01st Jan2022

1 ປີ ຜ່ານມາ ປກສ ນວ ສາມາດແກ້ໄຂຄະດີໄດ້ 1,651 ເລື່ອງ, ກັກຕົວຜູ້ຖືກຫາ 2.166 ຄົນ.

by somchan

ວັນທີ 30 ທັນວາ 2021 ທີ່ກອງບັນຊາການ ປກສ ນະຄອນຫຼວງວຽງຈັນ, ໄດ້ຈັດກອງປະຊຸມສະຫຼຸບວຽກງານປ້ອງກັນຄວາມສະຫງົບຮອບດ້ານ ແລະ ວຽກງານກໍ່ສ້າງຮາກຖານການເມືອງ ປີ 2021 ທິດທາງແຜນການ ປີ 2022, ໂດຍການເປັນປະທານຂອງ ທ່ານ ປອ ອາດສະພັງທອງ ສີພັນດອນ ກໍາມະການສູນກາງພັກ ເຈົ້າຄອງນະຄອນຫຼວງວຽງຈັນ, ມີ ພົທ ກົງທອງ ພົງວິຈິດ ກໍາມະການສູນກາງພັກ ຮອງລັດຖະມົນຕີ ກະຊວງ ປກສ, ມີ ພັອ ສຸກພະຈັນ ບຸດດາຄໍາ ຄະນະປະຈໍາພັກ ນະຄອນຫຼວງວຽງຈັນ ເລຂາຄະນະພັກ ຫົວໜ້າກອງບັນຊາການ ປກສ ນະຄອນຫຼວງວຽງຈັນ, ມີຄະນະກອງບັນຊາການ, ຄະນະຫ້ອງ, ກອງພັນ, ຄ້າຍຄຸມຂັງ-ດັດສ້າງ ເຂົ້າຮ່ວມ 120 ສະຫາຍ ແລະ ຜ່ານລະບົບວີດີໂອທາງໄກ.

ໃນກອງປະຊຸມ ພັອ ພູພອນ ວົງພະໄຕ ຮອງຫົວໜ້າກອງບັນຊາການ ປກສ ນະຄອນຫຼວງວຽງຈັນ ໄດ້ ຜ່ານຮ່າງບົດສະຫຼຸບວຽກງານປ້ອງກັນຄວາມສະຫງົບ ຮອບດ້ານ ແລະ ວຽກງານກໍ່ສ້າງຮາກຖານການເມືອງ ປີ 2021 ທິດທາງແຜນການ ປີ 2022 ໃຫ້ຮູ້ວ່າ: ປີ 2021 ຜ່ານມາ, ກອງບັນຊາການ ປກສ ນະຄອນຫຼວງວຽງຈັນ ສາມາດຍາດໄດ້ຜົນງານຫຼາຍດ້ານເປັນຕົ້ນແມ່ນ ການແກ້ໄຂບັນຫາປະກົດການຫຍໍ້ໍທໍ້ຕ່າງໆໃນສັງຄົມໄດ້ ທັງໝົດ 1,651 ເລື່ອງ, ກັກຕົວຜູ້ຖືກຫາໄດ້ 2.166 ຄົນ, ຍິງ 272 ຄົນ; ໃນນີ້, ມີຄົນຕ່າງປະເທດ 32 ຄົນ ( ທຽບໃສ່ປີ 2020 ແມ່ນຫຼຸດລົງ 1,330 ເລື່ອງ ), ສະພາບທີ່ພົ້ນເດັ່ນກວ່າໝູ່ ແມ່ນບັນຫາລັກຊັບພົນລະເມືອງ ເກີດຂຶ້ນ 709 ເລື່ອງ (ລັກລົດຈັກ 586 ຄັນ), ເກີດຂຶ້ນຫຼາຍກວ່າໝູ່ ແມ່ນໂຈລະກໍາຂໍ້ມູນທາງອິນເຕີ 102 ເລື່ອງ, ຊື້-ຂາຍຊັບຜິດກົດໝາຍ 87 ເລື່ອງ, ສໍ້ໂກ້ງຊັບ 72 ເລື່ອງ, ຊິງຊັບ 44 ເລື່ອງ, ປຸ້ນຊັບ 23 ເລື່ອງ, ທໍາຮ້າຍຮ່າງກາຍ 58 ເລື່ອງ, ຄາດຕະກໍາ 12 ເລື່ອງ, ມີອາວຸດເສິກໄວ້ຄອບຄອງ 50 ເລື່ອງ, ທໍາລາຍຊັບ 30 ເລື່ອງ ( ທຸບແວ່ນລົດໃຫຍ່ 8 ເລື່ອງ ) ແລະ ອື່ນໆ; ຜົນເສຍຫາຍທັງໝົດມີ: ເງີນ 2.714 ລ້ານກວ່າກີບ, ຄຳຮູບປະພັນໜັກ 1 ກິໂລ ກັບ 38 ບາດ, ສາຍແຂນເພັດ 2 ເສັ້ນ, ຄໍາຝຼັ່ງ 11 ບາດ, ເງີນຮູບປະພັນ 28 ບາດ, ສາຍແອວທອງນາກ 3 ເສັ້ນ, ລົດຈັກ 586 ຄັນ, ລົດໃຫ່ຍ 5 ຄັນ, ລົດຖີບ 2 ຄັນ, ປືນສັ້ນ 7 ກະບອກ ພ້ອມລູກ 29 ລູກ, ຄອມພີວເຕີ 33 ໜ່ວຍ, ໂທລະສັບມືຖື 119 ໜ່ວຍ, ໂມງໃສ່ແຂນ 13 ໜ່ວຍ, ກ້ອງຖ່າຍຮູບ 3 ໜ່ວຍ,ໂທລະພາບ 13 ໜ່ວຍ ພຣະ 22 ອົງ, ໄອແພັດ 6 ໜ່ວຍ, ຕູ້ເຊັບ 6 ໜ່ວຍ, ກ້ອງວົງ ຈອນປິດ 4 ໜ່ວຍ, ແອເຢັນ 18 ໜ່ວຍ ບັດເຕີມໂທລະສັບ ມູນຄ່າ 24.230.000 ກີບ ແລະ ອື່ນໆ. ສາມາດເກັບກູ້ຄືນໄດ້ມີ: ຄຳຮູບປະພັນໜັກ 5 ບາດ, ເງີນ 554 ລ້ານກວ່າກີບ, ລົດຈັກ 255 ຄັນ, ລົດໃຫຍ່ 11 ຄັນ, ຄອມພີວເຕີຕັ້ງໂຕະ 7 ໜ່ວຍ, ໂທລະສັບມືຖື 37 ໜ່ວຍ, ປືນສັ້ນ 29 ກະບອກ, ປືນເສັ້ນດັດແປງ 5 ກະບອກ, ປືນຍາວ 2 ກະບອກ, ລູກປືນສັ້ນ 502 ລູກ, ລູກປືນຍາວ 54 ລູກ, ໝາກເເຕກ 2 ໜ່ວຍ ແລະ ອື່ນໆ.

