04th Jan2022

ວັກຊິນປ້ອງກັນພະຍາດໂຄວິດ-19 ເກືອບ 8 ແສນໂດສ ຈາກສະຫະລັດອາເມລິກາ ໄດ້ມາຮອດ ສປປ ລາວ ແລ້ວ

by somda phoneor

ວັກຊິນໄຟເຊີ ປ້ອງກັນພະຍາດໂຄວິດ-19 ຊຸດໃໝ່ ຈໍານວນ 799.110 ໂດສ ທີ່ໄດ້ຮັບການຊ່ວຍເຫລືອ ຈາກລັດຖະບານສະຫະລັດອາເມລິກາ ຜ່ານ COVAX Facility ໄດ້ມາຮອດສະໜາມບິນສາກົນວັດໄຕ ນະຄອນຫລວງວຽງຈັນ, ໃນວັນທີ 2 ມັງກອນ 2022, ໂດຍການຕ້ອນຮັບຂອງ ທ່ານ ດຣ. ບຸນແຝງ ພູມມະໄລສິດ ລັດຖະມົນຕີ ກະຊວງສາທາລະນະສຸກ, ມີທ່ານ ນາງ ຈອຍ ມິຊິໂກະ ຊາກຸໄຣ (Joy Michiko Sakurai) ອຸປະທູດ ສະຫະລັດອາເມລິກາ, ທ່ານ ຄະເລນ ຮິ້ວ (Cullen Hughes) ຜູ້ຕາງໜ້າອົງການ USAID, ທ່ານ ນາງ ລີໂອເຕັສ ເຮລິນ (Leotes Helin) ຜູ້ຕາງໜ້າອົງການຢູນິເຊັບ ປະຈຳ ສປປ ລາວ ແລະ ທ່ານ ດຣ. ຢູ ລີ ປາກ (Yu Lee Park)ຜູ້ຕາງໜ້າ ອົງການອະນາໄມໂລກ ປະຈຳ ສປປ ລາວ ເຂົ້າຮ່ວມໃນການຕ້ອນຮັບວັກຊິນຄັ້ງນີ້.

ການຊ່ວຍເຫລືອຄັ້ງນີ້, ແມ່ນການຮ່ວມມືກັນລະຫວ່າງ ອົງການກາວີ, ອົງການພັນທະມິດຮ່ວມມືດ້ານນະວັດຕະກໍາ ເພື່ອຮັບມືກັບພະຍາດລະບາດ ແລະ ອົງການອະນາໄມໂລກ, ໂດຍມີ ອົງການຢູນິເຊັບ ເປັນຄູ່ຮ່ວມງານສຳຄັນໃນການຈັດສົ່ງ. ວັກຊິນໄຟເຊີ ໄດ້ຮັບຮອງຄວາມປອດໄພ ແລະ ມີປະສິດທິພາບ ໂດຍອົງການອະນາໄມໂລກ ແລະ ຍັງເປັນວັກຊິນປ້ອງກັນພະຍາດໂຄວິດ-19 ທໍາອິດທີ່ອະນຸມັດ ໂດຍອົງການອະນາໄມໂລກ ໃຫ້ນຳໃຊ້ກັບກຸ່ມຄົນອາຍຸ 12 ປີ ຫາ 17 ປີ ເເລະ ຜູ້ສູງອາຍຸ 60 ປີຂຶ້ນໄປ, ຄົນທີ່ມີພະຍາດປະຈໍາໂຕ ແລະ ແມ່ຍິງຖືພາ. ວັກຊິນເຫລົ່ານີ້, ຈະຊ່ວຍປົກປ້ອງຊີວິດປະຊາຊົນລາວ ແລະ ຊ່ວຍປ້ອງກັນການແຜ່ລະບາດຂອງສາຍພັນໃໝ່ຂອງພະຍາດ ທີ່ອັນຕະລາຍກວ່າເກົ່າ.

ການຈັດສັນວັກຊິນປ້ອງກັນພະຍາດໂຄວິດ-19 ໃນຄັ້ງນີ້, ເປັນຊຸດທໍາອິດໃນຈໍານວນທັງໝົດສອງຊຸດ ຂອງການຊ່ວຍເຫລືອວັກຊິນ ຈາກສະຫະລັດອາເມລິກາ ໃຫ້ແກ່ ສປປ ລາວ ໂດຍຜ່ານ COVAX Facility, ເຊິ່ງລວມທັງໝົດປະມານ 1,7 ລ້ານໂດສ ແລະ ຄາດວ່າວັກຊິນຊຸດທີ່ສອງຈໍານວນ 899.730 ໂດສ ນັ້ນຈະມາຮອດ ສປປ ລາວ ໃນກາງເດືອນມັງກອນ 2022 ນີ້.

ການຊ່ວຍເຫລືອດັ່ງກ່າວ, ແມ່ນສືບຕໍ່ຈາກການຊ່ວຍເຫລືອວັກຊິນ Johnson & Johnson ຈໍານວນ 1 ລ້ານໂດສ ໂດຍສະຫະລັດອາເມລິກາ ໃນເດືອນກໍລະກົດ 2021 ຜ່ານມາ.

Off

Comments are closed.