31st Dec2021

ກອງບັນຊາການປ້ອງກັນທີ່ຕັ້ງ ກະຊວງ ປກສ ສະຫຼຸບວຽກງານການເຄື່ອນໄຫວປະຈໍາປີ 2021

by somchan

ກອງບັນຊາການປ້ອງກັນທີ່ຕັ້ງ ກະຊວງ ປກສ ສະຫຼຸບວຽກງານການເຄື່ອນໄຫວປະຈໍາປີ 2021 ໃນວັນທີ 30 ທັນວາ 2021 ໂດຍການເປັນປະທານຂອງ ພົວຈ ໄຊສີ ແກ້ວສະຫ່ງາ ຫົວຫນ້າກອງບັນຊາການປ້ອງກັນທີ່ຕັ້ງ ກະຊວງ ປກສ ມີບັນດາ ຄະນະພັກ-ຄະນະບັນຊາ ແລະ ພະນັກງານຫຼັກແຫຼ່ງ ເຂົ້າຮ່ວມ.

ພັທ ສົມລີ ຊາວານາ ຫົວຫນ້າຫ້ອງການ ກອງບັນຊາການປ້ອງກັນທີ່ຕັ້ງ ໄດ້ຂື້ນຜ່ານ ຮ່າງບົດສະຫຼຸບວຽກງານໄລຍະ 1 ປີຜ່ານມາ ຄະນະພັກ-ຄະນະບັນຊາໄດ້ເອົາໃຈໃສ່ບັນຊາ-ນໍາພາ ກໍາລັງປ້ອງກັນທີ່ຕັ້ງ ເຄື່ອນໄຫວປະຕິບັດຫນ້າທີ່ວິຊາສະເພາະຕາມພາລະບົດບາດ ໂດຍມີການຄົ້ນຄວ້າວາງແຜນການ, ວິທີການ, ມາດຕະການຈັດຕັ້ງວາງກໍາລັງທີ່ເຫມາະສົມໃນການປ້ອງກັນ ໂດຍສະເພາະແມ່ນ ການປ້ອງກັນບັນດາສໍານັກງານ-ອົງການທຽບເທົ່າ 39 ແຫ່ງ, ປ້ອງກັນພື້ນຖານເສດຖະກິດ, ວັດທະນາທໍາ-ສັງຄົມແຫ່ງຊາດ 61 ແຫ່ງ, ໂຄງການກໍ່ສ້າງ 2 ແຫ່ງ, ປ້ອງກັນບັນດາສະຖານທູດ-ກົງສູນ, ອົງການຈັດຕັ້ງສາກົນ 25 ແຫ່ງ ແລະ ປ້ອງກັນເສັ້ນທາງລົດໄຟ 58 ຈຸດ, ສົມທົບກັບກົມກອງວິຊາສະເພາະອຶ່ນໆ ຢູ່ອ້ອມຂ້າງກະຊວງ ແລະ ຢູ່ທ້ອງຖິ່ນຢ່າງເປັນປົກກະຕິ, ເອົາໃຈໃສ່ຈັດຕັ້ງກໍາລັງເຂົ້າປະຈໍາການ ກຽມພ້ອມວຽກງານວິຊາສະເພາະຕະຫຼອດ 24 ຊົ່ວໂມງ ແລະ ຈັດຕັ້ງອອກກວດກາລາດຕະເວນໃນແຕ່ລະມື້ ຕາມຂອບເຂດຮັບຜິດຊອບຂອງຕົນຢ່າງເປັນປົກກະຕິ. ເອົາໃຈໃສ່ວຽກງານປ້ອງກັນຄວາມສະຫງົບ ທາງດ້ານການເມືອງ ແລະ ຄວາມເປັນລະບຽບຮຽບຮ້ອຍທາງສັງຄົມ, ວຽກງານປັບປຸງ-ກໍ່ສ້າງກໍາລັງປ້ອງກັນທີ່ຕັ້ງ ໃຫ້ປອດໃສ ເຂັ້ມແຂງ ຫນັກແຫນ້ນ ແລະ ມີແບບແຜນທັນສະໄຫມ ເພື່ອຍົກສູງຄວາມຮູ້-ຄວາມສາມາດ ຂອງກໍາລັງປ້ອງກັນທີ່ຕັ້ງແຕ່ລະ ຂັ້ນໃຫ້ເຂົ້າສູ່ລະບອບລະບຽບຄຸນນະພາບໃຫມ່.

 

Off

Comments are closed.