05th Jan2022

ເມືອງຈອມເພັດ ຫາລືຕ້ອນຮັບນັກທ່ອງທ່ຽວເຂດພື້ນທີ່ສີຂຽວໄລຍະທີ 1

by somda phoneor

ຫວ່າງບໍ່ດົນມານີ້, ທີ່ຫ້ອງວ່າການເມືອງຈອມເພັດ ແຂວງຫຼວງພະບາງ ໄດ້​ຈັດກອງປະຊຸມປຶກສາຫາລື ຮ່າງແຜນດຳເນີນງານ ເພື່ອກະກຽມຕ້ອນຮັບນັກທ່ອງທ່ຽວໃນເຂດພື້ນ​ທີ່ສີຂຽວໄລຍະທີ 1 ແຕ່ເດືອນມັງ​ກອນ ຫາ ເດືອນ ​ມີ​ນາ 2022, ໂດຍ​ການ​ເຂົ້າ​ຮ່ວມ​ຂອງ ທ່ານ ບຸນເລື່ອນ ມະນີວົງ ຮອງເຈົ້າແຂວງຫຼວງພະບາງ, ມີທ່ານ ສົມສັກ ສີລິວົງ ຮອງເຈົ້າເມືອງ, ມີພະແນກການກ່ຽວຂ້ອງ ແລະ ອົງການຈັດຕັ້ງບ້ານພາຍໃນເມືອງເຂົ້າຮ່ວມ.

ທ່ານ ສົມສັກ ສີລິວົງ ກ່າວວ່າ: ທົ່ວເມືອງຈອມເພັດ ມີຣິສອດ 2 ແຫ່ງ, ຮ້ານອາຫານ 8 ແຫ່ງ, ຮ້ານ​ຄາ​ຣາໂອເກະ, ຮ້ານກິນດື່ມ 8 ແຫ່ງ, ມີເຮືອບັກແຝດ 30 ລໍາ, ເຮືອຂ້າມ 88 ລໍາ, ເຮືອບໍລິການນຳທ່ຽວ 8 ລໍາ, ລົດບໍລິການຂົນສົ່ງນັກທ່ອງທ່ຽວ 19 ຄັນ, ແຫຼ່ງທ່ອງທ່ຽວທຳມະຊາດ 11 ແຫ່ງ, ແຫຼ່ງທ່ອງທ່ຽວວັດທະນະທຳ 12 ແຫ່ງ, ປະຊາຊົນບ້ານຊຽງແມນ ທີ່ໄດ້ສັກວັກຊິນກວມເອົາ 92,24%, ບ້ານຈ່ານເໝືອ ສັກ​ວັກ​ຊິນກວມເອົາ 82,62%. ທົ່ວເມືອງໄດ້ຮັບຢາວັກຊິນທັງໝົດກວມ 53%, ສໍາລັບກຸ່ມເທດສະບານກວມເອົາ 86% ນອກນີ້ຍັງຈະສືບຕໍ່ສັກວັກຊິນໃຫ້ປະຊາຊົນຢູ່ເຂດບ້ານທີ່ມີແຫຼ່ງທ່ອງທ່ຽວໄດ້ 75% ແລະ ຜູ້ປະກອບການ ການທ່ອງທ່ຽວໃຫ້ໄດ້ສັກວັກຊິນຄົບໂດ​ສ 100% ເພື່ອປ້ອງກັນຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19.

ຈາກນັ້ນ ແຕ່ລະພາກສ່ວນທີ່ກ່ຽວຂ້ອງ ລວມທັງອົງການຈັດຕັ້ງບ້ານຊຽງແມນ ແລະ ບ້ານຈ່ານ ຍເໝືອ ໄດ້ປະກອບຄຳຄິດຄຳເຫັນ ເພື່ອກະກຽມຮັບຮອງເອົານັກທ່ອງທ່ຽວທັງພາຍໃນ ແລະ ຕ່າງປະເທດທີ່ຈະມາທ່ອງທ່ຽວຢູ່ເມືອງຈອມເພັດ. ທ່ານ ບຸນເລື່ອນ ມະນີວົງ ໄດ້ເນັ້ນໜັກໃຫ້ແຕ່ລະພາກສ່ວນເປັນເຈົ້າການໃນການສັງລວມຂໍ້ມູນຕ່າງໆທີ່ຕິດພັນກັບການທ່ອງທ່ຽວ ພ້ອມທັງສ້າງແຜນທີ່ຈະຂະຫຍາຍແຫຼ່ງທ່ອງທ່ຽວໃນໄລຍະ 2 ໃຫ້ລະອຽດລວມໄປເຖິງລາຄາອາຫານ ແລະ ລາຄາສິນຄ້າໃຫ້ເປັນລະບົບ. ທ່ານຍັງໄດ້ແນະນຳຕື່ມກ່ຽວກັບການຮັກສາຄວາມສະອາດ, ຄວາມປອດໄພ ພາຍໃນແຫຼ່ງທ່ອງທ່ຽວ, ເຮືອນພັກ ແລະ ຮ້ານອາຫານ ເພື່ອດຶງດູດແຂກພາຍໃນ ແລະ ຕ່າງປະເທດມາ​ທ່ອງ​ທ່ຽວ​ຢູ່​ເມືອງ​ດັ່ງ​ກ່າວ.

 

Off

Comments are closed.