06th Jan2022

ເຈົ້າໜ້າທີ່ ປກສ ເມືອງໄຊທານີ ແກ້ໄຂເປົ້າໝາຍຄ້າ-ຂາຍຢາເສບຕິດ.

by somda phoneor

ພັທ ຄໍາມະນີ ແກ້ວສີຫາ ຫົວໜ້າພະແນກຕໍາຫຼວດ ປກສ ເມືອງໄຊທານີ ນະຄອນຫຼວງວຽງຈັນ,ໃຫ້ສໍາພາດຕໍ່ສື່ມວນຊົນ ປກສ ໃນວັນທີ່ 5 ມັງກອນ 2022ນີ້ ວ່າ: ຕະຫຼອດໄລຍະ 1 ປີຜ່ານມາກໍາລັງປ້ອງກັນຄວາມສະຫງົບປະຊາຊົນເມືອງໄຊທານີ ເວົ້າລວມ, ເວົ້າສະເພາະແມ່ນເຈົ້າໜ້າທີ່ໜວ່ຍງານສະກັດກັ້ນແລະແກ້ໄຂຢາເສບຕິດ ກອງບັນຊາການ ປກສ ເມືອງ ໄຊທານີ ໄດ້ເອົາໃຈໃສ່ ແລະ ເປັນເຈົ້າການໃນການຈັດຕັ້ງປະຕິບັດໜ້າທີ່ວຽກງານວິຊາສະເພາະຂອງຕົນຢ່າງຕັ້ງໜ້າໂດຍຕິດພັນກັບວາລະແຫ່ງຊາດ

ວ່າດ້ວຍການແກ້ໄຂບັນຫາຢາເສບຕິດ ເປັນຕົ້ນເຮັດວຽກງານໂຄສະນາ ໂດຍນໍາເອົາກົດໝາຍ ແລະ ນິຕິກໍາຕ່າງໆ, ຜົນຮ້າຍ ແລະໄພອັນຕະລາຍຂອງຢາເສບຕິດ ໂດຍມອບໃຫ້ອໍານາດການຈັດຕັ້ງແຕ່ລະບ້ານເປັນຜູ້ໂຄສະນາເຜີຍແຜ່ໂດຍຜ່ານໂທລະໂຄ່ງຂອງບ້ານ ເຮັດໃຫ້ອໍານາດການປົກຄອງບ້ານ, ປະຊາຊົນ ແລະ ທຸກຊັ້ນຄົນຢູ່ໃນສັງຄົມຮັບຮູ້-ເຂົ້າໃຈ ພ້ອມນີ້ຍັງໄດ້ຂຶ້ນບັນຊີເປົ້າໝາຍຢາເສບຕິດແຕ່ລະປະເພດ, ແບ່ງຂັ້ນໃນການຄຸມຄອງເປົ້າໝາຍແຕ່ລະປະເພດ,  ສ້າງເປັນລາຍຄະດີສະເພາະຕິດຕາມ ພ້ອມກັນນັ້ນ ເມື່ອພົບເຫັນກໍວາງແຜນແກ້ໄຂທັນທີ.

ຜ່ານຂະບວນການປະຕິບັດວາລະແຫ່ງຊາດ ວ່າດ້ວຍການແກ້ໄຂຢາເສບຕິດໃນຫວ່າງບໍ່ດົນມານີ້ ປກສ ກຸ່ມບ້ານໄຊ ແລະ ອໍານາດການປົກຄອງບ້ານດອນໜູນ ເມືອງໄຊທານີ ໄດ້ຈັດຕັ້ງປະຕິບັດຕາມແຜນປະຕິບັດງານແກ້ໄຂຢາເສບຕິດທີ່ກອງບັນຊາການ ປກສ ເມືອງໄຊທານີ ໄດ້ກໍານົດໄວ້ ເປັນຕົ້ນແມ່ນ: ໄດ້ຂຶ້ນບັນຊີເປົ້າໝາຍຄ້າ ຂາຍຢາເສບຕິດຢູ່ພາຍໃນບ້ານ, ກໍາໄດ້ເປົ້າໝາຍແຕ່ລະປະເພດໄດ້ຢ່າງຊັດເຈນ, ເຊິ່ງໃນວັນທີ 22 ທັນວາ 2021 ຜ່ານມາ ເວລາປະມານ 22 ໂມງ 30 ນາທີ ປກສ ກຸ່ມບ້ານໄຊ ສົມທົບກັບອໍານາດການປົກຄອງບ້ານດອນໜູນ ເມືອງໄຊທານີ ໄດ້ອອກກວດກາລາດຕາເວນຕາມເສັ້ນທາງ ຂອບເຂດຄວາມຮັບຜິດຊອບຂອງຕົນ ສາມາດຈັບຕົວເປົ້າໝາຍຄ້າຂາຍຢາເສບຕິດໄດ້ 1 ຄົນ ຊື່ທ້າວ ອາມີ  (ອັອດ) ອາຍຸ 39 ປີ ຢູ່ບ້ານດອນໜູນ ເມືອງໄຊທານີ ນະຄອນຫຼວງວຽງຈັນ ພ້ອມຂອງກາງປະເພດຢາບ້າ 210 ເມັດ ແລ້ວສົ່ງມາໃຫ້ໜ່ວຍງານສະກັດກັ້ນ ເເລະ ຕ້ານຢາເສບຕິດ ປກສ ເມືອງໄຊທານີ ເພື່ອສືບສວນ-ສອບສວນຫາຜູ້ຮ່ວມຂະບວນການ.

