31st Dec2021

ກົມຄົ້ນຄວ້າວິທະຍາສາດ ແລະ ປະຫວັດສາດ ກະຊວງ ປກສ ສະຫລຸບການເຄື່ອນໄຫວວຽກງານປະຈໍາປີ 2021

by somchan

ກົມຄົ້ນຄວ້າວິທະຍາສາດ ແລະ ປະຫວັດສາດ ກະຊວງ ປກສ ສະຫລຸບການເຄື່ອນໄຫວວຽກງານປະຈໍາປີ 2021 ແລະ ວາງທິດທາງແຜນການ ປີ 2022. ໃນທ້າຍອາທິດທີ່ຜ່ານມາ, ໂດຍການເປັນປະທານຂອງ ພົຈວ ສະແຫວງ ພົມມະລີ ຫົວຫນ້າກົມຄົ້ນຄວ້າວິທະຍາສາດ ແລະ ປະຫວັດສາດກະຊວງ ປກສ, ມີຄະນະພັກ, ຄະນະບັນຊາ, ຄະນະກົມ-ຮອງກົມ, ນາຍ ແລະ ພົນຕໍາຫລວດເຂົ້າຮ່ວມ.

ພັອ ທັດສະພອນ ວົງພະຈັນ ຮອງຫົວຫນ້າກົມຄົ້ນຄວ້າວິທະຍາສາດ ແລະ ປະຫວັດສາດ ກະຊວງ ປກສ ໄດ້ຍົກໃຫ້ເຫັນຜົນງານການເຄື່ອນໄຫວວຽກງານ ປະຈໍາປີ 2021 ຄະນະພັກ-ຄະນະບັນຊາ ກົມຄົ້ນຄວ້າວິທະຍາສາດ ແລະ ປະຫວັດສາດ ກະຊວງ ປກສ ໄດ້ຖືເອົາວຽກງານການສຶກສາອົບຮົມທາງ ດ້ານການເມືອງແນວຄິດ ໃຫ້ແກ່ນາຍ ແລະ ພົນຕໍາຫຼວດຢູ່ພາຍໃນເປັນກົກ, ຕິດພັນກັບການເຂົ້າຮ່ວມຮັບຝັງ ແລະ ຈັດຕັ້ງເຊື່ອມຊົມ, ເຜີຍແຜ່ບັນດາເອກະສານແນວທາງ, ແຜນນະໂຍບາຍຂອງພັກ-ລັດ, ມະຕິ, ຄໍາສັ່ງ, ມູນເຊື້ອຂອງຊາດ, ຂອງພັກ ແລະ ຂອງກໍາລັງປະກອບອາວຸດ ເນື່ອງໃນວັນສໍາຄັນຕ່າງໆ ເປັນປົກກະຕິ, ເອົາໃຈໃສ່ຄຸ້ມຄອງ, ກວດກາ ແລະ ປ້ອງກັນກໍາລັງພາຍໃນກົມ ໃຫ້ມີສະຕິຕໍ່ການຈັດຕັ້ງ, ປະຕິບັດລະບຽບວິໄນຂອງກໍາລັງ ແລະ ເຄົາລົບກົດຫມາຍ ຂອງລັດຢ່າງເຂັ້ມງວດ, ຕິດພັນກັບ ການ ກວດກາບັນຫາທີ່ຍັງຄົງຄ້າງຜ່ານມາ ແລະ ບັນຫາປິ່ນອ້ອມທີ່ມີຄວາມສ່ຽງຕ່າງໆ ເພື່ອສືບຕໍ່ຄົ້ນຄວ້າແກ້ໄຂ ຢູ່ໃນຂັ້ນກົມຮັບຜິດຊອບ ແລະ ນໍາສະເຫນີຂັ້ນເທິງພິຈາລະນາຕາມລະບຽບການ, ເອົາໃຈໃສ່ຄົ້ນຄວ້າ, ປັບປຸງ ແລະ ຮຽບຮຽງປຶ້ມປະຫວັດສາດ 60 ປີ ຂອງກໍາລັງປ້ອງກັນຄວາມສະຫງົບປະຊາຊົນ. ພ້ອມທັງ ຈັດສົ່ງໃຫ້ພາກສ່ວນກ່ຽວຂ້ອງສໍາເລັດ, ຮ່ວມມືກັບຄະນະຮັບຜິດຊອບ ກະຊວງປ້ອງກັນຄວາມສະຫງົບ ຫວຽດນາມ ຄົ້ນຄວ້າ, ຮຽບຮຽງປະຫວັດສາດ “ຄະນະຊ່ຽວຊານກະຊວງປ້ອງກັນຄວາມສະຫງົບ ສສ ຫວຽດນາມ ປະຈໍາ ສປປ ລາວ, ພ້ອມທັງ ສົມທົບພາກສ່ວນກ່ຽວຂ້ອງຈັດພິມເປັນປື້ມ ແລະ ແຈກຢາຍໃຫ້ພາກສ່ວນກ່ຽວຂ້ອງທັງສູນກາງ ແລະ ທ້ອງຖິ່ນສໍາເລັດ, ເອົາໃຈໃສ່ກວດແກ້ ແລະ ປະກອບຄໍາເຫັນໃສ່ປຶ້ມປະຫວັດສາດມູນເຊື້ອ ຂອງກົມກອງທ້ອງຖິ່ນ 9 ກອງບັນຊາການ ປກສ ແຂວງ ແລະ ນໍາສະເຫນີກະຊວງ ຮັບຮອງວັນສ້າງຕັ້ງກອງບັນຊາການ ປກສ ແຂວງ ໄຊສົມບູນ ສໍາເລັດ, ປັບປຸງເອກະສານຄູມືວຽກງານ ຄົ້ນຄວ້າປະຫວັດສາດ ປກສ ສໍາເລັດ. ນອກນັ້ນ, ໄດ້ປັບປຸງເນື້ອໃນຈັດວາງສະແດງ, ບົດນໍາທ່ຽວ ຂອງຫໍພິພິທະພັນ ປກສ ໃຫ້ມີສີສັນໃຫມ່ ແລະ ອຸດົມສົມບູນຂຶ້ນ, ປັບປຸງເນື້ອໃນຈັດວາງສະແດງ ແລະ ບູລະນະ ວັດຖຸພັນກາງແຈ້ງ ເພື່ອຮັບໃຊ້ໃຫ້ແກ່ການສະເຫຼີມສະຫຼອງວັນສ້າງຕັ້ງ ກໍາລັງປ້ອງກັນຄວາມສະຫງົບ ປະຊາຊົນ ຄົບຮອບ 60 ປີ, ໄດ້ຮັບແຂກເຂົ້າຊົມເນື່ອງໃນວັນສ້າງຕັ້ງກໍາລັງ ແລະ ວັນສໍາຄັນຕ່າງໆ ຂອງຊາດ, ຂອງພັກ ແລະ ຂອງກໍາລັງປະກອບອາວຸດ, ນັບທັງແຂກການນໍາຂັ້ນສູງ ຂອງພັກ-ລັດ, ຂັ້ນກະຊວງ, ກົມກອງ ແລະ ພາກສ່ວນທີ່ກ່ຽວຂ້ອງທັງພາຍໃນ ແລະ ຕ່າງປະເທດ, ພົວພັນປະສານສົມທົບກັບກົມກອງອ້ອມຂ້າງກະຊວງ ແລະ ກອງບັນຊາການ ປກສ ນະຄອນຫຼວງວຽງຈັນ ເພື່ອເກັບກໍາຂໍ້ມູນຮູບພາບການເຄື່ອນໄຫວວິຊາສະເພາະ, ຕິດພັນກັບການລົງແນະນໍາ ແລະ ຊຸກຍູ້ການສ້າງຫ້ອງວາງສະແດງມູນເຊື້ອ ຂອງກົມກອງອ້ອມຂ້າງກະຊວງ ແລະ ກອງບັນຊາການ ປກສ ນະຄອນຫຼວງວຽງຈັນ, ປກສ ແຂວງ ວຽງຈັນ. ພ້ອມກັນນັ້ນ ກໍ່ໄດ້ ສະຫນອງຂໍ້ມູນ ແລະ ຮູບພາບໃຫ້ພາກສ່ວນທີ່ກ່ຽວຂ້ອງ ເພື່ອຮັບໃຊ້ເຂົ້າໃນວຽກງານຂອງຕົນຈໍານວນຫນຶ່ງ , ສ່ວນທິດທາງແຜນການໃນຕໍ່ຫນ້າ ຈະສືບຕໍ່ຊຸກຍູ້ກົມກອງທີ່ບໍ່ທັນສໍາເລັດການຄົ້ນຄວ້າຂຽນປື້ມປະຫວັດ ມູນເຊື້ອ ແລະ ກໍານົດວັນສ້າງຕັ້ງ ຂອງຕົນເພື່ອນໍາສະເຫນີຂັ້ນເທິງຕົກລົງຮັບຮອງຕາມລະບຽບຫຼັກການ, ສົມທົບກັບຄະນະຮັບຜິດຊອບທີ່ກ່ຽວຂ້ອງປັບປຸງປຶ້ມປະຫວັດມູນເຊື້ອ ຂອງກໍາລັງຄົ້ນຄວ້າວິທະຍາສາດ ແລະ ປະຫວັດສາດ ປກສ ຄົບຮອບ 20 ປີ (9 ສິງຫາ 2002-9 ສິງຫາ 2012), ສືບຕໍ່ປັບປຸງເນື້ອໃນຈັດວາງສະແດງ ຂອງຫໍພິພິທະພັນ ປກສ ເນື່ອງໃນໂອກາດວັນສ້າງຕັ້ງກໍາລັງປ້ອງກັນຄວາມສະຫງົບ ຄົບຮອບ 61 ປີ ຕາມການຕົກລົງຮັບຮອງ ແລະ ຊີ້ນໍາ ຂອງກະຊວງ, ຕິດພັນກັບການກະກຽມພິທີເປີດການເຂົ້າຊົມ ເປັນທາງການໃຫ້ສໍາເລັດຕາມແຜນການ ແລະ ຈັດຕັ້ງຮັບແຂກເຂົ້າຊົມໃຫ້ໄດ້ຮັບຜົນດີ, ສືບຕໍ່ຄຸ້ມຄອງ ແລະ ສະຫມອງເອກະສານຄົ້ນຄວ້າວິທະຍາສາດ, ຂໍ້ມູນ-ຂ່າວສານຕ່າງໆ ຂອງຫ້ອງສະຫມຸດໃຫ້ທັນສະໄຫມ ທັນກັບສະພາບການ, ຕິດພັນກັບການພົວພັນກັບພາກສ່ວນທີ່ກ່ຽວຂ້ອງ ແລະ ບັນດາສະຫມຸດອື່ນໆ ເພື່ອຊອກຄົ້ນປຶ້ມ ແລະ ເອກະສານສໍາຄັນຕ່າງໆ ມາປະກອບໃສ່ຫ້ອງສະຫມຸດ ເພື່ອອໍານວຍຄວາມສະດວກ ແລະ ບໍລິການ ໃຫ້ນັກຄົ້ນຄວ້າໄດ້ຢ່າງຮັບປະກັນໃຫ້ໄດ້ຮັບຜົນສໍາເລັດເປັນກ້າວໆ.

 

 

Off

Comments are closed.