27th Dec2021

ເຈົ້າແຂວງຄຳມ່ວນ ລົງສຳຫລວດຈຸດກໍ່ສ້າງນໍ້າປະປາຊຸມຊົນ ບ້ານໂນນສີລາ ເມືອງໜອງບົກ

by Peaung Thanonkeo

ແຫລ່ງຂ່າວຈາກ ແຂວງຄຳມ່ວນ ໃຫ້ຮູ້ວ່າ: ວັນທີ 25 ທັນວາ ນີ້,ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ, ທ່ານ ຄຳພອນ ສີກຸມພົນ ເຈົ້າເມືອງໜອງບົກ ພ້ອມດ້ວຍບັນດາຫົວໜ້າພະແນກການຂັ້ນແຂວງ ລົງເຄື່ອນໄຫວຊຸກຍູ້, ສຳຫລວດ, ບຸກເບີກໜອງກັກເກັບນໍ້າ ແລະ ກໍ່ສ້າງລະບົບນໍ້າປະປາຊຸມຊົນ ໃຫ້ແກ່ບ້ານໂນນສີລາ ເມືອງໜອງບົກ, ເຊິ່ງບ້ານດັ່ງກ່າວ ແມ່ນປະສົບບັນຫາການຂາດນໍ້າໃຊ້ ເກືອບທຸກປີ ໂດຍສະເພາະໃນລະດູແລ້ງ.

ຜ່ານການສຳຫລວດຕົວຈິງ, ທ່ານເຈົ້າແຂວງຄໍາມ່ວນ ກໍໄດ້ຊີ້ນຳໃຫ້ພະແນກໂຍ ທາທິການ ແລະ ຂົນສົ່ງແຂວງ ສົມທົບກັບ ລັດວິສາຫະກິດນໍ້າປະປາ ເພື່ອອອກແບບຄິດໄລ່ໃຫ້ເໝາະສົມ ແລະ ລົງມືການກໍ່ສ້າງໂດຍໄວ ເພື່ອຕອບສະໜອງ ກັບຄວາມຮຽກຮ້ອງຕ້ອງການຂອງພໍ່ແມ່ປະຊາຊົນໃນເຂດດັ່ງກ່າວ. ບ້ານໂນນສີລາ ແມ່ນຕັ້ງຢູ່ທາງຕາເວັນອອກຂອງ ເມືອງໜອງບົກ ຫ່າງຈາກເທສະບານເມືອງ 23 ກິໂລແມັດ, ມີ 145 ຄອບຄົວ, ພົນລະເມືອງ 863 ຄົນ, ຖືເອົາອາຊີບການປູກຝັງ-ລ້ຽງສັດເປັນຕົ້ນຕໍ, ມີເນື້ອທີ່ທຳການຜະລິດ 237 ເຮັກຕາ, ສະເລ່ຍສະມັດຕະພາບນາປີ 3 ໂຕ່ນຕໍ່ເຮັກຕາ, ອັນທີ່ພົ້ນເດັ່ນ ບ້ານສາມາດປະຕິບັດພັນທະອາກອນໄດ້ 100% ຂອງແຜນການ.

ໃນໂອກາດດຽວກັນນີ້, ທ່ານເຈົ້າແຂວງ ຍັງໄດ້ພົບປະໂອ້ລົມກັບ ຄະນະພັກ, ອຳ ນາດການປົກຄອງບ້ານໂນນສີລາ ເອົາໃຈໃສ່ປຸກລະດົມປະຊາຊົນ ໃຫ້ເຂົ້າຮ່ວມຢ່າງເປັນເຈົ້າການ ໃນວຽກງານປ້ອງກັນຄວາມສະຫງົບ, ຄວາມເປັນລະບຽບຮຽບຮ້ອຍ, ຂົງເຂດ ປກຊ-ປກສ ຕ້ອງໄດ້ເຄື່ອນໄຫວເຮັດໜ້າທີ່ ຂອງຕົນເປັນປົກກະຕິ ດ້ວຍຄວາມຮັບຜິດ ຊອບສູງ, ສ້າງບ້ານໃຫ້ມີຄວາມສະຫງົບ, ປອດໄພ ໄປພ້ອມກັບ ການນຳເອົາເນື້ອໃນມະຕິ, ຄຳສັ່ງຕ່າງໆຂອງຂັ້ນເທິງວາງອອກໃນແຕ່ລະໄລຍະ ເຜີຍແຜ່ໃຫ້ປະຊາຊົນ ເພື່ອພ້ອມກັນຜັນຂະຫຍາຍໃຫ້ເລິກເຊິ່ງ ກວ້າງຂວາງ.

Off

Comments are closed.