ ສົມບູນ ແບບບົວບໍ່ຊໍ້າ ນໍ້າບໍ່ຂຸ່ນ ກ້າວໄປເຖິງການລົບລ້າງລະບອບເກົ່າ ແລ້ວສ້າງຕັ້ງລະບອບ ປະຊາທິປະໄຕປະຊາຊົນ ຂຶ້ນ ໃນວັນທີ 2 ທັນວາ 1975 ເຊີ່ງແມ່ນວັນແຫ່ງການກ້າວສູ່ໄລຍະໃໝ່ ແຫ່ງການສ້າງປະເທດລາວ ເປັນປະເທດ ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນະ ຖາວອນ ນັບແຕ່ໄດ້ຮັບການປົດປ່ອຍເປັນຕົ້ນມາ ພັກ-ລັດ ເຮົາໄດ້ສືບຕໍ່ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ຈະເລີນກ້າວໜ້າຈົນເຖິງປະຈຸບັນນີ້, ພ້ອມນັ້ນ ກໍ່ໄດ້ລະນຶກເຖິງວັນ ຄ້າຍວັນເກີດຂອງປະທານໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດ ທ່ານ ປະທານໄກສອນ ພົມວິຫານ ເກີດໃນວັນທີ 13 ທັນວາ 1920 ທີ່ບ້ານນາເຊງ, ເມືອງ ຄັນທະບູລີ ແຂວງ ສະຫວັນນະເຂດ ເຊິ່ງການເຄື່ອນໄຫວປະຕິວັດຂອງທ່ານ ແມ່ນໄດ້ຜ່ານການຝຶກຝົນທົດສອບ ໃນຂະບວນການຕົວຈິງ ແລະ ຮັບຜິດຊອບວຽກງານສໍາຄັນແຕ່ນ້ອຍຫາໃຫ່ຍ ກ້າວຂື້ນເປັນຜູ້ນຳສູງສຸດ ຂອງປະເທດລາວ ດັ່ງນັ້ນ ໃນນາມສະມາຊິກພັກ, ພະນັກງານ-ນັກຮົບ ຕ້ອງຮໍ່າຮຽນເອົາຄຸນສົມບັດສິນທໍາປະຕິວັດ, ແບບແຜນການດໍາລົງຊີວິດ ແລະ ຄຸນງາມຄວາມດີຂອງປະທານ ໄກສອນ ພົມວິຫານ ໄປ ໝູນໃຊ້ເຂົ້າໃນໜ້າທີ່ວຽກງານຕົວຈິງໃຫ້ເກີດດອກອອກຜົນ ແລະ ເສີມຂະຫຍາຍມູນເຊື້ອອັນດີງາມ ຂອງຊາດ, ເພີ່ມທະວີຄວາມເປັນເຈົ້າການ, ຍົກສູງຄວາມຮັບຜິດຊອບ, ຄວາມເປັນແບບຢ່າງນຳໜ້າ ໃນການຈັດຕັ້ງປະຕິບັດໜ້າທີ່ວຽກງານ ເພື່ອໃຫ້ມີຜົນງານຍິ່ງໃຫຍ່ຂື້ນກວ່າເກົ່າ.

Off

Comments are closed.