29th Dec2021

ພະແນກຕຳຫຼວດ ປກສ ເມືອງໄຊເສດຖາ ແຕ່ງຕັ້ງອະນຸກໍາມະການ ຮັບຜິດຊອບຈັດຕັ້ງຜັນຂະຫຍາຍວາລະແຫ່ງຊາດ

by Peaung Thanonkeo

ພະແນກຕໍາຫຼວດ ປກສ ເມືອງໄຊເສດຖາ ໄດ້ຈັດກອງປະຊຸມແຕ່ງຕັ້ງອະນຸກໍາມະການ ຮັບຜິດຊອບຈັດຕັ້ງຜັນຂະຫຍາຍວາລະແຫ່ງຊາດ ການແກ້ໄຂບັນຫາຢາເສບຕິດ ໃນວັນທີ 27 ທັນວາ 2021 ໂດຍການເປັນປະທານຂອງ ພັທ ສີເພັດ ພິມມະສອນ ຫົວໜ້າກອງບັນນຊາການ ປກສ ເມືອງໄຊເຊດຖາ, ມີ ພັທ ໜູໄກ ອ່ອນມາວົງ ຫົວໜ້າພະແນກຕໍາຫຼວດ ປກສ ເມືອງໄຊເຊດຖາ, ມີບັນດາພະນັກງານ-ນັກຮົບ ແລະ ປກສ ກຸ່ມບ້ານເຂົ້າຮ່ວມ.

ໃນກອງປະຊຸມ ພັຕ ສຸກສະຫວັນ ສິງບັນດິດ ຮອງຫົວໜ້າພະແນກຕໍາຫຼວດ ປກສ ເມືອງໄຊເຊດຖາ ໄດ້ຜ່ານຂໍ້ຕົກລົງ ວ່າດ້ວຍການແຕ່ງຕັ້ງອະນຸກໍາມະການພະແນກຕໍາຫຼວດ ຮັບຜິດຊອບຈັດຕັ້ງຜັນຂະຫຍາຍວາລະແຫ່ງຊາດ ການແກ້ໄຂບັນຫາຢາເສບຕິດ ໃນນີ້ ໄດ້ແຕ່ງຕັ້ງຄະນະຮັບຜິດຊອບບັນຊາລວມ 6 ສະຫາຍ, ອານຸກໍາມະການກອງເລຂາ 6 ສະຫາຍ, ອານຸກຳມະການໂຄສະນາ ແລະ ປັບປຸງການຈັດຕັ້ງ 4 ສະຫາຍ, ອານຸກໍາມະການສະກັດກັ້ນ ແລະ ຕ້ານຢາເສບຕິດ 4 ສະຫາຍ, ອານຸກໍາມະການນໍາສະເໜີປັບປຸງກົດໝາຍ ແລະ ສ້າງນິຕິກໍາ 3 ສະຫາຍ ແລະ ອານຸກໍາມະການເສດຖະກິດ ( ຄຸ້ມຄອງເຄື່ອງຂອງກາງຄະດີ ) 4 ສະຫາຍ.

ຫົວໜ້າກອງບັນຊາການ ປກສ ເມືອງທັງໄດ້ ເນັ້ນໃຫ້ພະນັກງານທີ່ຖືກແຕ່ງຕັ້ງ ຍົກສູງຄວາມຮັບຜິດຊອບຂອງຕົນ ເປັນເຈົ້າການໃນການປະຕິບັດໜ້າທີ່ ທີ່ການຈັດຕັ້ງຂັ້ນເທິງໄດ້ມອບໝາຍໃຫ້ ຍົກສູງຄວາມຖືກຕ້ອງ, ທຸກໆໜ້າວຽກຕ້ອງມີການປຶກສາຫາລືກັນ, ເຮັດວຽກເປັນໝູ່ຄະນະ ສຽງສ່ວນໜ້ອຍຕ້ອງປະຕິບັດຕາມສຽງສ່ວນຫຼາຍ ເພື່ອແນໃສ່ເຮັດໃຫ້ການແກ້ໄຂບັນຫາຢາເສບຕິດ ພາຍໃນເມືອງ ກໍຄືນະຄອນຫຼວງວຽງຈັນ ໃຫ້ຫຼຸດໜ້ອຍຖ້ອຍລົງເປັນກ້າວໆ.

Off

Comments are closed.