28th Dec2021

ແຈ້ງການ: ການເພີ່ມທະວີຄວາມຮັບຜິດຊອບ ຕິດຕາມກວດກາ ແລະ ປະຕິບັດມາດຕະການ ຕໍ່ຫົວໜ່ວຍທຸລະກິດທີ່ ລະເມີດມາດຕະການທີ່ຄະນະສະເພາະກິດ ກຳນົດອອກ ໃນໄລຍະກະກຽມຕ້ອນຮັບປີໃໝ່ສາກົນ ຄສ 2022.

by Peaung Thanonkeo

ແຈ້ງການກ່ຽວກັບ ການເພີ່ມທະວີຄວາມຮັບຜິດຊອບ ຕິດຕາມກວດກາ ແລະ ປະຕິບັດມາດຕະການ ຕໍ່ຫົວໜ່ວຍທຸລະກິດທີ່ ລະເມີດມາດຕະການທີ່ຄະນະສະເພາະກິດ ກຳນົດອອກ ໃນໄລຍະກະກຽມຕ້ອນຮັບປີໃໝ່ສາກົນ ຄສ 2022 ທີ່ຈະມາເຖິງນີ້.

ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ນະຄອນຫຼວງວຽງຈັນ ຂໍຖືເປັນກຽດແຈ້ງມາຍັງບັນດາທ່ານ ໃຫ້ຍົກສູງຄວາມຮັບຜິດຊອບຫນ້າທີ່ການເມືອງ ໃນການເພີ່ມທະວີຄວາມເຂັ້ມງວດ ຕິດຕາມກວດກາ ແລະ ປະຕິບັດມາດຕະການທາງບໍລິຫານ ແລະ ສັງຄົມ ຕາມແຈ້ງການເລກທີ 41/ຈນວ ແລະ ເລກທີ 44/ສພກ.ນວ ກໍານົດອອກ ໃນໄລຍະກະກຽມຕ້ອນຮັບປີໃຫມ່ສາກົນ ຄສ 2022 ທີ່ຈະມາເຖິງນີ້ ຢ່າງເຂັ້ມງວດ, ໃນນັ້ນ ໃຫ້ເອົາໃຈໃສ່ປະຕິບັດ ດັ່ງນີ້:

ໃຫ້ອົງການປົກຄອງເມືອງ 9 ເມືອງ, ກອງບັນຊາການ ປກສ, ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແລະ ພະແນກອຸດສາຫະກໍາ ແລະ ການຄ້າ ນະຄອນຫຼວງວຽງຈັນ ສົມທົບກັບພາກສ່ວນທີ່ກ່ຽວຂ້ອງ ລົງຕິດຕາມກວດກາການດໍາເນີນກິດຈະການຂອງແຕ່ລະຫົວຫນ່ວຍທຸລະກິດ ຢ່າງເປັນປົກກະຕິ, ຫ້າມບໍ່ໃຫ້ມີການສວຍໂອກາດ ບໍລິການເຄື່ອງດື່ມທີ່ມີທາດເຫຼົ້າ ຢ່າງເດັດຂາດ, ຖ້າມີຫົວຫນ່ວຍໃດລະເມີດບໍລິການເຄື່ອງດື່ມທີ່ມີທາດເຫຼົ້າ ກໍ່ຄືເປັນການລະເມີດເປີດບໍລິການຮ້ານກິນດື່ມ ແມ່ນໃຫ້ສັ່ງປິດກິດຈະການ, ຖອນໃບອະນຸຍາດ ແລະ ປັບໃຫມ ໄປພ້ອມໆກັນ ໂດຍບໍ່ໃຫ້ມີການສຶກສາອົບຮົມ ຕາມທີ່ໄດ້ກໍານົດໃນແຈ້ງການ ເລກທີ 44/ສພກ.ນວ ໃນຂໍ້ 5, 6 ແລະ 8. ພ້ອມທັງ ດໍາເນີນຄະດີ ຫົວຫນ່ວຍທຸລະກິດທີ່ໄດ້ລະເມີດ ແລະ ເປັນຕົ້ນເຫດທີ່ພາໃຫ້ເກີດມີການລະບາດເຊື້ອພະຍາດ Covid-19 ພາຍໃນສະຖານທີ່ຂອງຕົນ.

ໃຫ້ບັນດາອົງການປົກຄອງເມືອງ, ບ້ານ ແລະ ກອງບັນຊາການ ປກສ ນະຄອນຫຼວງວຽງຈັນ ເປັນເຈົ້າການ ຕິດຕາມກວດກາ ຫ້າມບໍ່ໃຫ້ມີການຈັດກິດຈະກໍາເຕົ້າໂຮມຊຸມແຊວ ແລະ ການຈັດງານລ້ຽງສັງສັນ ທຸກຮູບແບບ ຢູ່ທຸກສະຖານທີ່ຢ່າງເດັດຂາດ.

 

 

 

Off

Comments are closed.