ໃນຕອນທ້າຍກອງປະຊຸມ  ພົນໂທ ກົງທອງ ພົງວິຈິດ ໄດ້ໂອ້ລົມໃຫ້ທິດຊີ້ນໍາຕໍ່ກຳລັງ ປກສ ນະຄອນຫຼວງວຽງຈັນ ເປັນຕົ້ນ  ໃຫ້ຄະນະພັກ-ຄະນະບັນຊາແຕ່ລະຂັ້ນ ກຳລັງ ປກສ ນະຄອນຫຼວງວຽງຈັນ ຍົກສູງຄວາມຮັບຜິດຊອບ ໜ້າທີ່ການເມືອງຂອງຕົນໃຫ້ສູງຂຶ້ນກວ່າເກົ່າ, ສືບຕໍ່ເອົາໃຈໃສ່ສ້າງກຳລັງ ໃຫ້ມີຄວາມໜັກແໜ້ນທາງດ້ານການເມືອງ, ແນວຄິດ ມີຄວາມເຂັ້ມແຂງດ້ານການຈັດຕັ້ງ ແລະ ເພີ່ມທະວີຄວາມຊໍານິ-ຊໍານານ ໜ້າທີ່ວຽກງານວິຊາສະເພາະຫຼາຍຂຶ້ນກວ່າເກົ່າ, ເອົາໃຈໃສ່ຊີ້ນຳ-ນໍາພາກໍາລັງ ໃນການເຮັດໜ້າທີ່ວຽກງານວິຊາສະເພາະ ຕາມພາລະບົດບາດຂອງຕົນ, ເປັນເຈົ້າການໃນການສ້າງບ້ານປອດຢາເສບຕິດ, ປອດຄະດີ ໃຫ້ໄດ້ຫຼາຍຂຶ້ນກວ່າເກົ່າ, ເອົາໃຈໃສ່ປະຕິບັດຕາມວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ.  ຄະນະພັກ-ຄະນະບັນຊາ ປກສ ນະຄອນຫຼວງວຽງຈັນ ຕ້ອງເປັນເຈົ້າການຊີ້ນໍາ-ນໍາພາ ແຕ່ລະໜ້າວຽກໃຫ້ມີຄວາມຮັດກຸມຫຼາຍຂຶ້ນກວ່າເກົ່າ, ມອບໃຫ້ພະນັກງານ ທີ່ເຮັດວຽກງານລົງກໍ່ສ້າງຮາກຖານ ເປັນເຈົ້າການ ໃກ້ຊິດຕິດແທດກັບປະຊາຊົນ ເຮັດວຽກງານສ້າງຕາໜ່າງຂ່າວໃຫ້ໄດ້ດີ, ເອົາໃຈໃສ່ປັບປຸງກໍາລັງ ປກສ ບ້ານ ໃຫ້ມີຄວາມໜັກແໜ້ນ, ເຂັ້ມແຂງ ຊຸກຍູ້ໃຫ້ເຂົາເຈົ້າເຄື່ອນໄຫວຕາມພາລະບົດບາດ, ສິດ ແລະ ໜ້າທີ່ຂອງ ປກສ ບ້ານ, ພ້ອມທັງເອົາໃຈໃສ່ສ້າງບົດບັນທຶກປ້ອງກັນຄວາມສະຫົງບ ກັບບັນດາຫ້າງຮ້ານ, ຫົວໜ່ວຍທຸລະກິດ ເພື່ອຫຼີກລ່ຽງ ຫ້າມເດັດຂາດບໍ່ໃຫ້ຊື້-ຂາຍ ຈໍາໜ່າຍສິນຄ້າປະເພດສ້າງສຽງເນື່ອງນັນ, ສຽງແຕກ ໃນໄລຍະສະເຫຼີມສະຫຼອງປີໃໝ່ສາກົນ 2022 ເພື່ອເຮັດໃຫ້ ນະຄອນຫຼວງວຽງຈັນ ມີຄວາມສະຫງົບໂດຍພື້ນຖານ.

 

Off

Comments are closed.