01st Jan2022

ປີ 2021 ທົ່ວປະເທດມີອຸປະຕິເຫດເກີດຂຶ້ນ 5,576 ຄັ້ງ.

by somchan

ທ່ານ ພັນເອກ ກົງສີ ສຸວັນນະຕຸ່ມ ຫົວໜ້າກົມຕຳຫຼວດຈະລາຈອນ ກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ ໄດ້ໃຫ້ຮູ້ວ່າ: ປີ 2021 ທົ່ວປະເທດມີອຸບັດເຫດເກີດຂື້ນ 5.576 ຄັ້ງທຽບໃສ່ປີ 2020 ຫຼຸດລົງ 1.198 ຄັ້ງ. ໃນນີ້ມີພາຫະນະເປ່ເພ 9.910 ຄັນ, ຄົນໄດ້ຮັບບາດເຈັບ 8.388 ຄົນ,ຄົນເສຍຊີວິດ 831 ຄົນ ລວມມູນຄ່າເສຍຫາຍທັງຫມົດຫລາຍກວ່າ 92 ຕື້ກີບ.

ໄລຍະ 1 ປີຜ່ານມາ ເຖີງວ່າສະພາບ ການເກີດອຸບັດເຫດຢູ່ປະເທດລາວມີທ່າອ່ຽງຫລຸດລົງ ຖ້າສົມທຽບໃສ່ປີ 2020 ແຕ່ໂດຍລວມຈໍານວນຕົວເລກຜູ້ໄດ້ຮັບບາດເຈັບ ແລະ ເສຍຊີວິດຍັງມີຫລາຍ, ສາເຫດທີ່ເຮັດໃຫ້ເກີດອຸບັດເຫດສ່ວນໃຫຍ່ ຍ້ອນນັກຂັບຂີ່ສ່ວນໃຫຍ່ຂາດສະຕິໃນການໃຊ້ລົດ-ໃຊ້ຖະຫນົນເປັນຕົ້ນ: ເດັກອາຍຸບໍ່ທັນເຖິງກະສຽນ, ບໍ່ມີໃບອະນຸຍາດຂັບຂີ່, ດື່ມສິ່ງມຶນເມົາ. ເສບສານຕິດແລ້ວຂັບຂີ່ລົດ, ຂັບຂີ່ລົດໄວເກີນກໍານົດ, ລ່ວງປ້າຍຫ້າມ, ລ່ວງໄຟອໍານາດ, ລ້ຽວ-ແຊງບໍ່. ຮັບປະກັນ.

ພັນເອກ ກົງສີ ສຸວັນນະຕູ້ມ ໃຫ້ຮູ້ຕື່ມວ່າ: ເພື່ອເຮັດໃຫ້ການຈັດຕັ້ງປະຕິບັດວຽກງານວິຊາສະເພາະຂອງກໍາລັງຕໍາຫລວດຈະລາຈອນໄດ້ຮັບປະສິດທິພາບ ແລະ ປະສິດທິຜົນກວ່າເກົ່າ ແລະ ເຮັດໃຫ້ຈໍານວນ ອຸບັດເຫດຫລຸດລົງ ຄະນະພັກ-ຄະນໍາກົມຕໍາຫລວດຈະລາຈອນ ໂດຍປະຕິບັດຕາມທິດທາງ ແຜນການລວມ, ຂອງກົມໃຫ່ຍຕໍາຫຼວດ ກະຊວງປ້ອງກັນຄວາມສະຫງົບ ວາງອອກ. ຈະເພີ່ມທະວີເຮັດ ວຽກງານການເມືອງ-ແນວຄິດໃຫ້ພະນັກງານ ກໍາລັງຕໍາຫຼວດຈະລາຈອນໃນທົ່ວປະເທດ ເຊື່ອມຊືມ ແລະ ກໍາແຫນ້ນກົດຫມາຍ, ຫຼັກການວິຊາສະເພາະ ໃຫ້ມີຄວາມຮູ້ຄວາມສາມາດທຽບເທົ່າກັບສາກົນ ສາມາດນໍາໃຊ້ເຄື່ອງມືທີ່ທັນສະໄຫມ ເຂົ້າໃນວຽກງານວິຊາສະເພາະ, ສຸມໃສ່ກວດກາ ແລະ ປັບປຸງ ກໍາລັງຕໍາຫຼວດຈະລາຈອນໃຫ້ມີລະບຽບແບບແຜນ, ເຂັ້ມແຂງທາງດ້ານການຈັດຕັ້ງ, ມີຄຸນສົມບັດ, ຈັນຍາບັນ, ຈັນຍາທໍາ ເພື່ອເຮັດຫນ້າທີ່ບໍລິການສັງຄົມ ຈັດຕັ້ງຜັນຂະຫຍາຍແຜນຍຸດທະສາດ, ໂຄງການ ປ້ອງກັນ, ສະກັດກັ້ນອຸບັດເຫດຢ່າງມີຈຸດສຸມ ນັບແຕ່ສູນກາງລົງຮອດທ້ອງຖິ່ນ, ຍົກສູງຄຸນນະພາບໃນ ການເຮັດຫນ້າທີ່ໂຄສະນາຢ່າງກ້ວາງຂວາງ ໃຫ້ທົ່ວປວງຊົນໃນສັງຄົມມີສ່ວນຮ່ວມໃນການປະຕິບັດກົດ ຈະລາຈອນຢ່າງເຂັ້ມງວດ, ຈັດຕັ້ງກໍາລັງລົງເຮັດຫນ້າທີ່ລະບາຍການສັນຈອນໃນເວລາຮີບດ່ວນ ທາງ ເຂົ້າ-ອອກເມືອງ ແລະ ເສັ້ນທາງຮ່ອມ, ສາມແຍກ, ສີ່ແຍກ, ແກ້ໄຂຄະດີອຸປະຕິເຫດທີ່ເກີດຂຶ້ນໃຫ້ວ່ອງໄວ ແລະ ເປັນທໍາ, ຈັດສັນຄວາມເປັນລະບຽບການສັນຈອນຕາມເສັ້ນທາງ, ເຂດຊຸມຊົນ, ຕະຫຼາດ, ຄີວລົດ , ເຂດໂຮງຮຽນຕິດແຄມທາງ ແລະ ສະຖານທີ່ສໍານັກງານຕ່າງໆ ຈັດຕັ້ງກໍາລັງປະຈໍາການ, ຄອຍເຫດ ສຸກເສີນ ແລະ ຊຸກຍູ້ແນະນໍາທ້ອງຖິ່ນວ່ອງໄວລົງສະຖານທີ່ເກີດອຸບັດຕິເຫດ, ປະ ສານສົມທົບກັບຂະແຫນງການທີ່ກ່ຽວຂ້ອງ ແກ້ໄຂບັນຫານັກຂັບຂີ່ລະເມີດໄຟອໍານາດ, ການບໍ່ໃສ່ຫມວກກັນທົບ, ເພີ່ມທະວີການກວດກາລົດຕິດປ້າຍບໍ່ຖືກຈຸດກໍານົດ ພ້ອມທັງກວດກາລົດທີ່ບໍ່ມີປ້າຍ, ລົດບໍ່ມີເອກະສານ ຫຼື ເອກະສານບໍ່ຖືກຕ້ອງໃນຂອບເຂດທົ່ວປະເທດ ແລະ ອື່ນໆ.

