30th Dec2021

ເຈົ້າໜ້າທີ່ຕໍາຫຼວດເມືອງ ສີໂຄດຕະບອງ, ປກສ ກຸ່ມທ່າງ່ອນ ແລະ ປກສ ເມືອງສີສັດຕະນາກ ກັກເປົ້າໝາຍຄ້າຂາຍຢາເສບຕິດ 5 ຄົນ ພ້ອມຢາບ້າ 8.960 ເມັດ.

by somchan

ວັນທີ 27 ທັນວາ 2021 ນີ້ ເຈົ້າໜ້າທີ່ຕໍາຫຼວດ ກອງບັນຊາການ ປກສ ເມືອງ ສີໂຄດຕະບອງ ນະຄອນຫຼວງວຽງຈັນ ສາມາດແກ້ໄຂ ແລະ ຈັບຕົວເປົ້າໝາຍຄ້າຂາຍຢາເສບຕິດ ໄດ້ 1 ຄົນຄື: ທ້າວ ແສງອາລຸນ ອາຍຸ 32 ປີ ຢູ່ບ້ານ ທົ່ງປົ່ງ ເມືອງ ສີໂຄດຕະບອງ ພ້ອມຂອງກາງຢາບ້າ 2.468 ເມັດ ມາດໍາເນີນຄະດີ. ຜ່ານການສອບສວນເບື້ອງຕົ້ນ ຜູ້ກ່ຽວໃຫ້ການຮັບສາລະພາວ່າ: ຢາບ້າຈໍານວນ ດັ່ງກ່າວ ແມ່ນຂອງຕົນເອງ ຊື້ມານໍາໄວລຸ້ນຢູ່ເຂດເມືອງສີໂຄດຕະບອງ ແລ້ວໄດ້ນໍາມາຂາຍຕໍ່ ໃຫ້ກັບກຸ່ມຄົນຢູ່ພາຍໃນບ້ານ ແລະ ບ້ານອ້ອມຂ້າງ. ປັດຈຸບັນ ເຈົ້າໜ້າທີ່ຕໍາຫຼວດ ກອງບັນຊາການ ປກສ ເມືອງ ສີໂຄດຕະບອງ ໄດ້ນໍາຕົວຜູ້ກ່ຽວໄປກັກກັນ ພາຍຫຼັງຄົບກໍານົດເວລາ 14 ວັນ ຕາມມາດຕະການຂອງຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດພະຍາດໂຄວິດ-19 ຈິ່ງຈະນໍາຕົວມາດໍາເນີນຄະດີ ຕາມກົດໝາຍ.

ໃນວັນທີ 26 ທັນວາ 2021 ເຈົ້າໜ້າທີ່ ປກສ ກຸ່ມທ່າງ່ອນ ເມືອງ ໄຊທານີ ນະຄອນຫຼວງວຽງຈັນ ໄດ້ເຂົ້າກັກຕົວ ທ້າວ ສອນທະວີ ອາຍຸ 37 ປີ ແລະ ທ້າວ ບຸນຍູ້ ອາຍຸ 33 ປີ ຢູ່ບ້ານລາດຄວາຍ ເມືອງໄຊທານີ ນະຄອນຫຼວງວຽງຈັນ ຢູ່ເຮືອນຂອງພວກກ່ຽວ ແລະ ພ້ອມຢາບ້າ 6,492 ເມັດ ແລ້ວມອບສົ່ງພວກກ່ຽວໃຫ້ ເຈົ້າໜ້າທີ່ຕໍາຫຼວດ ກອງບັນຊາການ ປກສ ເມືອງໄຊທານີ ດຳເນີນຄະດີຕາມລະບຽບກົດໝາຍ ແລະໃນວັນທີ 28 ທັນວາ 2021, ເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານຢາເສບຕິດ ພະແນກຕຳຫຼວດ  ກອງບັນຊາການ ປກສ ເມືອງສີສັດຕະນາກ ນະຄອນຫຼວງວຽງຈັນ, ໄດ້ແກ້ໄຂເປົ້າໝາຍຄ້າຂາຍຢາເສບຕິດ ຢູ່ບ້ານສະພານທອງໃຕ້ ເມືອງສີສັດຕະນາກ ສາມາດກັກຕົວເປົ້າໝາຍໄດ້ 2 ຄົນ, ຍິງ 1 ຄົນ, ພ້ອມຂອງກາງຢາບ້າຈຳນວນ 88 ເມັດ ແລະ ຢາໄອສ໌ 01 ຖົງ ນໍ້າໜັກ 213,9 g. ເປົ້າໝາຍທັງສອງຄົນຊື່: ນາງ ຈອນນີ້ ຫຼື ນີ້ ອາຍຸ 31 ປີ ຢູ່ບ້ານສະພານທອງໃຕ້ ແລະ ທ້າວ ສົມສະນິດ ຫຼື ຕີ້ ອາຍຸ 39 ປີ ຢູ່ບ້ານໂພນສະຫວັນເໜືອ ເມືອງສີສັດຕະນາກ ນະຄອນຫຼວງວຽງຈັນ. ປັດຈຸບັນ ພວມດໍາເນີນການສືບສວນ-ສອບສວນຂະຫຍາຍຜົນຫາຜູ້ຮ່ວມຂະບວນການ ມາດໍາເນີນຄະດີຕາມຂັ້ນຕອນຂອງກົດໝາຍ.

Off

Comments are closed.