ຜ່ານການສືບສວນ-ສອບສວນຂະຫຍາຍຜົນ  23 ທັນວາ 2021 ເວລາ 13 ໂມງ 30 ນາທີ ເຈົ້າໜ້າທີ່ ປກສ ເມືອງໄຊທານີ ສາມາດຈັບຜູ້ຮ່ວມຂະບວນການໄດ້ 2 ຄົນ ຄື: ນາງ ໄຊພອນ ອາຍຸ 57 ປີ ຢູ່ບ້ານດອນໜູນ ເມືອງໄຊທານີ ພົບເຫັນຂອງກາງປະເພດຢາບ້າ 1.000 ເມັດ; ທ້າວ ສາຍສະໝອນ (ຄໍາຫຼ້າ) ອາຍຸ 29 ປີ ຢູ່ບ້ານດອນໜູນ (ລູກຂອງນາງ ໄຊພອນ) ຂໍ້ຫາເສບຢາເສບຕິດ ແລະ ປິດບັງການກະທໍາຜິດຂອງຄົນອື່ນ.

ຍ້ອນການຊັດທອດຂອງນາງ ໄຊພອນ  ໃນຂອງວັນດຽວກັນ ເຈົ້າໜ້າທີ່ ປກສ ເມືອງໄຊທານີ ຈຶ່ງໄດ້ຈັບຕົວທ້າວ ສຸບັນ ອາຍຸ 58 ປີ ບ້ານດອນໜູນ ເມືອງໄຊທານີ ຂໍ້ຫາ ຄ້າຂາຍຢາເສບຕິດ ພົບເຫັນຂອງກາງປະເພດຢາບ້າ 30.000 ເມັດ, ເງິນກີບ 150.000.000 ກີບ, ເງິນບາດ 3.784.000, ເງິນໂດລາ 24.000 ໂດລາ, ລົດໃຫຍ່ 3 ຄັນ ແລະ ວັດຖຸຄ້າຍຄືເງິນ ແລະ ຄໍາຈໍານວນໜຶ່ງ.

 

ທ່ານໃຫ້ຮູ້ຕື່ມວ່າຜ່ານການສືບສວນ-ສອບສວນພວກກ່ຽວທັງ3ໄດ້ໃຫ້ການຮັບສາລະພາບຕໍ່ເຈົ້າໜ້າທີ່ວ່າ ໄດ້ຮ່ວມກັນພົວພັນຊື້-ຂາຍຢາເສບຕິດປະເພດຢາບ້າຢ່າງແທ້ ກ່ຽວກັບຢາບ້າດັ່ງກ່າວທີ່ເຈົ້າໜ້າທີ່ກວດພົບຄັ້ງນີ້ແມ່ນຂອງພວກກ້ຽວຢ່າງແທ້ຈິງ; ສ່ວນທ້າວ ສາຍສະໝອນ ໄດ້ຮັບສາລະພາບວ່າ ຜູ້ກ່ຽວຮູ້-ເຫັນນາງ ໄຊພອນ ຜູ້ເປັນແມ່ ຊື້-ຂາຍຢາເສບຕິດ; ນອກຈາກນັ້ນ, ຜູ້ກ່ຽວຍັງໄດ້ເສບຢາເສບຕິດປະເພດຢາບ້າ,ປັດຈຸບັນຄະດີດັ່ງກ່າວແມ່ນຢູ່ຂັ້ນຕອນການສືບສວນ-ສອບສວນຂອງເຈົ້າໜ້າທີ່ ເພື່ອຂະຫຍາຍຜົນຊອກຫາ ພັກພວກ ກຸ່ມແກ້ງ ຜູ້ຮ່ວມຂະບວນການແລະດໍາເນີນຄະດີຕໍ່ພວກກ່ຽວຕາມລະບຽບກົດໝາຍ.

Off

Comments are closed.