27th Dec2021

ສາມພາກສ່ວນສົມທົບລົງແກ້ໄຂ 3 ຮ້ານອິນເຕີເນັດກາເຟ

by Peaung Thanonkeo

ວັນທີ 24 ທັນວາ 2021 ເຈົ້າໜ້າທີ່ພະແນກ 202 ຫ້ອງສັນຕິບານ ປກສ ນະຄອນຫຼວງວຽງຈັນ, ພະແນກເຕັກໂນໂລຊີ ນະຄອນຫຼວງວຽງຈັນ ແລະ ປກສ ກຸ່ມທ່າງ່ອນ ໄດ້ສົມທົບກັນລົງກວດກາ ແລະ ແກ້ໄຂ ຮ້ານອິນເຕີເນັດຄາເຟ່ ຢູ່ຂອບເຂດບ້ານອຸດົມຜົນ ແລະ ບ້ານທ່າງ່ອນ ເມືອງໄຊທານີ ນະຄອນຫຼວງວຽງຈັນ ທີ່ລະເມີດກົດຫມາຍບ້ານເມືອງ ແລະ ລະເມີດຄໍາສັ່ງ ວ່າດ້ວຍການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19;  ເຊິ່ງປະກອບມີຮ້ານອິນເຕີເນັດຄາເຟ່ ຂອງນາງ ຈິດຕະພົງ ອາຍຸ 33 ປີ ອາຊີບຄ້າຂາຍ ຢູ່ບ້ານອຸດົມຜົນ, ຮ້ານອິນເຕີເນັດຄາເຟ່ ຂອງນາງ ຕູນີ່ ແລະ ທ້າວ ສຸກພາວັນ ທັງສອງຮ້ານຕັ້ງຢູ່ບ້ານທ່າງ່ອນ ເມືອງໄຊທານີ.

ໃນຂະນະດຽວກັນນີ້ ພັທ ບຸນສົງ ດາລາແສນ ຫົວໜ້າກອງບັນຊາການ ປກສ ເມືອງສີສັດຕະນາກ ໄດ້ໃຫ້ຮູ້ວ່າ: ໃນອາທິດຜ່ານມາ ເຈົ້າໜ້າທີ່ ກອງບັນຊາການ ປກສ ເມືອງສີສັດຕະນາກ ໄດ້ສຶກສາອົບຮົມເປົ້າໝາຍທີ່ພົວພັນກັບຢາເສບຕິດ ຢູ່ 12 ບ້ານ ມີເປົ້າໝາຍເຂົ້າຮ່ວມ 23 ຄົນ, ຍິງ 5 ຄົນ, ພ້ອມນັ້ນກໍ່ໄດ້ສຶກສາອົບຮົມຮ້ານທີ່ຂາຍເຄື່ອງດື່ມ ມີການຊຸມແຊວ ແລະ ປິດກາຍໂມງເວລາ ມີ 14 ຮ້ານ ແລະ ໃນຕໍ່ໜ້າເຈົ້າໜ້າທີ່ ກອງບັນຊາການ ປກສ ເມືອງສີສັດຕະນາກ ຈະສືບຕໍ່ເຮັດວຽກງານໂຄສະນາເຜີຍແຜ່ແຈ້ງການຕ່າງໆໃຫ້ທົ່ວເຖິງ. ສືບຕໍ່ເຮັດວຽກງານປະຈໍາການ, ປ້ອງກັນຄ້າຍຄຸມຂັງ ແລະ ກວດກາລາດຕະເວນເປັນປົກກະຕິ. ສືບຕໍ່ເຮັດບົດບັນທຶກສັນຍາປ້ອງກັນຄວາມສະຫງົບ ກັບຫ້າງຮ້ານຫົວໜ່ວຍທຸລະກິດທີ່ມີຄວາມສ່ຽງ ທີ່ຈະເປັນຈຸດມົ້ວສຸມຊຸມແຊວ, ຈຸດທີ່ຈະກໍ່ໃຫ້ເກີດມີສຽງແຕກສຽງດັງ ຫຼື ຈູດໝາກກະໂພກ.  ສືບຕໍ່ເຮັດວຽກງານສຶກສາອົບຮົມເປົ້າໝາຍຕາມແຜນການ ແລະ ກວດກາຄົນພັກເຊົາ.

Off

Comments are closed.