27th Dec2021

ປກສ ກຸ່ມຕ່າງໆ ເຊື່ອມຊືມແຜນການຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ

by Peaung Thanonkeo

ໃນອາທິດຜ່ານມານີ້ ປກສ ກຸ່ມ 4 ໂພນຕ້ອງ ເມືອງຈັນທະບູລີ ໄດ້ຈັດກອງປະຊຸມເຊື່ອມຊຶມວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ທີ່ຫ້ອງການ ປກສ ກຸ່ມ, ໂດຍການເຂົ້າຮ່ວມຂອງ ພັທ ສົມວິໄລ ໄຊສຸວັນ ຮອງຫົວໜ້າກອງບັນຊາການ ປກສ ເມືອງຈັນທະບູລີ, ມີບັນດາພະນັກງານນັກຮົບ, ປກສ ກຸ່ມ 4 ໂພນຕ້ອງ, ພະນັກງານລົງກໍ່ສ້າງຮາກຖານ, ອົງການຈັດຕັ້ງບ້ານ ເຂົ້າຮ່ວມ.

ພັທ ສົມວິໄລ ໄຊສຸວັນ ໃຫ້ຮູ້ວ່າ: ການຈັດຕັ້ງເຊື່ອມຊຶມວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດໃນຄັ້ງນີ້ ເພື່ອເຮັດໃຫ້ເຂົ້າໃຈເຖິງຜົນຮ້າຍ ແລະ ໄພອັນຕະລາຍຂອງຢາເສບຕິດ ທີ່ຈະເກີດຂຶ້ນຕໍ່ລູກຫຼານ, ສັງຄົມ, ບຸກຄົນໃດເສບ, ສູບ, ດົມ, ສີດ ເຂົ້າໄປຈະມີຜົນກະທົບຕໍ່ຮ່າງກາຍ ແລະ ຈິດປະສາດ; ພາໃຫ້ເກີດມີປະກົດການຫຍໍ້ທໍ້ ເປັນຕົ້ນແມ່ນປຸ້ນ, ຈີ້, ຊີງຊັບ, ອາລະວາດຄອບຄົວ.

ສໍາລັບຜູ້ຜະລິດ, ປຸງແຕ່ງ, ຊື້ຂາຍ, ຈຳໜ່າຍ, ຄອບຄອງເກັບຮັກສາ, ນຳເຂົ້າ-ສົ່ງອອກ ຈະຖືກດຳເນີນຄະດີຕາມລະບຽບກົດໝາຍ.

ໃນໄລຍະດຽວກັນ ປກສ ກຸ່ມສວນມອນ ເມືອງສີສັດຕະນາກ ກໍໄດ້ປະສານສົມທົບກັບອຳນາດການປົກຄອງບ້ານດອນປ່າໃໝ່ ພ້ອມກັນຈັດຕັ້ງຜັນຂະຫຍາຍການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ, ການຕ້ານສະກັດກັ້ນການແຜ່ລະບາດພະຍາດໂຄວິດ-19 ແລະ ວຽກງານຮັກສາຄວາມສະຫງົບ, ຄວາມເປັນລະບຽບຮຽບຮ້ອຍໄລຍະປີໃໝ່ຈະມາເຖີງນີ້ ນຳພາໂດຍ ພັທ ຄໍາກ້ຽງ ດຳກາສີ ຫົວໜ້າ ປກສ ກຸ່ມສວນມອນ, ມີການຈັດຕັ້ງບ້ານ ແລະ ປະຊາຊົນເຂົ້າຮ່ວມ.

ແລະ ປກສ ກຸ່ມທາດຂາວ ກໍ່ໄດ້ປະສານສົມທົບກັບອົງການປົກຄອງບ້ານບືງຂະຫຍອງ ແລະ ບ້ານໂນນສະຫວັນເໜືອ ເມືອງສີສັດຕະນາກ ໄດ້ຈັດຕັ້ງເຜີຍແຜ່ເອກະສານວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຜ່ານໂທລະໂຄ່ງທັງສອງບ້ານ ໂດຍມີ ພັທ ຄຳເຜີຍ ຈິດຕະວົງ ຫົວໜ້າ ປກສ ກຸ່ມທາດຂາວ ແລະ ອົງການປົກຄອງບ້ານທັງສອງບ້ານເຂົ້າຮ່ວມ.

 

 

 

Off

Comments are closed.