ສໍາລັບກໍາລັງຕໍາຫລວດຈະຈາຈອນປ້ອງກັນເວນຍາມໃນໄລຍະສົ່ງທ້າຍປີເກົ່າ ຕ້ອນຮັບປີໃຫມ່ ຄສ 2022 ຫລືປີໃຫມ່ສາກົນ ໄດ້ປະສານສົມທົບກັບພະແນກຕໍາຫລວດຈະລາຈອນ ໃນຂອບເຂດທົ່ວປະເທດ ຈັດວາງກໍາລັງເຂົ້າເຮັດຫນ້າທີ່, ປະຈໍາການຄອຍເຫດ 24 ຊົ່ວໂມງ, ພ້ອມ ທັງກໍານົດໃຫ້ພະນັກງານລົງເຄື່ອນໄຫວເຮັດຫນ້າທີ່ກວດກາຊ່ວຍທ້ອງຖິ່ນ, ເນັ້ນຫນັກໃສ່ການກວດກາຄວາມໄວ,ທາດເຫຼົ້າ, ການບັນທຸກຂົນສົ່ງສີນຄ້າ-ຄົນໂດຍສານເກີນ ແລະ ກວດກາບັນດາເອກະສານຂອງຜູ້ຂັບຂີ່ ແລະ ເອກະສານຍານພາຫະນະ, ອອກຄໍາແນະນໍາໃຫ້ພະແນກຕໍາຫຼວດຈະລາຈອນໃນການຈັດຕັ້ງປະຕິບັດປ້ອງກັນປີໃຫມ່ສາກົນ 2022 ອອກ ແຈ້ງການໃຫ້ທົ່ວສັງຄົມໃຫ້ມີສ່ວນຮ່ວມໃນການຂັບຂີ່ປອດໄພ ແລະ ປະຕິບັດກົດຈະລາຈອນຢ່າງເຂັ້ມງວດ ໃນໄລຍະສະເຫຼີມສະຫຼອງສົ່ງທ້າຍປີເກົ່າ ແລະ ຕ້ອນຮັບປີໃຫມ່ 2022 ເເລະ ອື່ນໆ. ພ້ອມທັງ ຮຽກຮ້ອງເຖີງຜູ້ໃຊ້ລົດ-ໃຊ້ຖະຫນົນກໍ່ຄືນັກຂັບຂີ່ ໃຫ້ຄວາມຮ່ວມມືກັບເຈົ້າຫນ້າທີ່ຕໍາຫຼວດຈະລາຈອນ ແລະ ເປັນເຈົ້າການໃນການເຄົາລົບກົດລະບຽບຈະລາຈອນຢ່າງເຂັ້ມງວດ, ເພື່ອຫຼຸດຜ່ອນການສູນເສຍ ທາງດ້ານສຸຂະພາບ, ຊີວິດ ແລະ ຊັບສິນທີ່ອາດຈະເກີດຂື້ນ.

 

Off

Comments are closed.